錢小豪

兩父子大細路 錢小豪 :鍾意同個仔發癲

育兒

廣告

「我要多啲帶佢出嚟做訪問,鍛鍊中文,見識多啲。」武打影星 錢小豪 望着13歲細仔錢穎德,一臉鐵漢柔情。他覺得為人父母必須發掘子女才華,學業其次,做人有才華,才能踏出成功的第一步。同樣的說話,小豪亦有向大仔景峰進言,要做個成功的K-Pop明星,都要有料才可立足,否則一切只會過眼雲煙。對於大仔,小豪坦言無權訓話,始終沒有照顧多年,最多給予一些意見而已。 小豪經歷過兩段婚姻,與前妻郭秀雲育有一子景峰,三年後離婚,兒子隨母生活。2001年再娶前電台DJ丘倩鳴,誕下細仔穎德,自此決心做個好爸爸,與兒子以「貪玩朋友式」相處,從打交、發癲建立出深厚父子情。

大嗌打交打摔角

爸爸生女會好冧,但生仔就好好玩,可以一齊打機、睇戲、睇波,小豪兩父子也不例外,相處上friend過打band,穎德笑稱常與爸爸玩到癲,「有時大嗌、打吓交……都係玩吓啫。」小豪指兩人是家中的「大小細路」,鍾意攬頭攬頸玩,「我鍾意同個仔一齊發癲,我哋嗌完就攬埋一口舊打交、打摔角,佢幾歲開始我就同佢喺地下碌來碌去,呢個習慣到依家都冇改變。好開心㗎,兩父子都係小朋友,雖然佢身軀愈來愈大,但行為都冇改變。不過我就冇打機喇,我睇佢打,都要陪吓佢玩嘅。」 爸爸貴為影星,阿仔都愛上睇戲,除了睇爸爸的作品之外,睇戲的種類都很廣泛,小豪說:「佢會睇劇情片,講好多對白,好有深度,好似湯漢斯《換諜者》,咁思考嘅戲佢都鍾意睇,佢係一個幾特別嘅小朋友。」

比同齡孩子早熟

13歲的穎德比同齡同學早熟,當其他同學仍在看卡通片、笑片、英雄片時,他已經看「間諜片」,有時覺得與同學話不投機,小豪解釋兒子受他影響下,見識較廣博,令他思想成熟。「早排我先同佢講,你係不知不覺進步咗,你覺得人哋幼稚,其實唔係,因為其他小朋友日日喺屋企做功課,冇你見嘅層面咁多,你會去鬥車、去表演跳舞,形成好多圈子識到好多朋友,依家你又坐喺度接受姐姐訪問,同學都冇得經歷㗎,擺pose影相點擺啊?所以你咪成熟咗囉。」 平日父子以朋友式相處,唯獨一項爸爸必須嚴厲管教,就是禮貌,「其他嘢我好放任,佢話買乜就買乜,只要係正路嘢,即使買遊戲碟都冇問題,你打得好我都會買,但佢冇禮貌我一定鬧,尤其唔可以對人呼呼喝喝,有時佢唔記得講『唔該晒』、『對唔住』,我都會即刻話佢。我唔可能陪佢成世,將來佢都要出去處世,你個人有禮,人哋對你嘅觀感好,朋友自然會多。」

媽媽又惡又錫

慈父多數配嚴母,媽媽丘倩鳴在兒子眼中「有時惡、有時錫」,「最緊要唔好駁嘴……唔知係咪女人性格,少少嘢就嘈。」小豪笑言自己在家中放肆,太太則相反,會執着家中的瑣碎事,「見阿仔打機打耐咗就會勞嘈,睇戲睇咗兩個鐘,又話夠鐘飲啖水,阿仔話睇埋先,佢就話唔得!點可以兩個鐘都唔飲水?真係幾好笑,哈哈!」 兩夫婦的性格相反,在教仔上小豪會讓太太主導,自己避開,「佢覺得我不修邊幅,我就覺得佢過於小心,以前成日都為個仔拗,好似我行行吓冇拖個仔,放佢自己行十幾步,佢就話我咁做好易令個仔仆親,好多濕碎嘢講。到依家個仔大喇,兩母子一拗,我就唔出聲當聽唔到,阿仔覺得阿媽仲當佢細路,咁我覺得佢都應該有自主,佢想幾時飲水咪由佢囉。」

