親子影樓

特色親子影樓 玩法大不同

熱話

廣告

今時今日,上影樓影相已經唔係啲咩新鮮事。正因為普遍,所以而家啲影樓都愈來愈多「花臣」,你想玩主題又得!你想幫初生BB影又得!你想自己話事自己影又得!或者邊開party邊影相都得!總之一定有一種玩法,可以滿足你需要!

 

星媽御用攝影師操刀 玩盡唔同主題

幫好多星媽星爸影開家庭相嘅Jenny,之前一直有開班專教人影小朋友,後來仲自己開埋影樓。可能Jenny自己都係媽咪,對捕捉小朋友嘅特質特別到位,而且佢都諗頭多多,利用影樓嘅空間同活動嘅道具,定期構思唔同嘅主題,令到每個家庭都影得開心。

馬仔一家三口嘅家庭照,都係Jenny負責影架! 影樓有一塊大黑板,可以就唔同對象,畫上唔同嘅圖畫嚟配合,馬仔嚟到,就梗係畫番自己個嘜頭啦!

除咗家庭相之外,Jenny定期都會訂製一啲特別嘅道具,嚟配合唔同嘅攝影主題,好似聖誕同農曆新年呢類節日主題,梗係唔少得啦!

節日主題嘅家庭相,當一家日影嚟開心吓,做個紀念又得,當賀卡送畀親朋好友,送上祝福都得!

 

6月係幼稚園畢業高峰期,所以Jenny就諗咗以畢業相做主題,點知大受歡,淨係呢兩三個月,影畢業相都影到手軟,而且仲再一延期tim!

除咗玩主題之外,Jenny仲擅長同你朋友邊玩邊影,一來小朋友影得開心,二來亦都好容易可以捕捉到佢咃最真嘅一面。

而家拍劇興玩穿越,Jenny嚟緊都會推出一個’穿越時空班房’嘅主題,有興趣嘅家長就可以留意吓喇!

想搵Jenny幫手影相,費用由$680-$8280,視乎人數,同係咪想要番哂啲相,而拍攝時間就由30分鐘起,都係視乎拍攝人數而定。每個主題嘅收費同拍攝時間都唔同,所以預約之前就要問清楚喇!

 

FODIO

地址:新蒲崗景福街104號新時代工貿這業中心1501室

電話:3974 5292

網址:http://jfoto.com.hk/

專影初生BB 全程照顧賬妥貼

BB大得好快,初初出世好似一舊糯米糍咁嘅階段,唔會睇得幾耐! 如果想留低BB呢個咁得意嘅moment,就可以考慮幫佢影番輯’New born寫真”喇! 攝影師阿Keith,就係專影初生BB嘅達人,佢話只會影出世5至15日嘅BB,因為呢段時間BB嘅身體仲好柔軟,身體嘅線條會係最優美,所以適合影相。

洪天明同周家蔚嘅第二個囝囝JT洪大義出世之後,都喺阿Keith度影咗輯相架!

家長可能會擔心,初生BB仲咁敏感,咁脆弱,究竟係咪適合影相? 阿Keith就話唔使擔心,影相嗰陣,一定會揞咗BB瞓着先,全程仲有兩個助手幫手照顧BB,萬一BB喊啦,餓啦,甚至要換片,都會服侍周到。影一輯相大概要$4,000蚊左右,但係有咁多人幫手,其實都唔算好貴。

由於BB影相嗰陣,大部份時間都唔會着衫,所以影樓嘅溫度都會維持喺27至30度,咁BB就一定唔會凍親喇! 而且影初生BB嘅時候,影樓只係會採用天然光,絕對唔會用閃光燈,因為BB眼皮比較薄,用閃光燈可能會傷害到佢哋嘅眼睛,或者會嚇親佢哋,而且用天然光影出嚟嘅效果都會warm啲!

阿Keith話,影初生BB一定要好有耐性,因為影之前一定要揞BB瞓着先,所以環境一定要夠靜,佢哋事前都同家長講,唔好帶太多人一齊嚟影樓。如果BB快瞓着,拍攝嘅過程就會好快。

除咗一個採光充足同乾淨企理嘅環境,阿Keith都準備咗好多道具同衫仔畀BB影相嗰陣着。

 

 

Keith. C

地址:新蒲崗大有街34號義發工業大廈10樓A5室

電話:9359 5284

網址:www.keithcgallery.com

平玩最潮自拍館 自己話哂事

自拍館而家愈開愈多,形式就有啲似以前嘅貼紙相咁,場地會提供攝影器材,同大量嘅道具同服飾,只要揀好主題背景,就可以喺指定時間內任影,最平由$328蚊起,想平平哋就影到一輯靚靚全家福,呢個都係唔錯嘅選擇!

唔止道具同服飾有得揀,房裡面都有幾款唔同嘅背景紙你換!

房內有一部固定嘅攝影機,同較好哂嘅燈光,相機旁邊有兩部電視,可以畀自拍人宜睇清楚個構圖先影。

到一家人都準備就緒,擺好pose之後,就可以撳遙控自拍喇!

去影之前,記得自備一隻USB,影完職員就會將所有相過哂落隻手指度畀你! 大部分自拍館都只會將啲相保留2至3日,你唔想啲相畀人睇到嘅,都可以要度職員刪除哂啲相。

]

除咗一家大細。學生,情侶,或者自己影靚靚都一樣得架!

 

SNAP HK 全港最chur自拍體驗館

地址:銅鑼灣羅素街28號4樓

電話:2668 6658

網址:http://snap.hk/

靚裝Party房 邊玩邊影至夠fun

而家啲party房開到遍佈各大工廠區,無論家庭聚會,學生聚會,媽媽會Gathering都鍾意喺party房搞。加上相機操作愈來愈簡單,如果有啲家長平時鍾意自己揸機影相,去呢啲靚裝party房,一邊開party,一邊影靚相,就最good fit喇!

其實唔少Sunday Kiss嘅專訪家庭相,都係喺呢類party房影架!

party房唔止裝修靚,有啲親子主題房仲會有波波池玩,想幫小朋友嘅童年留低多啲回憶,都係唔錯嘅選擇。

除咗裝修靚同主題選擇多,party房嘅收費都比較划算,通常以時租計,一個鐘$250蚊,比起租專業影樓,一個鐘都千千聲,真係平好多架!

雖然係租畀人開party嘅地方,但係地方一樣乾淨企理架,唔止規定入房前要除鞋換拖鞋,仲定時有專人清潔打掃,所以真係碌住地咁影都唔怕架!

 

Party Fever

地址:新蒲崗雙喜街19號雙喜工業大廈3樓全層

電話:9220 0556

網址:http://www.partyfever.com.hk/

 

 

撰文: Joanne

相片:新傳媒資料室,Facebook 及網路圖片