拍拖24年由同學變靈魂伴侶 52歲蘇玉華入紙嫁潘燦良

May 12 2020 - 17:01

52歲藝人蘇玉華與憑住《逆流大叔》入圍金像獎最佳男配角的53歲潘燦良，愛情長跑跑足24年。兩人一同就讀演藝學院志趣相投而拍拖，既時情侶又是拍檔，二人於本月5日終入紙登記註冊結婚﹗

2014年求婚成功

蘇玉華和潘燦良識同是演藝學院同學，大家志趣相投而拍拖，畢業後同進香港話劇團，後來蘇玉華加入無綫，而潘燦良一直是劇團台柱有「劇團王子」之稱，2016年蘇玉華離巢無綫，後來兩人以情侶檔合作舞台劇。拍拖多年，不時被追問何時結婚，二人回應時，都指對方是自己的靈魂伴侶，一早已把對方當作家人，有指潘燦良2014年已經求婚成功，但之後卻未有下文，蘇玉華曾表示：「結婚儀式我哋可以做，不過我哋又覺得依家幾好，而且我又好懶，所以又冇去做呢個行動，其實我哋都認定對方係另一半，結婚對我哋唔係咁重要。」二人共走過24年歲月，直至近月疫情爆發的時候，下定決心入紙申請註冊結婚，正式成為潘太﹗

拍拖24年依然專一未嫌悶已經夠難，仲要繼續話題多多兼似熱戀期小情侶一樣就難上加難，唔怪得之蘇玉華成日形容另一半潘燦良係soulmate，真係行段路仔，都可以講咗人哋兩公婆一年對話！

蘇玉華笑到彎晒腰

話說年前喺大坑醫完肚去攞車，兩步路、最多咪三分鐘行完一截路，蘇玉華同潘燦良竟然行吓又停吓，好傾好講、激烈討論到行咗成三十分鐘。兩人相處重點係，唔會敷衍對方、又唔會一個講晒，而係有溝通、有互動，充滿火花又氣氛融洽，周不時仲見到蘇玉華一副崇拜咁個樣仰望男友，24年喎！真係唔容易！

蘇玉華同男友潘燦良日前醫完肚去攞車，相處24年、食完成餐飯都未講完，途中繼續興致高昂傾不停。

拍拖24年，竟然都不斷有話題、仲識笑到彎晒腰，唔講以為呢對係熱戀期少男少女！

情侶檔舞台劇再公演

拍拖同居咁多年，感情如一，話題不斷又可以孖住開工，真係唔係每一對情侶夫婦做得到。之前蘇玉華和潘燦良情侶檔舞台劇《謊言》再度公演，不少圈中人去捧場，當中視后田蕊妮、唐詩詠都走去偷師！

蘇玉華同男友扮路人

不過話晒都老夫老妻，都唔係時時都咁好傾！有「劇團王子」之稱慨潘燦良同蘇玉華拍拖24年，本刊記者曾經遇見佢哋孖公仔現身觀塘，兩人泊好車後分頭去買嘢食，阿蘇去買三文治，潘燦良就去茶餐廳買飯盒，之後佢哋喺茶餐廳門外會合，阿蘇全程揸住部電話做低頭族，同潘燦良就好似陌生人咁一前一後行上一座工業大廈，期間完全零交談連眼神都冇，唔通感情已經升華到唔使講嘢都一樣咁好默契？