金像獎2024｜李琳琳姜大衛慶祝結婚紀念50年 台上放閃羡煞高麗虹
現實中的John哥卻是娛樂圈出名的愛妻號好爸爸，同老婆李琳琳結婚50年同甘共苦，更陪老婆成功走過抗癌路。日常夫妻恩愛拍拖，溫馨歎茶行街街，不時在街上被捕獲！
姜大衛入行近六十年見盡娛圈起落
入行六十多年的姜大衛John哥，4歲已經做童星， 19歲由哥哥秦沛引薦加入邵氏做龍虎武師，由於外表英偉很快已被賞識擔任電影男主角， 23歲憑電影《復仇》當上影帝，不過近年回流電視圈的John哥，已由主角變綠葉王，雖然長做配角，但他對每個角色都演出落力認真，更坦言永不言休。見盡娛樂圈起落的他，有他的工作哲學，直言在娛樂圈工作，必須明白不可能長做一線，風水輪流轉。他解說指自己入行初期，跟過一位紅到發紫的明星，每次該紅星出現，所有人都會湧埋他身邊，而John哥則被擠到旁邊，但幾年後他走紅，同樣班人湧到他面前，風水輪流轉就是這個意思！
貫徹好男人本色 潮買電動家庭車
姜大衛不時孖老婆李琳琳風騷出巡，到又一城歎茶行街，出名愛錫家人的他，對老婆細心照顧周到，在酒樓等位期間，兩人更襯空檔落商場下層睇車，似乎想買部大車方便全家出動家庭樂，當日John哥夫婦對一架時下潮人最愛的電動車極大興趣，兩公婆由車款到車廂內籠都研究得非常仔細，又同經紀密密斟，攞齊資料才去歎茶繼續研究。
姜大衛 李琳琳結婚50年
姜大衛同李琳琳自1974年結婚，育有兩女一仔，大女姜依蘭07年嫁曹永廉，二女姜依文亦已組織家庭，現居溫哥華，細仔姜卓文是李琳琳於1996年以48歲高齡誕下，現年僅22歲。2011年中李琳琳被爆患上大腸癌，手術後卻因癌細胞擴散至淋巴位置，要進行化療，被傳媒影到激瘦如同紙版人，不過經過老公姜大衛悉心照料，兩年後李琳琳終於戰勝病魔，兩公婆感情更勝從前，John哥早年接受傳媒訪問時表示：「嗰段時間我的確係好擔心，唯一可以做嘅就係共同面對。四十幾年感情，其實唔需要講出聲都知，大家都係冇咗對方唔得嘅！」
婚姻之道 互相包容
講到50年婚姻相處之道，姜大衛認為最重要係互相包容，佢話自己年輕時好多事情都會堅持己見，睇唔順眼就會出聲，但隨住年長的看法也有所不同：「之後會明白其實好多執拗都冇乜大不了，總之唔傷害到自己同別人就得啦。兩公婆嗌交，都係因為睇法唔同。後生時，我哋總係想改變對方，但慢慢就會知道，有啲嘢係冇得迫嘅！」
對女婿讚不絕口
近年姜大衛同女婿曹永廉喺《公公出宮》同《超時空男臣》密密合作，《公公出宮》中曹永廉更同現實一樣，都係扮演John哥嘅女婿角色，成就曹永廉攞到最佳男配角獎。John哥對女婿大讚話：「佢個角色唔容易演，但佢演得到！」至於拍戲時，廉記又會點樣稱呼John哥？John哥笑指以前會同佢講喺錄影廠要叫John哥，唔好叫外父！但廉記就笑言依家叫咩都冇所謂啦！
姜大衛 演藝世家出身
姜大衛係演藝世家出身，與大哥秦沛及同母異父弟弟爾冬升三兄弟感情勁好，John哥自4歲開始做童星，66年加入邵氏做武師，得到大導演張徹賞識，擔正《游俠兒》主角。70年更憑《報仇》一片成為香港首位獲得亞洲影展最佳男主角嘅演員。73 年，John哥再憑電影《叛逆》獲得亞洲影展最具性格演員獎。
姜大衛曾表示最鍾意演武俠片，除此之外就係喜劇，而喺新劇《逆緣》以三爺孫的故事為軸心，年僅30歲的陳家樂在劇中成為姜大衛嘅爸爸，黎耀祥就係陳家樂個孫，配搭新鮮！
陳家樂飾演嘅二戰時期冷凍人士兵陳家樂在2018年甦醒後，驚覺兒子姜大衛及孫兒黎耀祥早已年紀漸老，他決心重拾父子關係，掀起連串奇幻逆緣。
愛拍搞笑武俠劇
佢喺較早前播出的《翻生武林》中，就集合晒John哥最鍾意嘅兩種類型，劇中John哥一人飾演「慈悲老人任我飛」和「武林盟主慕容風」兩個角色，戲份勁重。
