謝賢

82歲謝賢有助手貼身陪健身 孝順仔謝霆鋒親自物色

育兒

廣告

謝賢(四哥)下月將滿83歲,依然風度翩翩身壯力健,鬧起人上嚟中氣十足,近年更順應趨勢頻頻北上參與真人騷,體力一 樣應付得嚟!如何保持心境和體魄繼續年輕?四哥話過不暴飲暴食、繼續工作保持狀態之餘,原來亦定時定候按摩排毒以及 行山鍛鍊手腳。四哥自與女友CoCo分手後開始獨居生活,目前全天候身邊都有猛男助手陪伴出入,據悉正是由孝順仔謝霆鋒親自物色及包辦全部費用!

編輯:Sunday Kiss|原文:東方新地|圖片來源:謝婷婷Instagram謝霆鋒weibo,新傳媒集團圖片庫

謝賢養生有道

謝賢17年宣布與年輕49歲女友CoCo分手,年過八十的謝賢雖然老而彌堅,不過三年來就再未有新戀情傳出。回復單身又要獨居,謝賢復出拍劇又在多個內地真人騷露面填補空虛,其他時間在香港亦勤於養身和鍛鍊,下月9日就滿83歲,日前謝賢就由司機接 載先到跑馬地接受淋巴穴位按摩、再趁住好天上寶雲道行番半個鐘山。雖然身邊沒有 兒孫和女友陪伴,不過就有健碩猛男全程護駕,兼任助手、看護之餘,亦和四哥有講有笑話題不絕。

霆鋒包辦所有使費

雖然身體仲好硬朗,四哥始終年紀不小又係獨居,據知情人士透露,霆鋒留港時會盡量陪老父食飯行山,不過工作繁忙又日理萬機,放不下心乾脆請專人廿四小時護駕:「四哥Keep得好大家都知,佢唔係咩外傳打羊胎素同拉面皮,係幾十年如一日生活習慣做到足。佢唔食早餐,朝早起身只飲橙汁同咖啡;一定唔會暴飲暴食、咁多年從來唔食消夜;平時注重養生會食補品,朝早橙汁溝埋冰糖燕窩飲落肚;最重要係保持運動,喺屋企日日拉筋舉啞鈴,有時間就會去行山。四哥都話過冇諗過自己會咁長命,所以早年拍戲賺落一早使晒,家陣使費全部係個仔負責。家陣呢個助手四哥去到邊都會跟住,功能除咗幫霆鋒看住老竇,最緊要都係陪吓老人家!」四哥養生有道,絕對係圈中最強爺爺。

全日外出,四哥除咗有專車同司機車出車入,仲有猛男助手去到邊陪到邊。

近年獨居的四哥自有辦法讓單身生活更充實,行山之前 就先去跑馬地來個全身排毒按摩。

身為助手,大隻壯男夠晒稱職,落車時殿後護實四哥,入到大廈亦小心翼翼傍住四哥入升降機。

帶埋男助手做Spa,約一小時後落樓等司機接載去行山。年過八十一樣每日拉筋舉啞鈴,所以四哥身形依然精悍。

孝順霆鋒做到足

霆鋒有幾孝順顧家從來唔會到處宣揚,不過近年四哥露面內地訪談節目,就透露不少父子間的窩心點滴。比如年前霆鋒大手筆送出訂造版豪車勞斯萊斯,四哥笑言冇錢入油,霆鋒則豪氣拍心口:「我有!」

另一個訪談節目,四哥一樣對霆鋒讚不絕口,話霆鋒屬於沉默實幹型兒子,孝順舉動不少、該做的全部做到足。

四哥近年除了活躍幕前,亦積極參與慈善活動,有心有力 的他在探訪長者活動中,親自示範健身設備。

四哥與細49年的女友CoCo拍拖多年,不時帶住女友出席公開活動,自分手後四哥身邊未見再有女伴。

謝賢獲頒「終身成就獎」

早前《第38屆香港電影金像奬頒奬典禮》,大會就率先揭曉今屆「終身成就獎」得主為謝賢。藝人謝賢雖然已82歲,但一直為香港電影及電視界默默耕耘,從1956年《遺腹子》飾演受盡後父欺凌,淒慘可憐嘅仔、1980年《千王之王》嘅「南神眼」羅四海、到前年喺電視劇《賭城群英會》中飾演向無名一角等,至今已從影67年,如今獲頒最高榮譽終身成就獎,可見佢喺香港電影及電視發展上有重大貢獻,恭喜晒謝賢!

最成功嘅「代表作」–謝霆鋒

提起金像獎,好自然會諗起曾經攞過「最佳男主角」、謝賢大仔謝霆鋒。1979年謝賢同同為藝人嘅狄波拉結婚,先後生咗謝霆鋒同謝婷婷,不過二人最終都離婚收場。謝賢同狄波拉對仔女家教甚嚴,但偏偏霆鋒年輕時較為反叛,曾因「頂包案」而要入獄14日。雖然如此,但隨著霆鋒逐漸懂事,喺各方面都有唔同嘅出色嘅成就。

謝霆鋒17歲開始出道,憑著自己喺音樂方面嘅才華,喺香港樂壇打出一片天。除此之外,霆鋒喺影視領域同樣成就斐然,多次喺香港電影金像獎中獲獎。近年,霆鋒亦成功打造咗《鋒味》呢個品牌,更喺全球廚藝大賽中獲得冠軍。謝賢培育出咁優秀嘅仔,可謂係佢一生中最值得驕傲嘅事!

