東門冰室歷史逾半世紀 港爸頂手一腳踢連續開工60日 堅守1原則做女兒好榜樣 |五味人生

東門冰室歷史逾半世紀 港爸頂手一腳踢連續開工60日 堅守1原則做女兒好榜樣 |五味人生

家庭生活

冰室 是香港人的集體回憶,而位於紅磡曲街的隱世老牌港式冰室─「東門冰室」更加是不少街坊、大學學生的聚腳點,屹立超過半世紀。地方雖小,但食物好有內涵,口碑好好。這裡的食物以簡單三文治、粉麵為主,最出名是鱆魚餅炒牛麵、豬扒蛋治,是網民推介必試的招牌拿手菜。負責人良哥常常要一腳踢,入貨、準備食材、沖茶、招呼客人,樣樣親力親為。身為爸爸的他能照顧到家庭嗎?他是如何做到女兒眼中的好榜樣?

撰文:Clara | 資料、圖片授權:受訪者東門冰室負責人良哥| 拍攝:Hugo

頂手半世紀東門冰室 讓客人回味熟悉味道

東門冰室足足有半世紀歷史,從大排檔開始做起,之後入舖。這裡保留60、70年代港式冰室的裝修,花紋瓷磚、實木圓枱、舊式數碼電視、青磚牆身,處處都看到歲月的痕跡,充滿住懷舊氣息。一直以來,冰室是由現年79歲的盧老太經營,但去年她年事已高,決定退休,而仔女亦不願意接手,本來打算結束營業,不少支持多年的食客知道後都覺得很不捨得。食客之一的良哥感到可惜,於是與盧老太接洽,商量頂手,令這間老店得以繼續經營,老伙計亦能繼續在這裡打工。

原來良哥之前一直做開飲食業,很喜歡做這一行,幾年前幫襯過東門冰室,覺得裡的招牌菜很好吃。眼見好多舊街坊都很喜歡東門冰室,不捨得它就此結業,所以決定頂手:「呢間餐廳開咗幾十年,唔想佢結束結業,嘥咗。」第一次做生意,他勇字當頭,接手後幾天即要正式營業,初時困難重重:「我連沖杯奶茶都唔識,好緊張,好大壓力。出咗杯奶茶唔係畀人飲就算,都要睇人哋飲得開唔開心,所以之前都好驚。」他沒有放棄,尋遍不同師傅去偷師,每天不斷沖奶茶,調校味道,終於沖到熟悉的口味,他謙稱:「似樣咗,唔講得好好。」

食譜詳情即睇:三文治食譜-街坊老店東門冰室半世紀歷史!負責人教豬扒蛋治做法 外面微脆、肉質鬆化

冰室
豬扒蛋治(圖片來源:受訪者東門冰室負責人良哥)
冰室
鱆魚餅炒牛麵(圖片來源:Hugo)
冰室
豬扒麵(圖片來源:Hugo)
冰室
雞翼(圖片來源:Hugo)

連續開工60日 熱情未曾熄滅

每天清晨5時正,良哥就會起床落舖頭準備材料,如調較茶底份量、味道,之後要打點外舖面,迎接客人:「基本上乜都要做。」直到下午4時就會關門,在廚房醃製翌日的食物,他坦言:「都好辛苦。」他表示以前做打工仔時每個月都有幾日假期,但自從成為老闆,要管理生意、員工,放假變成奢侈,試過兩個月沒有休息,但他心中想做好餐廳那團火未曾熄滅:「員工咩都要問你,唔可以話咩都唔知。第一次做(生意),樣樣都會緊張少少。辛苦都無辦法,接咗嚟做,乜都要承擔。」他慶幸太太一直以來很諒解、支持他的工作,而且有兩個家姐偶爾幫忙湊女,教她做功課,甚至補習:「好感謝佢哋,我依家全副心機擺晒喺度。」

冰室
連續開工60日 熱情未曾熄滅(圖片來源:Hugo)

堅守原則做女兒好榜樣

良哥媽媽很滿意,大讚兒子很顧家:「我好滿意我個仔,我有呢個仔好開心。佢又乖…(平時)無得自由,要負責養女、養老婆、養我,好大壓力。佢好努力做嘢,都無時間。」不過良哥本人覺得自己還未是一個滿分的好爸爸,因為平日要打理冰室太忙,不能24小時陪在女兒身邊:「依家仲未畀到啲乜嘢我個女。」趁著暑假,他才可以叫女兒到冰室做功課,增加見面機會,沒有客人時會一起玩耍,順道培養父女情。

冰室
堅守原則做女兒好榜樣(圖片來源:Hugo)

被問到會否讓女兒繼承父業,他指女兒想做甚麼工作,他都會支持。憑住做生意得出來的經驗,他領悟到一個道理,隨即教女兒:「做每一樣嘢都好,一定要畀心機去做。成功唔成功都好,都要堅持做呢樣嘢,做好佢,相信會有一日成功。」

(圖片來源:)
堅守原則做女兒好榜樣(圖片來源:Hugo)
冰室
堅守原則做女兒好榜樣(圖片來源:Hugo)

最大心願能多陪家人:會好努力做好呢盤生意

苦盡甘來,專注、努力過後終於得到別人賞識,他記得有位舊街坊日日都會來飲茶,突然有兩個月沒有過來,前兩天他終於來了,對他說:「我入咗醫院兩個月,一出院就特登飲你嘅奶茶。」令他覺得很窩心。他現在最大心願是生意上了軌道、人手變多,他能花多點時間陪伴家人:「我會好努力、好努力咁做好呢盤生意,為咗個女又好,屋企人又好。」

東門冰室

地址:紅磡曲街16號福家大廈地舖按此地圖

電話號碼:23341285

營業時間:星期一至日06:00 – 16:00

你又點睇?

更多精選內容