張繼聰

謝安琪老婆視覺下的老公 張繼聰:影到我好似個阿叔

娛樂

廣告

噚日就係西方嘅白色情人節,張繼聰似乎就同老婆謝安琪去咗日本旅行,而且仲同老婆甜蜜放閃!張繼聰就以老公視覺晒出為老婆影嘅靚相,點知當老婆為佢影相時,就曝露出謝安琪私下嘅老婆視覺原來係咁…

撰文:東方新地|圖片:張繼聰Instagram

張繼聰謝安琪 去旅行

日前,張繼聰就同老婆喺白色情人節二人世界,去咗日本睇富士山。雖然暫未見一對可愛仔女,不過就見佢哋兩公婆又再次放閃,話說張繼聰除咗自己影靚景外,當然唔少得為老婆擔當私家攝影師,為謝安琪喺富士山下留倩影啦!

用老公視覺影自己女神老婆就緊係以最靚角度,相中嘅謝安琪自然而唔造作嘅pose就獲得唔少網民讚賞!不過,張繼聰就留言一段兩公婆嘅對話:「我:『依個位靚呀,企埋去幫你影張相吖』 ..兩秒影完,張相水準的確好高吓,佢:『真係ok喎☺️咁你埋去,我幫你影吖』..影完……我攞番手機一睇….佢:『點呀?ok嗎?』 我:『好好呀 ! 我好似一個阿叔第一次去旅行咁….』 …之後去其他景點,我冇再影相…..」,淨睇段對話都認真笑爆嘴!

老婆視覺下的老公

相信大家都好想睇下究竟喺老婆視覺下嘅張繼聰有幾大叔,有相為證,張繼聰亦上載自己老婆為佢影嘅作品,睇到張繼聰好生硬咁企定定,但成塊面就暗晒,成張相嘅感覺同謝安琪嘅獨照差好遠,唔怪得網民都不斷留言笑指:「係人問題,造型同pose既關係」、「唔係呀!你嗰張影得幾靚呀!影後邊座山」、「我笑咗出嚟」、「完全明白你心情」等等。

張繼聰 街頭唱情歌冧謝安琪

張繼聰今年情人節在Instagram上寫道:「老婆話唔要啲物質禮物,但係要難忘嘅冧豬嘅幾十年後都記得嘅,於是我帶佢去海旁,問班年輕人借咗啲架生……」原來佢問喺海旁嘅年輕人借咗支結他,即興自彈自唱張學友首《每天愛你多一些》冧老婆,片中所見現場有近百人圍觀,見證呢個浪漫時刻!

當鏡頭影到Kay時,佢笑得好燦爛好冧成副冧樣出晒嚟,相信呢份禮物最永恒,也令呢位幸福人妻一世難忘!

張繼聰仲話要多謝班借樂器畀佢嘅年輕人,更向Kay表白話要「每天愛你多一些」,兩公婆恩愛到暈。

原來獻唱前仲有段小插曲,張繼聰話喺海旁遇上周國賢夫婦,而周國賢除咗幫張繼聰拍片,都有份拎起結他獻唱佢首《目黑》!

張繼聰冧完今世情人,再發咗張同前世情人嘅相,佢上載咗張咀嘴囡囡溫馨照祝大家情人節快樂,仲搞笑話張相係「激嬲老婆系列」!