港姐 張名雅 順産開刀 的抉擇

一索得男 長輩興奮

Carat與老公一直都喜歡小朋友，生BB是計劃之內，由拍拖時期已希望趁後生組織家庭，去年籌備結婚期間開始計劃，不久一擊即中，更一索得男，長輩們最開心。「我哋男女都鍾意，第一胎男女都冇所謂，不過老爺奶奶比較傳統，如果今胎係女，佢哋會想我快啲追多個仔，依家就少咗呢種壓力。」Carat有考慮生多個，但要視乎今胎的經歷再決定，如果下一胎是囡囡湊個「好」字就完美了。「好似留長髮會想試短頭髮，短頭髮又想留長髮，不過生仔生女冇得揀，都要睇timing。」

順産開刀也驚慌

踏入第三孕期，Carat已準備執走佬袋，但對於順產與開刀的抉擇，她仍在反覆思量中。「其實順產同開刀我都好驚……我諗要調節咗自己心理先，開刀就揀定一日，到嗰日就乖乖入醫院開刀，咩都settle好晒，唔會有咩surprise，老公都話如果我太怕痛，不如揀開刀；但我知道順產媽咪復元快啲，對BB都好啲，出世嗰陣因為媽咪宮縮會推個BB出嚟，過程中BB都有少少掙扎，所以生命力同平衡力都好啲。」

就此問題兩夫婦有討論一番，Carat質問開刀長大了的小朋友，平衡力真的有差嗎？行路不會時常仆倒吧！「可能順產對BB平衡力有少少幫助啦。」Carat的媽咪當然也支持順產，上一代醫學沒那麼先進，人人都是順產生B，「個個都唔驚，你驚咩呢？最多都係痛一日，之後望住BB咁開心，都唔記得痛啦！」

醫生另建議無痛分娩

Carat日前為《Sunday Kiss》做facebook直播訪問時，也徵詢了媽咪們的意見，大部分也支持順產，反正她只得29歲好後生，而且產後兩三日就行得走得，痛楚只需忍一時。Carat當日也分享了一些朋友開刀的經歷，又聞言開刀要剖腹七層皮，聯想起也怕怕。「我個朋友喺加拿大生，當地一定要順產，但佢生嘅時候出現問題要開刀，到依家過咗一年幾，個傷口仲痛緊，或者佢個女踢到佢都覺得痛。」聽完一輪意見，Carat偏向順產多一點，加上她想盡快恢復做gym、跳舞，「唔想痛住做！」

醫生亦有建議，如果怕痛的話可選擇無痛分娩，好安全，但Carat擔心有後遺症。「醫生話睇麻醉師嘅手勢，其實做咩都有風險，行行吓街都可以仆親，所以唔使擔心太多，要相信醫生。」

港姐冠軍媽咪：避免冷病

Carat指仍有時間考慮，現時最重要保持心境開朗，身體健康，她的一班媽咪級港姐冠軍好友也給予不少貼士，包括慧妍雅集前會長、三子之母曹敏莉及新手媽媽張嘉兒也提醒要避免冷病，因孕婦有很多藥不能吃；葉翠翠亦有分享煲湯等進補食譜，Carat大讚翠翠烹飪好叻，自己也獲益良多。「翠翠煮嘢食好叻，有好多食譜，但我就唔係好叻，要靠媽咪同奶奶幫手煲湯。」

同樣貴為港姐冠軍的Carat，希望自己都如上述好友做個靚媽咪，她懷孕後亦保持到靚靚狀態，只增磅約14磅，身形保持纖幼，未見水腫，沒有肚紋，她相信與平日做開gym及跳舞有關。「醫生話我個肚算細，除咗第一胎會細啲之外，同我有啲腹肌有關，所以個肚冇撐大咁多，懷孕六個月嗰陣，我朝早打側做少少伸展運動時，仲見到側邊兩條肌肉。」

少食多餐 戒辣最難頂

挺着大肚的Carat現時仍健步如飛，懷孕前熱愛運動的她，已暫停做gym及跳舞等劇烈運動。她曾學過肚皮舞、Jazz Funk和K-Pop等舞蹈，最近她上網看到一條外國孕婦跳舞的短片，令她心郁郁想試，即被親友喝止，她唯有乖乖聽從。好動的她現以散步為主，多行街買BB用品都有益身心。

至於飲食方面，Carat保持少食多餐，均衡飲食，多吸收蛋白質，晚上就不吃澱粉質。她解釋並非刻意戒掉澱粉質，只是平日習慣。「我唔係驚肥，我係唔鍾意夜晚食到好飽，食得太飽好辛苦。」

孕期最辛苦忍口是要她戒辣，以前好勁辣的她愛吃雞煲、麻辣火鍋，懷孕後不敢食辣。「我好食得辣，打邊爐我會落成煲辣椒醬、辣椒油，食拉麵會加到99倍辣，最辣就啱我，依家只會間中偷食小辣。好多人都有唔同意見，有啲話食太辣會影響BB皮膚，但少少應該OK嘅。」

聽林奕匡聽到喊

大肚婆因受賀爾蒙影響，好易變得情緒化，Carat最近的情緒也開始波動，易哭易笑。「開心起上嚟會癲癲得得，但有時睇戲、聽歌好易被感動，最近去聽林奕匡演唱會，有啲歌我覺得好touching，好似有兩隻歌佢分別寫俾女朋友同爸爸媽媽，我一路聽一路喊，但現場氣氛好開心，我老公望住我都好驚訝！」張媽媽有見女兒的情緒複雜，特別提點她記着每一個感動位，對將來拍戲有幫助。「佢話你想喊嘅時候要記住點解想喊，遲啲你拍劇要喊就諗番出嚟，哈哈！」

Carat產後將會復出拍劇，希望做個能兼顧家庭與工作的在職媽媽。「我都係29歲仲好後生，如果唔做嘢好多方面會退步，包括思想上，我唔想同社會脫節，我覺得咁樣對維繫家庭都健康。」兩夫婦要工作，少不免靠長輩幫手湊BB，Carat不擔心小朋友會被寵壞，最重要是父母如何教導，找出平衡點。「我細個都係公公婆婆湊大，因為爹哋做生意，媽咪要返工。公公婆婆係幾縱我，但我都冇學壞，爹哋媽咪一收工就上公公婆婆屋企一齊食飯，再接我返屋企。其實長輩湊冇問題，都係一家人，父母最緊要盡番自己責任，放工放假就自己照顧番。」