鹹竹蜂焗茶急救失聲:冬天常打邊爐BBQ 熱氣喉嚨痛聲沙食療

鹹竹蜂焗茶急救失聲:冬天常打邊爐BBQ 熱氣喉嚨痛聲沙食療

天氣寒冷乾燥、經常打邊爐或燒烤,都是引致喉嚨不適,甚至是咳嗽、失聲的原因,飲羅漢果都未必有效。鹹竹蜂焗茶有降火、潤燥、利咽之效,對失聲有顯著療效,老少咸宜。一星期可連續飲用數日,每日一杯,喉嚨有痰或無痰可分別配合不同材料,增加效能。

撰文、圖片:小小豬Kinsey|編輯:Christie

失聲
鹹竹蜂焗開聲茶

失聲去藥材舖 執齊最強開聲茶材料

其實原本我都只係打算買鹹竹蜂焗水飲拯救失聲,不過藥材店員就介紹我加多幾種藥材齊齊焗,可以快啲開聲。一聽到可以快開聲我都即刻唔考慮咁多,請店員執左兩份俾我!

材料包括:

鹹竹蜂

木蝴蝶

胖大海

甘草

份量可請藥材店員幫手,我買左兩份,平均都係$10一份,價錢都算合理呀~

失聲
鹹竹蜂

5個步驟 暖水杯焗鹹竹蜂治失聲

1. 我今次用保溫杯來焗,首先要將隻杯用普通熱水暖杯(大約15分鐘),然後加入所有材料~

失聲
步驟1

2. 加入熱水後,記得要篤爛隻鹹竹蜂,可以更加出味。過程係有點恐佈,不過為求目的,都要做呀~

失聲
步驟2

3. 大約焗半小時~

失聲
步驟3

4. 慢慢倒出,就飲得啦~

失聲
步驟4

5. 飲完一杯之後,可以再加熱水繼續泡飲,可以直至味道變淡為止~

失聲
步驟5

坦白講,其實入口第一下都真係有點難受,可能我仍然係諗住佢嘅蜜蜂樣。第一啖飲落,真係覺得好鹹,不過為咗開聲,唯有頂硬上。但飲完第一杯之後,喉嚨真係舒服咗好多,之後習慣咗佢個味道,又唔係太反感,所以我都不停加水,繼續飲左好幾杯呀~

失聲
飲完真係有啲驚喜,起碼把聲都開咗少少,喉嚨唔再痛!

飲完真係有啲驚喜,起碼我把聲都開咗少少,喉嚨唔再痛,所以這個古方對我來講,又真係有效!

PS:病左好幾日,喉嚨痛足咁多日,我都已經睇左醫生食咗三日藥,不過把聲仍然未開返、仍然失聲。為咗要盡快開聲,所以非常時期用非常手段,聽朋友介紹試下啲古方,所以就做咗人生嘅其中一件大膽事,就係飲焗鹹竹蜂啦!我當日早晚飲左各一次,第二日起身把聲又真係開返,雖然唔係話開曬全部,不過都仲叫做可以講到嘢,可以同人傾計同做到我嘅任務,所以話古方都其實係信得過!

溫馨提示:

由於材料都涉及藥材成分,所以每個人嘅體質都唔同,大家記得煲之前了解下自己,或者問下相熟中醫/藥材店職員,呢個古方是否啱自己!

撰文、圖片:小小豬Kinsey

你最關注甚麼健康話題?

更多精選內容