萬千星輝頒獎典禮2021|李佳芯深度感言獲激讚 竟與三年前攞視后相呼應

娛樂

《萬千星輝頒獎典禮2021 》出爐視后視帝成全晚焦點,「最受歡迎電視角色」亦是大家眾焦所在,李佳芯憑《愛美麗狂想曲》奪「最受歡迎電視女角色」,一番深度感言令網民津津樂道,更被發現毫無準備的感言,竟然同李佳芯在三年前首贏視后時感言相呼應,果然有心﹗

文:東方新地|圖:無綫娛樂台截圖

萬千星輝頒獎典禮2021|李佳芯驚訝有獎攞

《萬千星輝頒獎典禮2021》圓滿結束,去年李佳芯在《智能愛人》飾演Ai機械人「阿寶」演技出色又感動人心,但卻是以《愛美麗狂想曲》的「王麗美」獲得「最受歡迎電視女角色」,連李佳芯聽到台上吳卓羲和黃宗澤宣布自己得獎時都表現驚訝,上台時坦言:「冇諗過今日有奬攞﹗」

 萬千星輝頒獎典禮2021 李佳芯
《萬千星輝頒獎典禮2021》吳卓羲、黃宗澤宣布李佳芯獲得「最受歡迎電視女角色」時,鏡頭影住的李佳芯一臉愕然﹗(圖片來源:無綫娛樂台截圖)
 萬千星輝頒獎典禮2021 李佳芯
《萬千星輝頒獎典禮2021》 李佳芯獲「最受歡迎電視女角色」,大家都戥佢高興,李佳芯卻一臉惘然,事後受訪時表示:「打算全晚做一個好投入嘅觀眾,冇諗過有得上台攞獎﹗」(圖片來源:無綫娛樂台截圖)

萬千星輝頒獎典禮2021| 李佳芯相隔三年再上頒獎台感受良多

李佳芯12年約滿有線後過檔無綫,首次奪得「最受歡迎電視女角色」,李佳芯上台時話:「冇諗過今日有獎攞,我對上一次企呢個台攞獎係三年前,三年前同依家有好大分別,個世界同依家好大分別,個人同依家都好大分別,首先係三年前冇live band,今日有live band個氣氛感覺好好,多謝你哋﹗」全場拍掌﹗

 萬千星輝頒獎典禮2021 李佳芯
《萬千星輝頒獎典禮2021》李佳芯憑《愛美麗狂想曲》奪得「最受歡迎電視女角色」。(圖片來源:無綫娛樂台截圖)

感謝幕後:做多做少看在眼裡,多謝你哋

李佳芯其後話:「呢個獎係我最想攞嘅,我係要透過攞呢個獎先可以真係多謝一班無條件去支持同愛我嘅人,包括我嘅屋企人,包括一直喺身邊好支持我人,我要多謝台前幕後,好想趁呢個多謝你哋因為呢三年裡面我每一次拍劇我都係爛面,每一次都要靠camera man去就個鏡,要打燈幫我打番啲皮膚滑,每次化妝睇mon再同我補妝,你可以話係佢哋嘅份內事,但當你每一日拍到朝頭早先收工嘅時候,做多做少看在眼裡,我係感受到,多謝你哋﹗」

 萬千星輝頒獎典禮2021 李佳芯
李佳芯感謝幕後工作人員﹗(圖片來源:無綫娛樂台截圖)

李佳芯揞心口:呢兩年過得唔容易

李佳芯最後講到:

「好多謝每一個行埋嚟話好鍾意我個角色嘅觀眾,個角色可以活喺你哋個心裡面,呢兩年唔容易,相信大家都過得唔容易,我要多謝埋自己,因為每晚撳住個心同自己講,『會好㗎,會得㗎』,每日就係咁樣過﹗我會繼續去學習,繼續蛻變,會有更加好嘅Ali﹗」

 萬千星輝頒獎典禮2021 李佳芯
《萬千星輝頒獎典禮2021》上李佳芯話呢兩年過得唔容易﹗(圖片來源:無綫娛樂台截圖)

李佳芯最後一句別出心裁

李佳芯的感言不但感動現場,更獲網民大讚有深度,而最後一句「會有更好嘅Ali」,正與三年前李佳芯憑《BB來了》首奪「最佳女主角」時,台上感言中講到「會有更好嘅Ali﹗」互相呼應﹗網民大讚有意思有深度,紛紛留言:「果然係才女﹗」、「出過散文集係唔同啲﹗」、「Ali喺TVB真係好另類好脫俗。」、「Ali畀人雪咗咁耐,都唔怕去表達自己內心感受,值得尊敬﹗」。

有片﹗李佳芯深度感言足本版:

 李佳芯出席《萬千星輝頒獎典禮2021》晚裝好密實,但之前影大會場刊時穿上大露背,好養眼﹗
李佳芯出席《萬千星輝頒獎典禮2021》晚裝好密實,但之前影大會場刊時穿上大露背,好養眼﹗(圖片來源:TVB)
 李佳芯影大會場刊時的造型﹗
李佳芯影大會場刊時的造型﹗(圖片來源:TVB)

重溫:2018 | 最佳女主角奪視后感言:

「我想講我其實唔係一個贏在起跑線嘅人,我從來唔知咩係前人種樹、有庇蔭嗰隻感覺我唔知係點!我只係一嚿飯,我只可以努力咁靠自己做好每一個角色,做好每一樣眼前應該做嘅每一樣嘢,我淨係知道要成功嘅我只可以靠我自己,所以如果大家會覺得行到好攰,行到好氣餒嘅時候,希望大家記得唔係得你自己一個,有好多人都係默默咁行緊呢條路,你唔係自己一個人。」

「我唔係好叻,我做任何角色、崗位都會仲有好大進步空間,我希望大家可以比時間我繼續進步,會有更好嘅Ali,我相信,多謝大家!」

當年李佳芯憑住《BB來了》嘅唐恬兒呢個角色得到視后!觀眾都好鍾意《BB來了》!真係夠曬貼地!Ali bb又靚女又好戲呀!!真係好值得攞呢個獎呀!觀眾都好為佢開心!

你又點睇?

更多精選內容