馮盈盈大爆女星秘聞 陳煒 陳凱琳 麥美恩走唔甩
馮盈盈由2017年開始主持J2台節目《後生仔傾吓偈》，節目出名多料爆，一班主持亦出名敢言，日前一集，主持馮盈盈、鄭衍峰、陸浩明及黃美棋等，就大爆藝人秘密，原本眾人話唔會開名講，點知講到好High收唔到口，當中煒哥（陳煒）、陳凱琳同麥美恩都走唔甩，畀佢哋爆唔少嘢！
撰文：東方新地｜圖片：《後生仔傾吓偈》片段截圖、東方新地圖庫、藝人社交網
馮盈盈《後生仔傾吓偈》開Live爆陳煒超豪
日前《後生仔傾吓偈》開Live爆藝人秘密，原本一班主持話要「暗名爆」，不過當愈說愈high，當中就開名大爆唔少藝人秘密。近年在TVB 甚吃得開的陳煒，原來堪稱TVB超豪藝人，每次出外景，煒哥都會問工作人員附近有乜好嘢食，然後一放lunch或者宵夜，煒哥就會買到成枱嘢食萬歲，好客程度係好到每日開工都萬歲！唔止對幕前演員，對幕後一樣好到加零一！
《後生仔傾吓偈》爆陳凱琳勁叻Social
煒哥豪爽出晒名，一班後生仔再大爆另一位TVB花旦陳凱琳秘密，原來Grace（陳凱琳）勁叻Social 又有禮貌，陸浩明大爆話，Grace在電視城工作，在錄影廠行一條走廊，原本人哋用十秒行完，Grace可以行足十五分鐘，因為佢行過見到乜人都會逐一打招呼，化妝、整頭亦狂吹一輪。
而講到鍾意萬歲，除咗有陳煒去到邊請到邊，新紥主持麥美恩（Mayanne）原來就好鍾意請飲茶，每次同大家去拍嘢，一到茶樓就瘋狂嗌嘢食，一枱點心可以叠到高一高，馮盈盈笑言同Mayanne飲茶，點心紙一定唔可以過她手，否則就一定食唔晒要打包走。
除咗開名爆料，一班主持更暗名爆話，試過有一位《後生仔》女主持，收到一個男藝人DM約會，但原來該男藝人用同一個短訊，不停DM《後生仔》啲女主持，邊個咁濫媾，大家真係要自己估下！
