馬賽無悔戀汪子琦 專訪重溫派金句：「孽緣都係緣 」

馬賽談2016移居北京新開始

鄭紹康（鄭）： 你近況係點？
馬賽（馬）： 我搬咗去北京長住。
鄭： 慣唔慣？
馬： 啱啱去嘅時候有少少孤獨，但都慣嘅，因為嗰邊都有朋友。加上我會去電影學院旁聽，啱啱又搞咗自己嘅工作室，俾自己適應新環境，鍛鍊吓自己。

馬賽回顧TVB七年歷程

鄭： 你喺TVB幾耐？
馬： 喺TVB七年，啱啱完咗合約。
鄭： 覺得呢七年發展點？
馬： 好感謝公司曾經嘅栽培，我讀大學先嚟香港，再選港姐入TVB，TVB等於我第一個接觸社會嘅地方，無論拍戲、做人對我影響都好大。

演藝路上獲肯定

鄭： 攞TVB「飛躍進步獎」嗰陣係咪好開心？
馬： 由細到大我都想做演員，冇諗過參加港姐就做咗演員，入行以嚟好努力，由第一次同阿姐（汪明荃）拍劇，佢話我廣東話講得唔正，話：「你講緊乜嘢？我聽唔清楚你講緊乜嘢。」我好努力學廣東話，同老師對劇本練咬字，得到「飛躍進步獎」嗰年，我仲攞咗雜誌搞嘅「最具前途女藝人獎」，當時覺得有人肯定我做演員呢個職業係好開心，因為我由入行到做演員，屋企人都係覺得我唔得，我爸爸成日打擊我，覺得我又唔係好靚、又唔係特別出眾，當時攞到獎係好開心。

決定離開TVB

鄭： 點解唔續約TVB？
馬： 2010年入TVB，爸爸幫我俾首期買樓、買咗車、請咗工人，所有一切都好平坦，朋友錫我，公司又栽培我，一切都好順利。呢兩年我經過好多嘢、好多體會，所以我想喺出面闖一闖，所以搬去北京，加上內地市場都好大，想換個環境靠自己。

「斷背風波」的影響：好抑鬱！

鄭： 嗰件事（汪子琦斷背風波）係咪一個唔順利？
馬： 今日睇番我係好感恩，當時係好低落、好抑鬱，經歷咗好唔開心一段時間，本來去街所有人都想同我影相，發生嗰件事之後，去到街覺得所有人都唔鍾意我，啲人個個好似獵奇睇動物，嗰刻個心係好難受。我從來冇睡眠問題，嗰時瞓覺3點鐘醒、5點鐘醒、7點鐘醒，食唔到嘢，每日喺屋企寫日記、鑽牛角尖，都係諗唔明白，之後就去睇醫生。

感情與自省

鄭： 最唔開心係感情上嘅挫折定係啲片段流出？
馬： 我覺得係感情，覺得一件事點解突然間所有嘢都變咗，係自己太蠢定思維唔清晰？入行一段時間，事業有少少成績，有啲自以為是，以為自己啱，但其實好多嘢都唔識分析。

人情冷暖：「有啲人見到我好似唔識我」

鄭： 呢件事之後，有冇好多朋友變臉、離棄你？
馬： 有啲人見到我好似唔識我，明明以前同我好熟。
鄭： 電視台裏面都有？
馬： 有試過，唔緊要，我咪好清晰，邊個同我講嘢，對我好嘅人，我會當佢係一世朋友，唔好嗰啲真情假意咪睇得好清楚囉！

屢受媒體狙擊反思生命

鄭： 醫生有開藥俾你食？

馬： 有，精神科嘅藥食嘅時候係好難受，佢令到你放鬆，手會冇力，同埋唔知點解會想笑、好開心，瞓覺嘅時候好似去咗另一個世界，種感覺好虛幻，食咗個幾、兩個月，覺得唔可以咁，嗰時就去佛教國家斯里蘭卡，試吓唔食藥，喺飛機有空少同我影相，喺當地又見到佢，一睇新聞香港傳媒話我又講大話（編按：去年有報道指馬賽事先張揚與女同學外遊，實情是跟空少蜜遊）我冇帶藥，嗰刻我抖唔到氣，覺得我會死喺斯里蘭卡，嗰一刻我明白咗生命就係一呼一吸間，如果唔呼吸就會死。
鄭： 嗰刻有冇諗過放棄生命？
馬： 因為我有朋友陪我去，我覺得要對朋友負責任，同埋諗到屋企人，唔可以咁囉！

