韓君婷飽歷滄桑兩度痛失摯愛 與共患難多年蔡國威反面 46歲宣布破產靠自己

韓君婷初戀因癌逝世 曾患厭食抑鬱暴瘦

韓君婷是英國裔及華裔混血兒，她在年青時曾經在《Yes!》雜誌的「城市驚喜」環節中亮相。1997年，她成為亞姐亞軍，但因原冠軍得主朱燕珍隱瞞婚姻狀況被褫奪后冠，讓她躍升為冠軍，於22歲出道。多年來，她的身形不斷變，曾在最重磅之時被冠上難聽的外號，之後成為纖體公司代言人，以最弗身材示人。入行八年，她先後效力過亞洲電視及TVB，拍過《我和殭屍有個約會2》、《肥貓正傳2》、《窈窕熟女》、《皆大歡喜》等劇。10年末，她暫時退隱，之後移居新加坡，幫助兄長打理生意。

多年來，她的樣子甜美性格率直，形象都是鬼妹仔、大笑姑婆，但這二十年來的人生經歷卻令她嘗盡別離傷痛：初戀男友是著名髮型師葉錦昌（Sherman），98年熱戀期間Sherman發現患上肝癌，當年她經常陪伴男友出入醫院，不離不棄。韓君婷曾透露男友已向她求婚，可惜最後天人永隔。她一直未有放低Sherman，其後拍拖多次都無結果，可惜其後因感情事患上厭食問題，要暫別娛樂圈，甚至曾患上抑鬱，花了兩年多時間治療。那段時間她收埋自己，演藝事業被迫煞停， 直至在新加坡生活的父母與哥哥叫她返去養病，她再次重投家人的懷抱。

最愛母親去世一蹶不振

在新加坡生活了差不多四年，韓君婷決定返港，於14年回流香港重新投入娛樂圈，其母不時由新加坡來港照顧她，2020年更決定留港生活，可惜天意弄人，韓母卻發現肺癌已到末期，又被甲狀腺病纏身，侍母至孝的韓君婷當時辭工陪伴母親行最後的路。前年6月，韓母走後，她需要很長時間才能接受事實。

早前韓君婷踩單車去和合石拜祭亡母，見她一早去買花買祭品，帶了一袋二袋去到母親的龕位前，細說自己的近況，雖然對空氣說話，但卻感受到她與母親的深厚感情。趁著韓君婷離開時，記者上前採訪，她亦大方回應，表示一有時間就會去拜母親，對於母女最後相處的時光，韓君婷感受至深：「照顧媽咪最後嘅路，我深深感受到愛一個人，除咗細心照顧，仲要有好多原諒同包容，我提佢食藥，佢會嫌我煩，我哋成日有拗撬，不過兩母女最後都會無事。我返香港選亞姐入行嗰段時間，家人唔喺身邊，原來我忘記咗家嘅感覺，親人就係開心共處，有拗撬但又會氹番大家，係佢令我重拾呢種感覺。」

為照顧母親，韓君婷近年花了很多時間，她承認母親臨終前最擔心就是她，她說：「有時佢會覺得因為我要照顧佢，所以唔出去識男仔拍拖，我同佢講我唔係掉低自己嘅感情，只係未係時候，當我準備好，就會去追求自己要嘅嘢，佢都明白遇唔啱就唔好勉強。媽咪雖然擔心，但佢都放心，佢向來對我好有信心，亦知道咁多年嚟我要做到嘅事我一定會做得到。我哋兩母女性格都好強，我好似佢，唔會開口埋口講愛，但我哋會直接行動，佢會拖住我隻手講：『聽日我想自己行吓，不如你都去玩，唔好咁早返屋企！』有時大家挨住大家，拖住慢慢行，已經感受到愛。」

不介意做醜角 捨棄女神光環

事隔多年，韓君婷重返演藝事業亦遇上不少阻滯，難得她仍抱住百分百的正能量，揚言甚麼角色都願意嘗試，「工作方面我係向前望，依家主要接啲司儀同主持工作，如果電視台有角色容納到我，我都好願意去拍，我知道靚女角色已經唔輪到我，做醜角、做 人阿媽、要執紙皮嗰啲角色我都ok㗎！我已經掉低晒所有包袱，以 前嗰啲冠軍、鬼妹仔、女神，好高嘅位置， 搞到自己條路窄咗，依家我可以做唔同範 疇嘅嘢，希望用演技令大家另眼相看。」

