萬千星輝頒獎典禮2023｜林子善奪男配激動跪地叩謝 2大伯樂功不可沒
林子善跪地淚崩 2大伯樂功不可沒
此獎項由元華及朱咪咪頒發，得悉獲獎時已變「喊包」的林子善一上台即下跪，並喊住講感受：「好多網民唔鍾意我喊，其實我真係唔鍾意喊，頭先嗰一跪係跪我父母嘅，因為冇我父母，呢個世界就唔會有林子善。唔好撩我，一生人得一次，其實我想攞《飛躍》，因為仲可以攞多次男配角。我唔係TVB親生仔，但我當TVB係屋企，流住TVB嘅血，多謝帶我入行嘅周星馳，當時我最冇嘢做，係曾志偉帶番我入電影圈。」
朱咪咪1句話令全場爆笑
林子善夠晒長氣，未理會現場工作人員及負責頒獎給他的朱咪咪催促，子善因難得拎獎，於是叫大家不要催他。朱咪咪見他多謝外父外母時，忍不住笑問「請問你嘅家族有幾多人」，令現場觀眾爆笑﹗
林子善自爆投票唔係投自己
林子善憑《隱形戰隊》入圍今年頒獎禮的「最佳男配角」，與不少「猛人」例如視帝陳山聰、譚俊彥、備受力捧的何廣沛、以及令觀眾眼前一亮的鄧智堅、馬貫東等人，力爭做「最佳男配角」！ 林子善早前接受訪問時就自爆今年會投票給馬貫東，仲大讚對方演戲十分好睇：「雖然同我唔係話好熟，但係我都好欣賞某啲演員，好似馬貫東啊。我直程兜口兜面同貫東講我好鍾意睇你演戲，所以我今年可能投比馬貫東！」
林子善演活「喊包」角色
在劇集《隱形戰隊》中飾演「喬帶囡」，是一名因工受傷導致跛腳的警員。在第20集時劇情講述林子善得知自己跛腳的真正原因，導致情緒崩潰，哭到歇斯底里一幕被網民盛讚：「囡囡越來越好戲，心中內疚的內心戲，非常出色，見到佢喊到鼻涕直流，演技無懈可擊」、「子善呢場戲超好，個崩潰好貼切，入戲入到暈」、「他應該得最佳男配角！無線搵對人！」、「呢集林子善演技大爆發，某程度更勝兩位視帝！」
林子善默默耕耘25年終成功「入屋」
林子善自1998年起開始活躍於幕前，在25年間拍攝了不少電影，包括周星馳主演的電影《喜劇之王》、《少林足球》以及《功夫》等，演盡無數毫不起眼的小角色，且星路平平。 林子善在2005年加入TVB後參演了不少深入民心的劇集，包括《鐵馬尋橋》、《怒火街頭》、《城寨英雄》、《金宵大廈》，以及去年播出的《隱形戰隊》等等。林子善在每部作品中都將演技發揮的淋漓盡致，終成功「入屋」，逐漸成為大家喜愛的演員。
