林作半山複式豪宅私藏裕美曾裸體求婚富媽媽指未夠班入門

Jul 2 2020 - 13:32

現年30歲的林作身兼多職，曾任兩年執業大律師，又曾半隻腳踩入娛樂圈，客串過網絡電影，演過舞台劇。近年加入遵理做補習老師，就連KOL、移民專家及保險經紀都做埋。早前，林作與失婚31歲裕美戀情曝光後，二人高調認愛！然而，因為二人背景差異，不被外界睇好，甚至林媽媽直指「未夠班入門」。兩口子一段感情曝光不足十日，日日都有新進展，裕美又自爆已收下男友鑽戒、承認獲對方多次求婚。未過門「婆媳關係」經已勢成水火，睇嚟平時伶牙俐齒轉數奇快嘅林作，今次都真係有排煩囉！

原文刊於：東方新地

裕美被嘲林作頻頻出post反擊

外人說三道四其實又使乜咁認真，不過一向行徑冇定向估佢唔到嘅林作，一而再出千字文為新歡護航，戀情曝光短短幾日已狂 po 超過十五條 IG ，逐一反擊新聞報道、網紅評論甚至網友私信。護花心切、神經緊張到一個點，好似網絡作家葉朗程咁啱有文提到，有錢有家世有學歷醫生兒子被妖氣所吸，名門之子竟然與「膠門」都不是嘅學渣行埋時，林作聯同裕美都對號入座出文反擊。係真愛至上完全唔介意旁人指點，定係太介意呢？就真係見仁見智啦！

牛津畢業生、港大碩士、清洪徒弟兼且有個學霸港姐冠軍前度，林作最近被爆與裕美拍拖一年，兩人是否匹配即時成為全城熱話。

其實一度份屬同公司藝人，又多次被踢爆裕美多張相片背景係林家豪宅，林作撻著裕美並非新鮮事。

會考零分、曾經離婚、當年未同前夫了斷已經搭上藝員黃子恆，呢一切都係裕美嘅黑歷史，唔少網友認為新歡背景家底才貌，都遠遠不及林作舊愛麥明詩。

外間說三道四林作會一一反擊，不過對於媽媽親口表明唔接受裕美做新抱，如未婚生子更索性斷絕關係，態度強硬連林作都無可奈何。

林母指裕美未夠班婆媳勢成水火

兩口子一段感情曝光不足十日，日日都有新進展，與林作前度比較完，又被外間比較家世，一一反擊網友撩交嗌後，真正難關其實都係林作嗰位富媽媽王莉妮 (Lily)！一直有報道指 Lily 唔接受兒子新歡一事，最新發展係兩母子接受傳媒訪問，林媽媽講到明拒絕裕美入門做新抱，仲話就算奉子成婚都行唔通，一陀 B 就立刻同林作斷絕母子關係，完全冇商量餘地咁話！裕美又自爆已收下男友鑽戒、承認獲對方多次求婚，甚至裸體求婚，裕美就話林媽媽咁諗係好正常，希望Auntie 畀啲時間去認識佢，唔好單憑新聞報道就判佢死刑喎！未過門婆媳關係已經勢成水火，睇嚟平時伶牙俐齒轉數奇快嘅林作，今次真係有排煩囉！