手足口想照返學? 虎媽鬧女:好病唔病考試先嚟病!

手足口想照返學? 虎媽鬧女:好病唔病考試先嚟病!

手足口病係好常見嘅幼兒傳染病,夏天(5至7月)更加係高峰期!由於病毒可藉由社交傳染,所以衛生防護中心都不是提醒家長,如果小朋友一旦患上手足口病,就千祈唔好返學,留喺屋企休息!珍寶珠姑娘早幾日就喺診所遇到一位媽媽,囡囡唔好彩患上手足口,仲想醫生寫紙俾個女返學,因為「下個星期開始考試」。天呀!先唔講明知有傳染病仲返學係幾冇公德心,個小朋友又發燒,手仔同口腔已經生哂粒粒,其實應該好辛苦㗎喇⋯⋯

原文:珍寶豬@診所低能奇觀 (文章得作者授權轉載)圖片:新傳媒資料室、myTVsuper截圖

原文如下:

有日朝早~
有位媽媽帶住小朋友嚟到診所,媽媽問我:「姑娘?可唔可以俾我睇先呀?我哋趕住返學呀」
我:「醫生未返到啊,大概十分鐘左右返,而家都未有人登記,你而家登記嘅就係第一個睇㗎啦」
佢:「咁就好啦,登記呀」
我:「小朋友睇係咪?有冇帶手冊或身分證明文件?」
佢:「手冊呀」
登記時,佢問我:「佢個口生晒粒粒,手都好似有,睇唔睇㗎?」
我:「睇呀~」
佢:「咁係咪可以叫醫生寫張紙俾我交返學校話佢冇事?照返學都冇問題㗎?學校話佢頭先有發燒,要返學就要醫生證明。」

我:「如果佢真係冇事嘅就可以啊,如果有燒或者係啲傳染到人嘅病就唔好返學啦,留喺屋企抖吓啦」
佢:「佢下星期開始考試㗎啦」

我:「如果真係病都冇辦法呀~休息緊要啲」
登記後,佢拖住小朋友行埋一邊坐,同小朋友講:「你一陣入到去見醫生,記得同醫生講冇事唔痛,可以返學知唔知呀?」
小朋友點點頭。
佢繼續講:「我哋努力咗咁耐,溫咗咁耐書唔可以就咁輸㗎,你而家有冇邊度唔舒服呀?」
小朋友指指自己個口。
佢:「嗱,同媽媽講好啦,入到房你係咩事都冇㗎,我哋寫咗張紙就可以繼續返學㗎啦」

小朋友點頭。
診症後,小朋友係患上手足口…
佢喺醫生房求咗醫生好耐,求醫生寫張可以俾佢小朋友返學,證明佢冇任何病嘅紙…
到佢哋出嚟等拎藥時,佢捉住小朋友:「你點解好病唔病而家呢個時候先病呀?你知唔知你咁病一病咩都俾你搞禍晒呀?」

小朋友冇出聲。

佢繼續講:「真係有冇搞錯,病咋嘛,病唔駛讀書唔駛考試呀?都唔知點做醫生,病又點呀?病可以全世界停低啦?」
我:「太太可以攞藥啦~呢啲藥水全部都係每日四次嘅,呢枝有痛有發燒都可以食,需要時服啦。小朋友個口應該好痛㗎,盡量飲多啲水同食流質嘢先啦~休息多啲呀」

佢:「真係唔可以返學呀?」
我:「唔得呀~佢而家返學會傳染埋俾啲同學仔㗎,考試可以補考㗎嘛?俾佢好好抖吓啦」
佢捉住小朋友急急離開診所。
隱約中…我聽到句『我哋而家返學校問MISS啦』
那張原本不是屬於你的成績表似乎比你的小朋友更重要。

關於手足口

眾所周知手足口病的病徵包括發燒、喉嚨痛,大約發病的第二天會發現口腔及喉嚨有潰瘍,而手及腳掌亦會發現紅疹及水泡,其實並無藥物可以根治,不過一般來說會於一星期後自行痊癒。

手足口病傳染力極高,經常以爆發的形式出現(即多個患者從同一源頭感染)。由於此病主要病徵,包括口部的潰瘍及皮膚上的紅疹,要在發燒後2至3日才出現,有時在發病初期連醫生都檢查不到發燒的原因,直到口腔出現明顯潰瘍才能斷症,家長應在兒童發燒時加倍留意。

由於手足口病具有高傳染性,而病毒又能在患者的糞便維持數星期,除了要注意個人衛生外,如證實患上腸病毒71型的學童,為人為己請放假放足兩星期,以免一返學便爆發感染危機。

更多精選內容