卡通主題餐廳

8大卡通主題餐廳 足本介紹

親子餐廳

廣告

卡通主題餐廳以往都只有出現喺日本、台灣等地,不過近幾年卡通主題餐廳喺香港就愈開愈多,繼熊本熊Café、姆明Café之後,最近有薯蛋頭先生Café、Hello Kitty Le Petit Café,間中仲會有啲pop up Café或者crossover餐廳,好似尋日喺銅鑼灣廣場2期嘅麥當勞就變身成Minions主題餐廳!既然講得係卡通主題餐廳,無論食物定裝潢都好有睇頭,真係未食先興奮,就等我哋為大家做個足本介紹啦!一於睇完去食去影,跟手緊係順便打埋卡晒命啦!Sundaykiss小編將為你介紹2024最新美食資訊,即睇:

薯蛋頭先生Café

《Toy Story》入面嘅玩具角色各有人追捧,當第一眼看見薯蛋頭先生(Mr. Potato Head)時,你未必會鍾意佢,但睇睇下會覺得佢傻得好可愛,最搞笑係成日跌晒啲眼耳鼻,而且佢仲係一個好老公,好愛薯蛋頭太太(Mrs. Potato Head),所以好受粉絲愛戴。7月頭Izumi Curry就將屯門V City同尖沙咀Mira Mall分店改裝成Mr. Potato Head Café,薯仔加咖喱,簡直係絕妙的組合。

cafe內隨處可見薯蛋頭先生嘅蹤影,當然仲有佢啲眼、耳、鼻,好搞笑!除咗布置同墊枱紙有薯蛋頭先生嘅嘜頭,每枱都會擺放由日本直送嘅薯蛋頭夫婦公仔,大家可以一邊食一邊同佢哋selfie,唔駛等隔離枱影完先到你。cafe限食90分鐘,由於仲係新開張嘅關係,日日都好多人去食,所以大家想唔駛等咁耐就記得早啲去喇!

睇睇Café個餐牌,都有唔少選擇,仲要好多都有薯蛋頭先生嘅樣,啲眼耳鼻係用蔬菜、火腿等造成,如果你好想自己郁手整薯蛋頭先生個樣,就唔好錯過期間限定嘅「朱古力醬熱香餅配橙汁」,佢會附送枝裝朱古力醬,可以俾你自己DIY唧薯蛋頭個樣,邊玩邊食,大人細路都啱!

Mr. Potato Head Café by Izumi Curry
地址:尖沙咀彌敦道118號Mira Mall 1樓110號鋪 (即美麗華商場對面)
電話:3104 1904
營業時間:11:30am-10:00pm (最後落單時間9:30pm)

地址:屯門屯門鄉事會路83號V City商場1樓9號舖
電話:3104 1904
營業時間:11:30am-10:00pm (最後落單時間9:30pm)

Hello Kitty Le Petit Café

Hello Kitty做主題的餐廳、Café一啲都唔陌生,之前佐敦開咗全球首間Hello Kitty中菜廳,我哋都有報導,最近又有Hello Kitty Café開張,就係喺尖沙咀嘅Hello Kitty Le Petit Café,其實即係之前喺銅鑼灣SOGO地庫間舖仔,依家搬去尖沙咀地舖,重新裝修,而呢間店同大坑嘅Hello Kitty Secret Garden、澳門嘅Hello Kitty Obrigado係同一老闆,怪唔之得個店舖風格都有啲相似啦!

同之前銅鑼灣店一樣,不設堂食,不過店面就闊好多,至少唔會好似之前喺SOGO咁同其他人一齊迫,啲食物可以拎喺手擺靚pose慢慢影都得。

食物方面,同銅鑼灣店都有少少唔一樣。macaron加入新口味,包括櫻花、沖繩黑糖、芝士、紫薯、栗子,味道多達21款,仲有其他十幾款甜品蛋糕,部分係新調製。

有新食物之餘,同時保留咗之前好受歡迎嘅乳酪,連價錢都冇變。唔想食甜品嘅話,都有飲品可以選擇,如咖啡、士多啤梨梳打等。

Hello Kitty Le Petit Café
地址:尖沙咀赫德道2號地下
電話:2831 8959
營業時間:12nn-9pm

忌廉哥主題餐廳

鍾意貓嘅人對忌廉哥呢個名絕不陌生,話佢係香港最出名嘅貓,相信都冇乜人會反對,除咗拍廣告、搞慈善基金外,忌廉哥最近又有新搞作,就係同譚仔三哥crossover,開咗間忌廉哥主題餐廳。講得話係用忌廉哥做主題,店入面隨處可見忌廉哥嘅相,無論係真樣定卡通樣都一樣係cute爆!

呢間譚仔三哥.忌廉哥主題餐廳有別於其他店舖的格局,用藍白作主色,而且空間感十足,枱與枱之間距離相當闊,感覺一啲都唔侷促,而一入門口嘅左手邊,內有一個擺滿忌廉哥精品、相片嘅展覽櫃,旁邊仲有一塊粉絲留言版,再望另一邊的牆身有一幅忌廉哥威水史嘅看板,記錄咗忌廉哥由出世到依家嘅大事,當然一定有令佢聲名大噪的失蹤事件啦!

食物方面,同一般的三哥譚仔一樣,冇特別唔同,不過餐枱紙同meun都有忌廉哥卡通,肥貓、火爆貓、為食貓、心心眼貓……小心睇到都唔記得落單。雖然食物款式冇變,但就推出咗5款一人小食,包括意川醋香番茄、手拍青瓜、大豆芽、雲耳和蓮藕,新主題店價每款$15,不過新開張有優惠,每碟$11,鍾意食小食嘅朋友就啱晒!仲有,最特別嘅係啲碗碟全部都有忌廉哥嘅樣,其他地方都冇架!

