張智霖袁詠儀18年恩愛如初 魔童長大 夫妻重拾二人世界
撰文、圖片：東方新地｜編輯：Sunday Kiss
張智霖袁詠儀偶有風浪 惡妻形象外剛內柔
夫婦關係一凹一凸最完美，袁詠儀與Chilam結婚十八年並非無風無浪，不過靚靚識得軟硬兼施，馴服Chilam零難度。隨著13歲的兒子魔童（張慕童）漸漸長大，踏入青春期有自己的社交生活，不再做裙腳仔跟出跟入，靚靚終於把時間與精神放回Chilam身上，近年夫妻檔北上做真人騷，有錢搵之餘，更讓夫婦二人重拾拍拖感覺，鏡頭前的Chilam，對老婆靚靚非常溫柔，而靚靚原來亦非常著緊 Chilam，一次單獨去旅行更在鏡頭前聲淚俱下，說沒有Chilam很不習慣，可見平時一副惡妻形象的靚靚，其實是外剛內柔。
留港過二人世界 當街抹嘴甜到漏
近年靚靚忙於北上搵銀，難得最近稍為得閒，而Chilam亦只有賀歲劇《非凡三俠》在身，夫婦二人趁空檔留港，日前到大坑搵食， 靚靚食飽飽悠閒歎番杯咖啡，而Chilam就大細路上身食雪糕，各取所需。現場所見，靚靚與Chilam雖然冇拖手冇親密的身體接觸，但一切盡在不言中，二人甚有默契邊行邊食，期間靚靚突然撒嬌要老公餵食雪糕，見Chilam食到一嘴都係，便出手幫他抹嘴，這些甜到漏的場面在真人騷都睇唔到。
袁詠儀脈搏紋心冧老公 張智霖唔紋身但「紋心」
記者更看到靚靚在右手腕脈搏上紋了的心形圖案， 有指這紋身是用來冧Chilam，據知情者透露：「靚靚身上嘅紋身唔多，前腰上面有個紋咗好多年，嗰個喺台灣紋，佢見到藍心湄紋咗個好靚，所以佢就叫心湄帶佢去紋，不過佢冇逼Chilam去紋一樣嘅圖案做紀念，因為佢認為紋身係好個人嘅，佢陀魔童時個紋身畀個大肚撐開咗，第一次出關見人露腩仲畀人笑係『腩中龍』。近年佢同 Chilam愈來愈sweet，去年突然走去紋咗個細心喺右手手腕脈搏位置，係紀念佢同 Chilam嘅愛情。」
張智霖袁詠儀夫妻檔北上搵真銀保守估計身家過億
Chilam與靚靚15年開始合體北上做真人騷吸金，頻頻以夫妻檔亮相內地綜藝節目，收入豬籠入水，有指他們參與《一路上有你》第二季、《一年級畢業季》共收入約六千萬人民幣；拍攝電視劇《求婚大作戰》收八百萬，再加上拍食品、護膚品與寢具等廣告，又收三千五百 萬，保守估計至今已搵過億人仔。17年他們以首次置業身份以近億元購入大坑豪宅作自住單位，靚靚亦透露日後會再睇樓買樓。
