本尊就位｜孔德賢克服畏高挑戰「懲罰風箏」 洗走緋聞污名獲TVB力捧

神棍孔德賢被綁上「懲罰風箏」

另邊廂，呂祖廟發生少女譚姑娘（羅雪妍飾）離奇浴血事件，受了賄的木昆原本與富二代利厚德（謝可逸飾）勾結企圖助其脫罪，及後良心發現「改口供」致厚德入獄，利老爺（煒烈飾）盛怒下將木昆綁上「懲罰風箏」一飛冲天，令木昆「飄」至五房族鎮；與此同時，五族房鎮疑似有山妖作亂，就在眾人盛心祈求呂祖出手捉妖之際，木昆拖著失蹤人士現身，因而被誤當真‧神仙…昨晚首播後，有網民指劇情輕鬆惹笑適合新年期間播放，並直指孔德賢有鄭嘉穎影子。

孔德賢自度反白眼打冷震小動作

其實孔德賢（Danny）在首集相當忙碌，除了「偽扶乩」時反白眼、打冷震及要朗讀古詩外，還要凌空整個人撲向飾演花魁白雪花的陳嘉慧，之後又要孭著陳嘉慧通山跑，絕對是體能大考驗。談到扶乩戲份，Danny 坦言事前有專誠找道士學：「我托朋友幫手搵咗間道館，再向嗰度嘅道士了解到底做呢啲儀式係點，佢亦都親自示範咗一次畀我睇。至於打冷震同反白眼，係我自己加上去，因為想突顯番呂祖上身嘅劇情。」談到「偽扶乩」場口要唸大量古詩，Danny 笑言：

「好好彩我以前係綜藝出身，做主持工作要背好多稿，同埋我以前好鍾意背中史，背書都 OK，拍嘅時候導演都好驚訝我咁長嘅對白都背到。」

談到「懲罰風箏」，Danny 透露是劇組事先為其度身訂造，並透露拍攝「飛天」場口很難忘：「因為係喺廠嘅綠幕度拍，呢個經驗對我嚟講好新鮮，同埋嗰日吹咗好耐風扇扮喺天度飛好搞笑。」至於「從天而降」一幕，Danny 坦言某程度要克服心理障礙：「我一去到現場，導演同武指就叫我陣間要喺棵樹度跳落嚟，因為我本身好驚玩機動遊戲，對於高空嘢係非常之驚，咁我當時都唯有頂硬上。其實呢個動作真係都幾高難度，因為我要跳落嚟再直接責落陳嘉慧度，好彩兩個都冇受傷，武指指導得好好。」

多套重頭劇集做男配角孔德賢洗甩醜聞重新出發

去年《你好，我的大夫》劇中飾演進修中醫師學徒彭晴望的26歲孔德賢，入行短短6年就獲無綫力捧升做男一，不過他亦曾捲入醜聞而令形象大插水！

「翻版羅仲謙」孔德賢棄做工程師入行追夢

現年26歲的孔德賢（Danny）在2017年憑清談節目《#後生仔傾吓偈》出道，入行時因為外表與羅子溢（前名羅仲謙）相似，所以被封為「翻版羅仲謙」。孔德賢在香港理工大學修讀建築工程及管理學系學士課程。不過自小對演戲有興趣的他，毅然放棄高薪厚職，選擇入行拍劇做主持。

無綫力捧極速上位《本尊就位》擔正做男一

孔德賢入行後立即或委派主持多個節目，包括《今期流行》、《Ben Sir睇樓團、《香港原味道》、《識貨》等。在2020年更開始拍劇，曾經參演《香港愛情故事》、《法證先鋒V》、《法言人》等劇集，還有兩套劇集《本尊就位》、《新聞女王》兩套劇未播出，工作一浪接一浪，在民初劇《本尊就位》更擔正做男一，明顯深受TVB力捧，前途可謂一片光明。

孔德賢曾被指介入廖慧儀戀情 形象一度大插水

不過孔德賢在剛剛開始上位當時，曾經被捲入「狂野空姐」廖慧儀前度輕生風波。當時有傳孔德賢與廖慧儀在拍攝《#後生仔傾吓偈》時撻著，廖慧儀前度Sam更在IG發文公審孔德賢，警告他不要再找自己女朋友。事後Sam更疑似因受情困而墮樓輕生，令孔德賢和廖慧儀形象一度大插水、齊齊入雪櫃，二人更雪足一年始獲解凍！

「琵琶仔」區明妙身世可憐

昨晚另一亮點，是飾演「琵琶仔」蝴蝶的區明妙，身世可憐的蝴蝶，未成年便被賣往妓院，及後在雪花幫忙下企圖逃離妓女生涯；可惜逃亡期間一波多折，更遭山妖「活捉」。年紀輕輕便從演經驗豐富的區明妙，是次是繼 2019 年《福爾摩師奶》後，第二度以民初造型拍劇，雖然相隔只有五年，但明妙已由短髮妹妹仔、變成現在少女味濃的長髮姑娘，Image 方面新鮮感十足。

區明妙將有鬈髮旗袍 Look

妙妙受訪時亦坦言喜愛劇中長髮造型：「因為細個都好鍾意睇啲仙俠劇，鍾意裏面啲長髮造型，印象中今次個造型冇試好耐，因為個角色比較貧窮，所以造型比較簡單。」據知妙妙除了長髮少女 Look，之後還會以成熟鬈髮旗袍 Look 亮相，不過妙妙笑言未有因而刻意節食：

「之後嘅旗袍造型就會比較成熟少少，好彩啲旗袍唔算超級貼身，所以都冇特別減肥。鬈髮造型最難忘應該係每次開工要戴頭套，之前多數都係時裝劇，好少要戴頭套，加上我頭髮本身比較多，所以長時間戴住都會有少少唔舒服。」

想一睹妙妙難得一見的旗袍 Look，密切繼續留意《本尊就位》。