曾美華

有線前主播 曾美華 辭工救仔拒變港孩

育兒

廣告

「多謝大家過去十年嘅支持同包容,後會有期,bye bye!」有線前靚女主播 曾美華 (Carman),於2014年12月31日在鏡頭前與觀眾揮手道別,回家專心做全職媽咪。Carman擔任主播之前,2002年拍過楊千嬅〈可惜我是水瓶座〉MV,一張清純的臉至今令人難忘,之後加入有線新聞部,成為最受歡迎女主播之一。2011年,Carman下嫁黎智英次子黎耀恩,三年抱兩誕下大仔黎郁(Jalen)及細女黎望(Amber),Carman發覺工作與湊仔的時間難以平衡,加上仔女出現「港孩」特徵,自理能力有問題,太依賴長輩及工人出手餵飯、着衫等,她決定辭工親自教好仔女,「我都好唔捨得份工,但唔捨邊有得呢?」

撰文:Ling |攝影:Clay Lam (部分相片由受訪者提供)

 

 

2_259K_family
Carman形容老公是家中的終極壞人,仔女曳搞唔掂就會讓老公作懲罰,不過爸爸對着囡囡都是心軟,最多是罰阿仔困黑房。

做全職媽咪好幸運

Carman婚後生活美滿,家住加多利山,育有一對仔女湊成「好」字,仔女有獨立大房,玩具圖書應有盡有,比香港好多孩子幸福,Carman亦沒有經濟負擔,能專心做全職媽咪,她坦言覺得自己好幸運,「我好滿意㗎喇,仔女係一對小天使,有咩好得過見證仔女成長?唔係人人有呢個機會,有啲屋企仲要公一份婆一份,我係比較幸運,可以選擇放棄工作,全心對住小朋友,我覺得好滿足。」
生了大仔Jalen後,Carman迅速返回主播崗位,沒打算停下來,直至細女Amber出世後一年,發覺兩頭不到岸,必須作出選擇。「生一個小朋友,你啲時間仲管理得到,但有兩個小朋友之後,佢哋返學時間唔同,我返工係返shift,仲多數返夜更,我好難朝早有精神送佢哋返學放學,夜晚就返工,我呢份工唔容許集中力不足,所以我點都要犧牲一樣,咁梗係犧牲工作,生咗佢哋出嚟冇可能唔理佢哋。」

7_259K_family
做主播前曾是model的她,在多年前的大家樂廣告中,用匙羹照鏡一幕。
4_259K_family
看到一對仔女快樂成長,自理能力亦漸漸有成果,黐媽咪多過黐工人,Carman覺得一切犧牲都是值得。

扭轉過度依賴問題

小孩是父母湊,還是工人長輩湊,是輕易看得出,Jalen和Amber一看就知媽咪湊多。拍攝當日,Jalen和Amber簡直是「兩塊貼身膏藥」,媽咪行到邊跟到邊,行開少少就扭計,一返到身邊立即笑騎騎,「佢哋依家黐我黐到暈咗。」
想當日仍在主播崗位時,Carman覺得仔女有自理問題,長此下去會有壞影響,「我唔係咁鍾意佢哋嘅態度同飲食習慣,好依賴阿婆、阿嫲同工人,『我唔做呀!我唔食呀,不如你餵我啦!你幫我着襪啦!』所有嘢都好依賴。」她最看不過眼是工人太服侍周到,明白她們想打好份工,但令小朋友失去學習過程,「少主,食嘢啦,餵餵餵!呢度污糟呀,抹抹抹!工人係打好份工呀,但小朋友咪好多嘢唔識囉,舀湯咁舀原來會倒瀉,整污糟咗應該點呢?如果工人即刻幫佢抹,佢哋咪以為咁樣就係解決辦法囉。」

8_259K_family
仔女的房間放有大量圖書,Carman每日都與仔女閱讀和唱遊,令他們對書本愛不釋手。

拒絕呵護溫室小花草

Carman決定瞓身湊仔後,一直灌輸自理的知識,不能凡事假手於人,「仔,你都3歲啦,無理由仲叫工人餵飯,你就玩玩具㗎嘛?食飯要專心,食完咪有得玩囉!仲有你返學係早起身、係趕㗎啦,但你都要自己搵時間着鞋着襪,你遲到係你俾老師話,唔係話媽咪。」
為避免仔女變成溫室小花及小草,Carman採取天生天養、自由發展的育兒方針,拒絕呵護,「我出生都係咁,我父母都冇特別呵護我,所以我會沿用番呢一套。湊小朋友其實唔需要好多嘢,好似帶兩個小朋友出街,係唔需要兩個工人加四個保鑣跟身,有一個工人已經好好。依家啲父母對小朋友太care,試吓放鬆啲唔好咁care,小朋友想變小花小草都幾難。」

10_259K_family
妹妹的房間以粉紅色為主,牆上有AMBER的名字,好有歸屬感。
11_259K_family
哥哥Jalen的房中間有火車連火車軌套裝,可以兩個人坐上去,非常好玩!
9_259K_family
在家中的飯廳拍照時,Carman出動了蝦片氹小孩,開心到不得了,她笑說:「得今日有咋,平時唔會俾佢哋亂食嘢。」

