媽媽

唔好以為媽媽好揮霍

育兒

廣告

做人做左幾廿年,雖不能說看破紅塵,也不再是年少無知,有云:「女子本弱,為母則剛!」我敢說,每個媽媽其實都持家有道、精打細算!做唔到格價專員,都一定唔做水魚比人据。

撰文、 圖片:Slow walk|編輯:YIU

細路玩$12夾一次夾寶石公仔

話說今日星期日,當然係家庭樂啦!我同爸爸帶左兩隻細路,同埋d表哥表姐去冒險樂園玩。入到去人山人海,細路們當然非常興奮,我就周圍望下有咩抵玩,最後發現最平一部機都要八個代幣。

我心諗:好過去搶,我寧願拎去食左佢,於是我就一枝箭行去counter唱左$100,打算拿拿聲玩晒就逃離現場。係counter附近,我見到有一對父母,比左好大袋token個仔去玩,目測有300個;之後,在掉彩虹個邊又見到個3歲小朋友拎住差唔多數量既代幣。我心唸:可能佢地大把銀紙燒,暗爽自己好理智!

 

呢個時候,我兩個細路扯住我兩老去夾寶石(都唔知部機叫咩名),$12夾一次,我就唸住好易夾。點知試左四次,一粒都唔跌落黎,心入面有d唔忿氣,但我同細路講:「媽媽無錢啦,夾多一次唔得就走啦,ok?」

於是最後一夾,點知出左一粒超大寶石,你唔好以為事情就完了;呢個時候,表哥表姐正好來到,你都可以想像接下來就聽到:「我又要!我又要!」既煩音!

為左唔令其他小朋友失望,我死死氣地去左唱$500代幣,繼續玩呢個寶石遊戲,好不容易終於跌多三隻大寶石公仔出來,細路就人人有份,我驚覺自己用左差唔多$300去換呢幾舊可能係淘寶賣緊兩草野既玻璃膠公仔!!!!我覺得自己好衝動亦好白痴,於是食晚飯就手緊左d,去牛角唔敢食牛。

返到屋企,打暈d細路之後,我問自己今日做咩要咁堅持夾個幾隻野?如果我同佢地講:「夾唔到不如我請你地去食雪糕?」我相信佢地應該都會開心。神奇既係,呢一刻我又唔後悔自己大駛左,因為呢三百蚊負載住小孩子既期待,佢地係過程入面得到既快樂,仲有父母對孩子「永不落空」既寵愛!

慳自己富養孩子

其實媽媽們係慳自己,富養孩子;比細路最好,自己好少買野,就算買都係cheap野,「佢地着Polo,我地着淘寶!」所以,唔好再話我地大駛,我地既錢係用得好有價值!前題係要有節制,只要量力而為,偶然寵愛孩子多一點實不為過啊!當然,我地自己都可以着polo買靚包包既,哈哈!