【成長唔等人】魔童隨校上京遊學 袁詠儀心酸送機嘆：個仔大喇⋯
廣告
【成長唔等人】袁詠儀同張智霖嘅囝囝魔童（張慕童），下個月就12歲生日喇！日前袁詠儀喺ig上載多張魔童嘅相，原來魔童要跟學校上北京遊學，靚靚跟去機場送機，留意住魔童嘅一舉一動，發覺個仔真係已經大個，突然覺得有啲心酸⋯⋯
撰文：Joanne 圖片：袁詠儀ig
魔童大個 獨立有條理
做媽媽嘅，由懷胎10月，一路將手抱BB湊到會行會走，話係照顧，其實亦係互相依賴，到有一個，發現「舊粉」終於長大成人，難免係會有啲失落感。靚靚袁詠儀日前就體會到呢種感覺喇！話說魔童要跟學校上北京遊學，需要離開屋企一段時間，點知最唔捨得嘅唔係Morton，靚靚去送機嘅時候，就表現出非常不捨。
尤其是見到魔童，可以自己好有條理咁處理行李，攞證件辦手續，又感恩個仔已經獨立，識得照顧自己。
魔童都12歲，大個仔啦！自己入閘都好淡定。
個仔咁獨立，靚靚其實都可以放心啦！
睇到呢個畫面，有邊個阿媽會唔心酸丫！
袁詠儀：「媽媽也要學會放手。 Love u Morton」
兩公婆帶埋魔童遊肯尼亞
袁詠儀同老公張智霖早前帶同囝囝魔童，一齊去咗非洲肯尼亞旅行。袁詠儀喺IG同微博曬靚相，一家三口，手拖手喺非洲大草原上漫步，再加上斜陽夕照，場面真係非常溫馨！
非洲草原一望無際，真係影相都靚啲！唔怪得袁詠儀喺IG留言：「肯尼亞之旅，感恩！」。
12歲嘅魔童，經常望遠鏡不離身，當地風景一定好靚！
一家三口影全家福，魔童一樣唔捨得放低個望遠鏡。
魔童仲同當地小朋友一齊搭膊頭影相！
除咗佢哋一家三口，仲有一大班朋友同行，
見到咁靚嘅大自然景緻，呢趟旅程一定非常難忘！
7月嗰陣，佢哋一家三口仲去過倫敦旅行，魔童呢個暑假應該好充實！
