女人四十

女人四十真是老?要養生?未結婚喺Deadline? 同你細數6大共鳴位

熱話

廣告

有言「十八廿二 花樣年華;女人四十則是爛茶渣」,踏入40歲,係咪做咩都已經太遲?昨晚首播由田蕊妮(阿田)主持的《女人四十》,找來一班好友們43歲杜如風、43歲車婉婉、41歲谷祖琳、39歲卓韻芝和41歲蔣怡,大談40歲時面對的問題。不少網友都無諗過咁好睇,好多位都好中,好有共鳴,甚至有網友自爆係中佬都有睇。

撰文:TLY 圖片:《女人四十》mytv

共鳴位一
女人四十真是老?

社會一直會認為40歲的女人已經步入中後年,女人會隨年齡增長,而自信下降。每當我哋被新認識嘅人,將我哋嘅年齡估成更年輕,心底裡都不禁沾沾自喜,而節目中,阿田問小朋友對她的印象時,小朋友話佢似27歲,佢都超開心!但年齡真係可以定義女人價值嗎?阿田就認為,其實自信係由內去外,你嘅內心強大年輕,年齡都只係數字,一樣可以去學新野,發掘自己未知嘅另一面。

共鳴位二
從前嘅興趣改變 不再夜蒲

年輕時,我哋夜夜笙歌,夜蒲、打牌、唱K直落無問題,一到了40歲好像只係鐘意留係屋企,瞓個美容覺。阿田和谷祖琳自稱曾是「夜蒲Queen」,當時生活由晚上11時先會正式開始,但現在再蒲會覺得「覺得很吵,很刺耳,更會見暈」急急腳離開。杜如風更自嘲,宜家落去再蒲自己已經係「Auntie Helen」。

共鳴位三
唔夠膽著背心短褲 要開始養生

阿田係節目試著上熱褲,就表示下面涼浸浸,提到宜家著衫要諗清楚,覺得著背心、短褲,就好似唔係良家婦女。「有一次問老公杜汶澤,著背心好唔好?,阿澤答我著得舒服就得。」另外節目提到「中女」要養生,阿芝就話「中女會飲暖水,遲啲要飲熱水」。阿田認為除左要保持健康,心態都要保持年輕。

 

共鳴位四
女人四十歲未結婚喺Deadline?

社會不斷進步,但一啲傳統觀念依然好影響女性嘅睇法,女性喺咪要40歲前結婚呢?阿田直言,的確會有人為咗趕死綫而結婚,要結婚好易,要嫁得好就好難。

 

共鳴位五
有仔趁嫩生?

過咗35歲懷孕嘅婦女就會稱為高齡產婦,認為身體會出現大變化,懷孕機會會下降,風險都會愈大。但阿田為咗推倒說法,連子宮都要出埋鏡!佢去咗婦產科照子官,照完醫生就話佢嘅子宮子齡如14歲,依然合適生小朋友,所以年齡只是數字,身體實際狀況先真實證明到適唔適合生小朋友。

共鳴位六
女人四十才是真正開始

去到節目尾聲,阿田認為,「40歲好似突然睇野清晰哂,都變得從容不迫」。車婉婉十分認同,以前衝動火爆嘅性格,當發生問題就要立即解決,宜家忍耐力高咗,發生問題時會先退後一步。阿田立即補充:「現在覺得出現問題很正常,無法即時解決嘅野,便等到明天再解決,始終能解決。」

另外,谷祖琳認為放慢腳步,不會逼迫自己太緊,每一日只安排一樣野,以一樣事情為重點。阿田更認為40歲過後,好似重生「一路走來累積到嘅智慧同涵養,我反而覺得件事好美麗。」女人四十更要有態度!