除了積極回歸幕前，韓君婷在社交網亦非常活躍，不時自拍下廚短片放上 網，分享整麵包、蛋糕及各國美食，實行轉型做美食KOL，原來她自小對烹飪便非 常有興趣，現在更會自家鑽研食譜，落手落腳擺好機位拍攝之餘，就連拍片剪片都親自做，其實韓君婷周身刀，不靠樣子一樣可以殺出新血路。

慘遇意外遭嘲笑有執樣

當年返港後正式露面的韓君婷，面容有變，本來甜美的樣貌，因為塌鼻而被指變得怪樣，更有指她「執樣」失敗，為此韓君婷已多次澄清是因為在浴室滑倒而令鼻骨嚴重受傷，最不幸是入院醫治時被細菌侵蝕，萬中無一的意外令她的鼻變成這樣，靚樣一去不返。

韓君婷已懂得學會接受不完美的自己：「人係會有高低起跌，對於過去嘅嘢，我學識接受。之前個鼻搞到咁，喺香港無一個醫生完全有信心可以整番好，早前終於畀我搵到個美國醫生，但媽咪嘅醫療費用花費好大，而去美國做手術要好多錢，我暫時唔能夠負擔得到。其實遲啲整都唔緊要，以前我個樣可能有100分，依家得70分都ok嘅！我會勤力啲做嘢搵錢，希望儲到錢可以整番好個鼻。其實之前我做咗一個皮膚增生療程，做完之後發現個鼻嘅組織有增生到，依家個鼻有好轉，可能大家亦睇慣咗，順眼番。」

轉型美容達人＋美食KOL

回流香港後，韓君婷曾從事醫學美容行業，成為美容達人，自拍短片幫自己飄眉。但之後她已轉型為美食KOL，不時在社交網上載下廚短片，教其他人下廚，似模似樣，絕對是入得廚房。

認有打針不介意其他人評論：我有錢想點用就點用

韓君婷曾出席醫學美容活動，問她是否想做美容界網紅？韓君婷：「一半一半啦！因為係幫公司做嘢，身份都有啲特殊，有時出席活動都要做一啲幕後工作！」談到打肉毒桿菌效果，韓君婷表示：「今次係去眉心皺紋，效果好好，打咗幾次大家都唔覺。」問到有沒有其他想改善嘅地方？韓君婷：「坊間啲人最想打晒成塊面，但我唔想做到零皺紋，咁樣太假，所以我同醫生講眼角位一定要keep番少少紋，唔係笑起上嚟就會好假！」

韓君婷話可以接受「執樣」，亦不介意其他人的評論：「其實你做咗啲咩嘢、無做啲咩嘢，唔輪到人哋去評論，當你能夠肯定自己、相信自己嘅時候，就會去話番畀啲人聽：『It’s not your business！我有錢、我想去做，錢係我勤力搵番嚟嘅，我可以點樣去用就點樣去用囉！』」

與同居密友蔡國威反目成仇欠債40萬元宣布破產

韓君婷於上年被爆出欠債40萬元，要宣布破產，她自辯因為早年要照顧患病母親需支付龐大的醫藥費才欠債，媽媽過世後她又因疫情失業，一度零收入，無力還債。同年，她又跟同居兩年的密友蔡國威鬧翻，被指遭對方迫遷受盡打撃，導致雙方關係破裂。

不過原來與蔡國威相識多年，蔡國威在社交網站上指自己可以對着燈火發誓從來沒有說過「你究竟幾時搬走」，反指是韓君婷自己提出要搬離住所。他又指多年來從未要求韓君婷給自己家用，而韓君婷每月會「放低一千蚊，有時多五百」，而這些都不是自己要求的。最後更稱「做朋友都仁至義盡」，可見兩人感情不再。隨後韓君婷在自己的社交平台上寫：「我不想再包容你去講大話去傷害我。我不會好似別人製造新聞，傷害人讓自己出位。人生就是過眼雲煙，我只會做好自己正面去面對未來。」疑似反擊蔡國威的指控。

如今她靠自己努力賺錢，除了在網購平台兼職帶貨，還於梁思浩頻道做主持。搬屋後也似乎桃花運極旺，早前她曾在網上分享跟一位外國小鮮肉去淺水灣玩的照片。