譚仔三哥.忌廉哥主題餐廳
地址:觀塘康寧道1-9號晨光大廈3樓
電話:2389 0090
營業時間:11:30am-10:30pm

Minions 麥當勞餐廳

上星期成班迷你兵團喺開心樂園餐現身,當然即被搶購一空,今個星期銅鑼灣廣場2期麥當勞仲變身做Minions主題餐廳!大大隻Bob、Stuart、Kevin喺度,粉絲緊係第一時間去影相啦!

全線麥當勞同McCafé都推出咗一系列Minions黃色美食,包括香蕉批、香蕉朱古力忌廉卷、新地樂等,啲凍飲全部用印有minions樣嘅透明膠杯裝住,加埋啲飲品本身啲顏色,好吸引呀!

除咗Minions嘢食,仲有令人一見鍾情嘅餐具,每套有叉同羹,粉絲緊係買限量版Minions舐舐脷餐具套裝﹐,因為除咗有3套餐具,仲有個靚靚Minions兩用餐墊袋,呢個袋只得限量版套裝有。另外,24小時麥麥送同McCafé亦可換購指定餐具,所以要儲齊晒5套就要食多幾次麥當勞。

Minions 麥當勞餐廳
地址:銅鑼灣駱克道463-483號銅鑼灣廣場2期地下G04號
電話:2891 3503

MOOMIN CAFÉ

上年年尾喺海港城LCX開嘅MOOMIN CAFÉ係首間海外店,餐廳以姆明谷為主題,同日本嘅好相似,設計以深藍色同啡色嘅田園風為主,入面除咗有好多姆明一族公仔外,仲有手繪嘅壁畫同芬蘭嘅擺設。Café嘅旁邊係姆明精品店,唔少係café限定同香港限定款式,如馬克杯同姆明公仔等。

既然係主題café,又點少得卡通icon嘅食物啦!café提供嘅食物大部分係北歐菜,但部分食材係由日本進口,如雞蛋、米和北海道牛奶等,聽講話日本姆明café嘅廚師會監督水準,應該睇得又食得啦!其中得香港限定姆明之家熱香餅,有3層高嘅姆明屋,入面分別有唔同嘅甜品,而且仲會贈送7層迷你熱香餅上嘅陶瓷公仔,既然得香港獨有,去到一定要試啦!

MOOMIN CAFÉ
地址:尖沙咀海港城海運大廈3樓LCX 32號舖
電話:2730 0963
營業時間:11am-11pm
精品店營業時間:10am-10pm

Fullhouse Signature

Fullhouse來自馬來西亞,以「家」為概念的卡通主題餐廳,有家庭成員爸爸Thomas、媽媽Tracy、姐姐Tiffani及弟弟Tony,餐廳裝潢及餐桌椅仿維多利亞式風格,並用水晶吊燈、古典鋼琴等作裝飾,感覺華麗,猶如童話世界。除咗係餐廳,Fullhouse同時提供婚宴服務,可以俾新手舉行婚禮等儀式。

食物方面以星馬菜式及西菜為主,有前菜、主菜到甜品應有盡有,而且更會隨季節推出食物及飲品。

Fullhouse Signature
地址:尖沙咀加拿芬道25-31號國際商業信貸銀行大廈地下1A舖(河內道K11對面)
電話:2369 2813
營業時間:12nn-11pm

熊本熊Café

日本熊本縣人氣吉祥物熊本熊Kumamon,推廣熊本縣,國內外大受歡迎,上年年尾喺香港香港開設首間熊本熊「Kumamoto Café 」,由店面裝潢、菜式、員工制服到餐墊,到處可見Kumamon 蹤影。與薯蛋頭Café一樣同Izumi Curry Crossover,如果到依家都未食過,真係要快啲去喇!因為只會開半年至九個月,計計下都差唔多時間同香港say bye bye喇!

食物方面,除咗招牌咖喱吉列豬扒飯之外,亦有漢堡扒、炸蝦、炸雞等,加上沙律和炒飯等洋風料理,大部分採用熊本縣食材製作,又砌成Kumamon頭樣,就連甜品都有Kumamon個樣,粉絲影相都影都手軟。

Kumamoto Café
地址:觀塘道418號apm LG一田超市外
電話:2803 9188
營業時間:10am-11pm

Chocolate Rain

Chocolate Rain係全港第一家由本地創作公仔為主題的餐廳,店內以拼布裝飾及Chocolate Rain公仔布置,充滿童真感覺,主打前衛的分子料理,由曾任米芝蓮餐廳的大廚主理,來頭一啲都唔惹小,但唔好以為價錢好貴喎!其實菜式價錢同一般餐廳差唔多,但可以食到貴死人嘅份子料理,所以真係好值得去食一次!

店內另一側售賣Chocolate Rain嘅精品,間中亦會舉行手作班,由Chocolate Rain創辦人Prudence親自教授,可以邊食邊玩邊做手作。食物方面以一個套餐價錢包前菜、主菜及甜品,價錢由$228-$298不等,亦有甜品package,價錢由$99-$268不等。

Chocolate Rain
地址:中環鴨巴甸街35號PMQ A座1樓109-113室
電話:5544 0810
營業時間:4pm-9pm (逢星期一休息)

卡通主題陸續有嚟,7月尾先有比卡超 crossover 沙爹王,到8月就有超人氣梳乎蛋 crossover 點心代表,想知詳情,大家就要密切留意住我哋sundaykiss啦!

撰文:Heidi Lau