年宵

學生搞年宵 有咩睇頭?

熱話

廣告

近年唔少學生都視年宵為「創業」試點,由籌備、入貨到開檔實戰,通宵叫賣,賺到嘅未必係錢,而係一次難忘嘅經驗。2016年剛開始,股市樓市不振,市民消費意欲低,咁今年殺入維園呢個全港最大嘅年宵市場嘅學生檔主,有咩辦法、有咩招數,去保住自己盤生意呢?

「高檔」主打產品夠實用

中西區嘅高主教書院,由2009年開始都會喺維園年宵擺檔,個名正正就係叫「高檔」!資金由舊生會提供;而籌備及設計、銷售產品等就由學生負責,而且年年都有錢賺,成績都唔錯架!

今年高記學生依然以「自家設計」產品做賣點,負責發言嘅胡同學話,今年佢哋收集咗唔少同學嘅意見,認為產品除咗應節,都要夠實用,所以就設計咗幾款唔同款式嘅產品,製作嘅數量都唔少,不過佢哋對產品好有信心,肯定至少可以回到本!

馬騮索袋 $138

年青人必備嘅索袋,夠闊夠深,線口車工實淨,裝鞋裝書都ok。

碌柚葉肥皂 $38 x 1, $68 x 2

呢兩舊馬騮頭碌柚葉肥皂,係一位由麻省理工畢業嘅高記校友指導學生手造出嚟嘅,用碌柚葉嘅精華提煉,用嚟洗邋遢就最啱!

馬騮水樽 $98

水樽有內膽,可以擺水果或者茶包,而且入熱水都冇問題,因為學生嚴選質料製作,保證唔會釋放致癌物。

記憶頸枕 $68

睇落啡色一舊嘢咁,其實就係高質產品。表面啲窿窿係透氣孔,而且頸枕係用記憶綿造成,一定係最fit自己!

維園年宵#48

伊中擺檔為更新校舍

伊利沙伯中學係九龍區嘅名官校,伊中學生去到維園擺年宵,準備嘅產品唔算多,而且亦都冇設計馬騮產品應節,反而揀咗大人細路都鍾意嘅”叮噹豆沙包”做主題。受訪嘅陳同學話,因為近年香港社會動盪,所以想藉一樣屬於香港人嘅集體回憶,將歡樂嘅氣氛帶畀香港人,等大家過個開心嘅新年!

陳同學話,希望將今次年宵嘅收益,回饋畀學校,因為伊中嘅校舍已經用咗68年,已經好陳舊,有好多硬件都需要更新,所以希望今年生意好,可以令學校同學都受益。

豆沙包暖枕 $168

豆沙包入面嘅豆沙餡,係一張暖暖被,冬天有得攬,又有得冚,一物兩用,都幾實用架!

鯛魚燒公仔 $188

魚有喻意年年有餘丫嘛! 又攬得又好意頭,買番去應該唔會畀阿媽鬧敗家掛!

維園年宵#100

理大獨賣 好大支嘢

Ploy今年都有好多同學仔入維園擺檔呀! 呢個咁有特色嘅檔口,就係由一班喺Ploy drama soc識嘅同學仔一迫夾份開嘅,做開drama佈景,做個招牌都寧舍唔同架! 成個檔口,就只係賣呢4款大型支狀攬枕,所以佢哋個檔口,就叫「理大支嘢」喇!

負責人Danny話,設計呢4款攬枕,係想搞吓笑,等香港人可以多啲歡笑。佢哋有咗構思之後,就一齊去超市攞靈感,最後就揀咗呢4款,既經典又親切嘅嚟二次創作!今次係佢哋第一次擺年宵,志在一齊玩吓,熱血吓,集體投資咗近10萬,只要回到本,佢哋就覺得ok喇!

四支大嘢係乜嘢?

奸人牙膏 $168

鷹乜練奶 $168

毛脾膏 $168

李綿記蠔油 $168

維園年宵#105

中婦以應節為主

東區嘅香港中國婦女會中學一班修讀商科嘅同學仔,今年已經係第二次喺維園擺年宵,產品選擇都唔少架,以應節嘅公仔同揮春居多,亦都有少量自家設計嘅布袋同file,主攻學生市場。

負責發言嘅林同學話,第一年都以應節嘅公仔做主打,銷情好穩定,兼有錢賺,所以今年都以入貨為主,再以少量自家設計,希望降低成本,有助回本兼賺錢。

自家製布袋 $88 / 個

自家設計file $28 x 2

應節攬攬猴公仔 $48-88

雖然係經廠家入貨,但係勝在得意精美,價錢唔貴,所以銷路都唔錯架,第一日開檔,一個下晝就賣到十幾隻。

維園年宵 #14

BU撐本地小店

一見到呢個檔口以為係執笠清貨清到入年宵,望真其實係呢班BU同學仔搞嘅噱頭。受訪嘅謝小姐話,好多小店都畀地產霸權趕絕,搞到一啲好似冰室咁嘅傳統小店生存愈來愈困難,佢哋搞呢檔年宵,係想令公眾關注到呢個訊息。

佢哋賣嘅嘢都好立雜架,有新年應節嘅公仔年桔同桃花,又有啱情人節嘅玫瑰花,亦都有係小朋友都鍾意嘅吹氣公仔。不過佢哋主打賣嘅,就係:「淘寶都搵唔到嘅」菠蘿油暖手枕喇!

菠蘿油暖手枕 $188

維園年宵#140

張祝珊望薄利多銷 封蝕本門

張祝珊英文中學今年已經第十年喺維園擺年宵喇! 由全級80個商科生組成嘅籌備委員會,日日輪流落嚟看檔,聲勢夠哂號大! 負責發言嘅黃同學話,今年經濟麻朮,但係成本就比去年高咗兩成,為咗封蝕本門,今年佢哋決定以薄利多銷,刺激銷情。

現場所見,佢哋嘅產品選擇多,有人氣公仔,亦都有應節精品,全部都係用廠商入貨嘅,所以價錢都唔算太貴,最好賣同佢哋最推介嘅震動頸枕,都係賣$68蚊咋!

震動頸枕 $68

講真個震動就唔係震得太勁,按摩功能存疑,不過勝在質地優質,顏色圖案都多選擇,而家同學嘅介紹都親切,淨係呢點就加哂分啦!

對對猴 $48/對

呢對馬騮,又食正猴年同情人節條水,而且顏色選擇多,最好賣就係佢哋喇!

維園年宵#148

九華有信心賺錢

九龍華仁書院嘅經濟學會,已經喺維園擺咗好多年年宵架喇! 舊年賺咗一成,呢班華仁仔話,今年有信心可以賺多啲!

佢哋嘅產品唔多,仲幾立雜,不過大部分都係針對學生而設計,而且定價都唔貴架!

猴頭頸巾 $100

好似最近天氣凍,佢哋就出咗一款猴頭頸巾連帽加手套,戴住嚟過年,包保暖笠笠啦!

Whatsapp msg broad $48

摘星寶典 Notebook $40

維園年宵#201

樹仁搞公仔放題

一大班人食飯gathering,最啱就食放題啦! 呢班樹仁學生就將呢個概念搬咗嚟年宵,將幾款放題必食變哂做公仔,全部都係自家設計,真係cute得嚟又得人鍾意喎!

炸蝦攬枕 $288

壽司卷抱枕 $128 三文魚暖手枕 $188

維園年宵#173

撰文: Joanne

 

※如欲率先接收資訊,請讚好我們的FB專頁並於「已讚好/Liked」選單設定「搶先看/See First」,多謝支持。