森美

想阿仔識多啲唔同國藉嘅女仔 森美:擴闊眼界嘛!

育兒

廣告

9月係學生開學嘅月份,森美早前出席活動時表示,今年開學有啲失落,因為15歲嘅囝囝曦樂,已返回英國開學,但身為爸爸嘅森美就因工作關係,去唔到機場送機,所以心情啲忐忑,好掛住個仔咁話!不過森美除咗關心個仔嘅學業,都好關心佢嘅感情生活!

撰文:Sunday Kiss 圖片:新傳媒資料室、森美IG

仔大女大 養狗填補空虛

森美有一仔一女,大仔曦樂就已經去咗英國升學,細女曦童今年都升中一喇!仔大女大,對感性嘅森美嚟講,又未必係開心事, 近日同老婆攞番對仔女細時啲相出嚟睇,先發現自己係咁唔捨得佢哋長大!為咗填補時間同心靈嘅空虛,最近仲收養咗2隻狗仔,真係多愁善感到一個點!

鼓勵阿仔早啲拍拖

阿仔一個人喺英國,森美驚唔驚個仔會慣住拍拖唔讀書呢?森美大否話佢唔怕個仔識女仔,仲想佢早啲拍拖,早啲學識失戀,遇到感情問題要識得搵人傾。「我叫佢識多啲唔同國藉嘅女仔,擴闊吓眼界,畀咗錢去外國唔好嘥丫嘛!」

佢仲爆阿仔六年班嗰陣,識咗個好好傾,好好嘅女同學,於是佢叫個仔帶埋個女仔返屋企食飯,又約埋對方家長一齊嚟,不過後來兩個小朋友冇發展到,大家做咗好朋友!估唔到森美成日話自己古肅,原來喺呢方面都好開通喎!