鄭： 段感情，令你好傷心？
馬： 有咗信仰之後，知道有啲嘢應該發生就會發生，點樣嘅緣都係緣，孽緣又好，好嘅姻緣又好，都係緣。

憶述淫片流出深受打擊

鄭： 片段流出，係咪好震驚，同埋有冇歸咎係點流出？
馬： 點流出find out唔到，我冇可能評論，我都想像唔到我會咁堅強，發生呢件事，我一個人同公司、屋企人、警察、律師溝通，一個人喺屋企打好多電話，成個幾兩個禮拜冇出門口，工人姐姐照顧我。

家人的支持

鄭： 屋企人support？
馬： 屋企人當然support，但我好內疚，太自以為是，覺得自己有判斷能力，但其實唔係，到依家都要屋企人養我，經濟上都要爸爸支持。

鄭： 件事有冇令你經濟拮据？
馬： 有㗎，屋企人支持囉！
鄭： 成件事，爸爸媽媽有冇講啲咩？
馬： 一路好支持，好proud我咁堅強，當然係咁講，佢哋知道我已經好down，冇可能表現得好憂心。有日我發現爸爸多咗好多白頭髮，佢話：「其實我一半嘅白頭髮都係因為你！」嗰刻覺得其實佢哋真係好擔心。

馬賽回應外界質疑

鄭： 外間人睇，你做第三者介入汪子琦同Laura，亦有報道質疑你同汪子琦一齊係為錢。
馬： 真正了解我嘅人唔會因為呢啲文字誤解我，唔了解我嘅人，其實唔需要太care佢點樣諗，我覺得做好自己，佛教講得最多就係因果，你做啲乜嘢個天係會知。

面對事業低谷與轉機

事業清袋的坦然

鄭： 當其時有冇擔心事業清袋？
馬： 已經清咗袋㗎嘞，哈哈哈！有信仰，我相信一切都係有安排，透過呢啲嘢會完成一個更加好嘅自己，唔需要抱怨。
鄭： 胡杏兒婚禮你有份做姊妹，同杏兒因咩相熟？
馬： 初入行拍頭幾套劇佢做我姐姐，嗰時開始大家有一齊傾偈，到舊年佢撐我，嗰時佢真係好保護我（編按：去年影片外洩事件後，胡杏兒撰文：「一個女孩子，如果不是在完全信任對方完全愛對方之下，又怎麼會毫無保留地把自己身體的每一寸奉獻給對方？」撐馬賽），我成日同朋友講你鬧我，我唔會喊，你一講鼓勵說話我就會喊，嗰刻我真係好感動，所以杏兒係一世嘅朋友。

許鞍華的新機會

鄭： 但亦都因禍得福，你有咁多報道，許鞍華先搵你拍新戲《8部半》。
馬： 我好感謝許導演，當時係我最down嘅時候，當時我賣咗樓同車，唔想喺香港，突然間收到電話，搵我casting，喺屋企喊咗半個鐘，係好感謝、好感恩。

回憶與汪子琦的感情

鄭： 有冇真心鍾意過汪子琦？
馬： 過去咗嘅嘢我唔想再引起一個話題，嗰段經歷我係無悔。
鄭： 你係咪付出咗真感情？
馬： 我淨係可以講我係好期待愛情，由細到大都好憧憬愛情，對每一個人都好真心。
鄭： 你係咪會為錢拍拖嘅人？

馬： 唔係。
鄭： 片段係你主動影定係有人引導你影？
馬： 關乎兩個人私人關係，我唔想答。
鄭： 當時你係咪好信任佢？
馬： 當然係信任。
鄭： 結果係咪令你好傷心？
馬： 喺段片段前已經抑鬱過，所以到後尾發生都可以接受。

忍辱與成長

鄭： 成件事你唔出聲，唔會覺得唔抵？
馬： 對於我嚟講，呢個係我選擇嘅方式，佛教都有講忍辱係最高嘅苦行。好似一時間將所有重要嘅嘢都拎走晒，名譽、工作，冇工作冇咗收入，朋友，一時間乜都冇晒，會覺得好驚、好徬徨，後尾諗嗰啲嘢係咪最重要？唔係！可以身上一蚊都冇，都覺得好開心，係睇你點諗，你咁諗，好嘅嘢自然會出現。

鄭： 再拍拖，會揀男仔定女仔？
馬： 我諗呢啲嘢控制唔到嘅，我諗都係男仔啦！

採訪後記

鄭紹康：認識馬賽的日子不算長，一年多前在胡杏兒的生日會閒聊兩句，我告訴她對那樁風波和新聞的看法，記者會時應該穿甚麼衣服、怎樣應對等，她馬上流下淚，我見猶憐。之後跟她在北京碰上也相處多了，亦相信她是純情和親切的。知道她已搬到北京繼續娛樂圈發展，面對更大城市和更多不同層面的新朋友，相信本性善良的馬賽定能在北方打開一片新天空！