37歲李佳芯陳炳銓拍拖6年陪伴走過低谷 進駐西貢千萬獨立屋催運 坐正風水龍脈

李佳芯獲男友做心靈密友

李佳芯簽無綫8年來機會不絕，坐穩一線花旦的Ali去年卻因網上言論而令事業受挫，據知情者透露：「Ali從來都係有嗰句講嗰句嘅人，就係咁輸蝕囉！經過呢次教訓，以後都會慎言。喺呢段時間，Ali依然冇停低，繼續增值自己，佢男友Danny（陳炳銓）亦非常支持畀好多鼓勵佢，同佢分析形勢同以後嘅路應該點行，拍拖六年嚟佢哋都好著重心靈溝通，真係打風都打唔甩。」

進駐西貢白沙灣獨立屋 坐正風水龍脈

Ali與陳炳銓被封美女與野獸的結合，由於二人效力敵對的電視台，拍拖初期已傳出無綫施予壓力，但事實證明Ali對男友矢志不渝，更排除萬難發展至同居，早年本刊影到他們在西貢夾錢租住村屋，之後再搬去將軍澳清水灣半島，到近月Ali與陳炳銓已進駐西貢白沙灣的獨立屋，愈住愈富貴，切合Ali視后身份。知情者透露：「Ali同Danny三年前養咗隻唐狗豆豉，搬上樓之後，佢哋覺得放狗好唔方便，再加上Ali事業有阻滯，所以就搵咗依家住嗰間西貢獨立屋，Ali雖然被放入雪櫃一段時間，但佢搵錢能力唔弱。今年四月ViuTV冇再同Danny續約，但佢依然繼續有劇拍同做幕後，都仲有好多Job，出面又開班教演戲，唔係坐食山崩！聽講佢哋依家住嗰度風水好好，入住冇耐Ali已經收到《殺手》會上，公司仲幫佢安排咗好多宣傳工作，就算唔可以拍合拍劇，香港市場都夠佢發圍！」

本刊記者搵來著名玄學家吳佩孚，對於Ali位於西貢的新居，吳師傅表示原來該處有個傳奇：「嗰度有間車公廟，以前賴布衣去過，仲點咗個穴叫『虎下明塘』，附近山形好似五隻老虎向下，咁啱盤地就係呢個屋苑所在，照山形地勢嚟睇，嗰度人傑地靈，旺人緣、旺丁同埋旺事業，做藝人就會有觀眾緣，姻緣會好，亦催旺生兒育女。再睇屋前景觀，門前開揚遠景望山，西貢附近山脈壯大，搵錢容易，所以西貢亦特別多藝人鍾意住。」

李佳芯孖男友貼地拍拖放狗

既然計劃趕不上變化，37歲的Ali順著前路走，與陳炳銓築起愛巢養狗為樂，近幾年Ali都喜歡去西貢市拍拖兼放狗，早前被迫停工，本刊記者亦影到Ali與陳炳銓貼地放狗，視后經常素顏幫襯茶餐廳同西貢海鮮酒家， 繼續做回真我。做藝人一命、二運、三風水，事實證明Ali甚有觀眾緣，希望新居真的為她帶來好運，過完冷河繼續發光發熱。