捨國際學校轉讀播道

13歲剛踏入反叛期,小豪慶幸兒子乖巧生性,沒有學壞,做爸爸的都放心不少,「佢冇粗口爛舌,食煙飲酒古靈精怪,仲係一個好正常嘅青少年。」反而穎德自言性格有改變,希望有更多自主,「阿媽想我着呢件衫,但我會想着另一件。」小豪笑阿仔開始想行型格路線,「佢都好貪靚,你睇佢讀小學個髮型已經係咁,學校話過一兩次之後都算了。」 穎德現就讀將軍澳直資學校播道書院中一,是少有從國際學校轉回本地學校的例子,小豪指太太擔心兒子的中文程度弱,決定小學轉校惡補中文,而且該校以活動教學,兒子不難適應。「呢間學校好好喎,自由度好高,冇乜壓力,我未見過阿仔返嚟做功課。」穎德笑說有功課,多數在學校做完才回家,「有時唔做㖭!」 2006年創校的播道,中小學一條龍,着重品德教育,教學方法較新穎,功課量不會太多,學校網頁也提及到,「校方會設導修課,讓學生在老師的指導下,在校內完成大部分之功課。」取而代之,學校會安排學生多做project,自己發掘知識,小豪說:「最近學校要佢哋聽個管弦樂音樂會,再寫番篇論文,入去欣賞吓,可能會鍾意呢。」

從活動中理解知識

小豪從小對兒子的教育之道亦一樣,多從活動發掘潛能,比做功課死記硬背有用。穎德得到爸爸遺傳下,性格好動,身體柔軟度高,最愛跳舞、體操、賽車及打拳,小豪亦樂於花錢買puzzle、模型及LEGO給兒子,訓練其專注力及創意。「幾千蚊我都買,砌嘢對腦部發育好,要完成一件作品係需要高度專注力,培養分析能力,所以幾貴我都買,有益嘛!專注力好、忍耐力高,對玩賽車都有用,個意念都一樣。我希望個仔係咁樣學習,係理解知識,唔係用功課灌輸知識,交完功課可能唔記得晒㗎喇,理解同交功課係兩樣嘢。」

提點大仔多元發展

有理解知識的能力,就有能力發掘才華。小豪明言,男人必須有才華,才能踏出成功的一步,對於已入行做歌手的大仔景峰,曾進言希望他繼續增值自己,有能力立足娛圈。「大仔,你想做歌星一定要學多啲嘢,才華對男人好緊要,你有錢人哋可以打劫你,你有才華得益係自己,冇人打劫到你。娛樂圈好多叻人,唱歌、跳舞、演戲、動作叻嘅都有,你要多才華先有競爭力,冇嘅話,老竇、天王都幫你唔到。我15歲開始拍戲,見過好多人紅兩年就失蹤,有啲唔太紅嘅好似我咁,又生存到幾十年,唔通我真係靠運咩?我梗係有樣才華,令人哋對我仲有需求,直到今時今日。」 小豪坦言,穎德與景峰兩兄弟好少聯絡,始終年紀相差12年,且分開居住,「25歲嘅年青人好難同13歲嘅小朋友溝通,成長環境又唔同,見到面都係打招呼傾兩句,始終成長冇一齊玩。都唔緊要嘅,只要佢哋見面有溝通就得,將來玩唔玩得埋唔知,可能佢哋大家都喺演藝界相熟呢,最緊要佢兩個健康快樂成長。」

 

●撰文:Ling
●攝影:Clay Lam (部分相片由受訪者提供)
●化妝:King Yip@KINGS MAKEUP
●髮型:Wilson Wong@KINGS MAKEUP
●場地:FFG武術健身中心@旺角 (tel: 2398 3555)