謝霆鋒:爸爸係心中嘅「最佳男主角」

2010年霆鋒奪最佳男主角,感言中提及自己細個嘅時候,謝賢喺身邊不斷講自己拍過幾百小時嘅電視劇,幾百部電影。直到18歲時,霆鋒獲頒「金像獎最佳新演員」,當時佢放咗個獎喺枱面,反問謝賢「你有冇攞過金像獎?」點知呢番說話一直哽喺霆鋒心入面十幾年,霆鋒自知自己不知天高地厚,更對住鏡頭講:「希望佢原諒呢個不知天高地厚、無禮貌嘅小朋友,要湊大一個咁難教嘅細路、每日笑面迎人,你至係最佳男主角。老豆,對唔住。」

從前父子關係 不太親密

睇返謝賢嘅家庭生活,雖然當年佢同狄波拉離異,但離婚後一直保持友好關係;而謝賢由於多年來忙於工作,對一對子女謝霆鋒謝婷婷相處嘅時間少,關係既遠且近。

霆鋒同謝賢曾經喺節目中透露,兩仔爺嘅關係不太密切,問到謝賢有多了解兒子霆鋒時,佢指:「呢個好難講,因為我同跟佢真係唔係好熟,因為各自有工作,佢日日飛嚟飛去拍戲,有時候三、四個月都唔會見上一面,連電話都冇。」

隱藏的父愛

到霆鋒返港時,其他人經常畀謝賢問點解唔同霆鋒一齊見面,謝賢答:「佢返到香港,當然係同佢朋友見面,年輕啲,成日跟著老人家冇意思,我從來唔會去麻煩佢。」兩人雖然不常碰面,甚至連對方嘅行蹤都要透過別人口中先知,但從字裡行間卻隱藏著滿滿嘅父愛。

更加愛護爸爸

霆鋒曾透露,謝賢近年仍會親自收集有關自己嘅新聞:「最近這幾年,他一直覺得自己是我的負擔,幫不了我甚麼東西。可能是當了一輩子的明星,到現在覺得自己起不了甚麼作用,所以特別的沮喪、特別的不知道自己還活著幹嘛。」

霆鋒表示,睇住爸爸一點一點變老,有好大嘅感受,「我是一個比較獨立的人,所以跟父母表達愛意那方面是很差的,但是爸真的老了,那我知道不應該等到一個人真的老了才對他好,所以希望這幾年有開始改變。」

謝賢疼愛兒子和孫兒

另外,謝賢表示,其實父子兩人自霆鋒5歲開始讀書時,都好少講嘢,冇咩家庭樂。「從他讀書至進入電影圈,我都是讓他自由發展。」問到謝賢認為霆鋒發生過咩事情,令佢感到遺憾或可惜時,謝賢更忍不住感觸落淚,謂:「 霆鋒真的很愛他的孩子,每次分開時,兩個孩子都不捨得跟爸爸說再見。」可見謝賢不但非常疼愛霆鋒 ,同時亦很愛護兩個孫子。

送八千萬豪宅 作父親節禮物

霆鋒與謝賢兩父子感情要好,之前父親節前夕霆鋒為爸爸送上驚喜,以8,500萬購入淺水灣道怡峰低層海景單位送給爸爸,實用面積約1,939呎,呎價達4.3萬元,登記買家是謝家鈺 ( 謝賢 的原名),其實早年霆鋒曾送上價值500萬的勞斯萊斯名車予四哥。很多影迷大讚霆鋒的舉動超窩心,絕對是孝順星二代。

謝霆鋒謝賢父子Chok住爆笑鬥嘴

早前,由謝霆鋒主持嘅《鋒味》第二季中,霆鋒邀請老竇同契媽汪明荃擔任嘉賓,一齊煮飯仔兼傾吓計。節目中,呢對好勝父子不時互寸鬥嘴,場面非常搞笑。

節目中,霆鋒同老豆、契媽、內地影星張一山,一齊下廚煮飯俾「順德自梳女」。煮餸期間,謝賢同阿姐講起當年合作拍《千王之王》時霆鋒出世嘅情況。謝賢憶述,當時接到電話就即刻除低戲服撲去醫院,趕到醫院等咗15分鐘霆鋒已經出世。

不過,第一眼見到霆鋒後,謝賢第一句話竟然係:「咁醜嘅。」

一旁嘅嘅霆鋒即刻唔服氣大嗌:「似你囉。」連同場嘅阿姐都笑咗出聲。

之後,張一山踢爆霆鋒話謝賢認為他「唔夠型格」,謝賢聞言即刻話:「沒有,他,慢慢來。」霆鋒又話自細就聽太多老竇的「穿衣原則」,阿姐都忍唔住幫口:「那你肯定要聽他的(謝賢),他穿衣服很講究。」

另一邊廂,阿姐透露謝賢嚟緊又做演員,婆婆聞言大讚霆鋒與謝賢都好紅。謝賢就「彈」霆鋒只是「一般般啦」,一旁嘅阿姐都開口讚:「一代勝一代。」

好勝老竇聞言,就九秒九回答:「我唔識聽呢句話」,認真爆笑。

最後,霆鋒趁喺拍緊節目,但粗粗質疑老竇「一直戴著太陽眼鏡究竟睇唔睇到嘢」。謝賢二話不說脫下眼鏡,霆鋒就將太陽眼鏡拿到鏡頭前,讓觀眾一嘗老竇嘅視角。然後話:「今天的不算黑,平時戴那麼黑能不能看到?」謝賢見阿仔質疑佢多年不變嘅造型,直言:「(因為)我不想看到你!」

霆鋒聞言已無還擊之力,直接舉手投降,仲話老竇:「真係好百厭」,眼見呢對父子爆笑鬥嘴,連阿姐都忍唔住笑謝賢係「老頑童」