親子多溝通 加強抗壓力

對於接二連三有學童自殺,Carman感到好心噏,某程度上是家長對孩子太呵護,令孩子的抗壓力低,但她覺得,一班局外人的說話更難聽。「有好多70後、80後批評:『有冇諗過以前啲人點捱苦?依家啲口靚仔有幾大壓力?讀書唔好就要死,抗壓力咁低!』咁講唔可以話錯,的確新一代嘅抗壓力冇咁好,但你哋有冇諗過點解?係因為父母一直將個壓力卸俾自己解決,從來唔話俾仔女知應該點做,令仔女唔識抗壓。第二,我覺得呢班人有少少喺傷口上灑鹽,佢哋始終係受害者,父母已經失去仔女,你哋仲要話佢哋仔女差。正如有人被強姦,你反話人哋着得少衫,點可以咁講嘢呢?」

要提高孩子的抗壓力,Carman覺得父母如何陪伴成長至為重要,「如果父母由細到大安排好小朋友嘅一生,佢哋就唔會諗解決問題嘅方法,唔識得面對壓力。以前欠交功課會被老師打手板,家長會話自己個仔;依家打手板係體罰唔俾打,家長仲會賴個老師教得唔好,你係服務供應者,我交學費你梗係要教好我個仔啦!」

13_259K_family
Carman對仔女的期望十分簡單,只想他們做個開心快活人,「用一杯水半杯水嘅講法,當有半杯水時,唔係講『點解我得番半杯水』,而係講『咦,我有半杯水喎。』就係咁簡單。」

抨政府沒調節TSA

求學不是求分數,講就容易,事實上仍有好多父母太着緊分數,令小朋友失去信心,進一步封閉自己。「家長嘅想法有啲扭曲咗,可能家長都要搵食,教育方面交晒俾老師,但返屋企都應該多同小朋友傾偈,唔好一味話:『死仔,點解得90分嘅?你同學小明攞100分喎!』你成日只講成績,個仔唔開心有壓力,梗係唔同你講啦,你咪一直唔知佢唔開心,到佢跳樓你都唔知!所以抗壓力低嘅小朋友,某程度係家長造就出嚟。」
另一「壓力爆煲」焦點TSA,仍未有平息跡象,她批評政府沒有按香港實際情況作出調節,「政府話好多國家都有實行,好似新加坡、美國都有,點解香港唔得呢?正如同一件衫唔係個個着得好睇,外國人可能覺得評估冇問題,會俾最真實一面你睇,但香港人心態一聽到要評估學校,咪谷吓啲學生囉,其實原意未必係咁,政府同教育界應調節一下,唔應該令小朋友過一個不愉快童年。」

14_259K_family
在今周播出的有線節目《帶阿B去旅行》當中,曾美華三母子到宜蘭縣礁溪一齊浸溫泉浴,她坦言與小朋友洗澡時,他們均會對其身體感到好奇,但她不覺得尷尬,認為是教導小朋友性教育的好機會。
15_259K_family
台北多親子餐廳,其中OIA伊亞藝術咖啡館內飼養多隻草泥馬,可一邊食飯一邊近距離餵食草泥馬,Amber有幾次嚇到喊,好搞笑。
16_259K_family
在基隆國立海洋科技博物館除了看海洋生物之外,更到館內的兒童館大玩滑梯和扮廚師,話要煮嘢給媽咪食。

去旅行好過讀興趣班

為了仔女有個愉快的童年,Carman主張玩樂學習,沒有報任何興趣班,最多學畫畫,有次她見識到家長們報班的功利趨勢,「我帶當時兩歲嘅仔去畫畫,個班冇咩人報,最爆嘅班係咩呢?理財班!職員仲sell我報,我問兩歲可以學咩理財,佢話課堂會模擬超市,俾錢佢諗吓可以買十罐可樂,定係兩條香蕉。原來呢啲就叫理財,我自己帶佢去超市都得啦,個班仲要3,000元!我就唔信阿媽要返工就唔去超市,帶埋小朋友去就教到。」
讀萬卷書不如行萬里路,Carman寧願多帶仔女四圍去擴闊眼界,把報興趣班的錢,轉為旅行資金,仔女未夠一歲就開始去旅行,至今去過十個地方,Carman上月再帶仔女到台北七天遊,行程親親大自然,參觀動物園、水族館、餵羊及種植等,價錢低廉。家長可能質疑,你有錢咪周圍飛囉,我哋要搵食!「冇錢就唔好報興趣班,留喺屋企陪小朋友玩吓泥膠仲好,其實小朋友只想黐住父母一齊玩,好過你掉佢去上堂一個鐘再接番佢。」

父母經濟能力許可的話,計劃一些短旅程,對小朋友的得着可以好大,Carman說:「好多人話小朋友兩三歲唔使帶去旅行,佢哋會唔記得,我發現佢哋真係會唔記得,但原來無形中刺激咗佢哋腦部,旅行後個人會大爆發,無論講嘢、睇嘢、與人相處都會大有進步。」