口罩除定戴?港媽為1歲BB除口罩影相惹爭議 5招令小朋友乖乖戴上口罩

口罩除定戴?港媽為1歲BB除口罩影相惹爭議 5招令小朋友乖乖戴上口罩

口罩 需求愈來愈大,事關新冠肺炎疫情再度反彈!截至昨日凌晨,初步陽性個案則暫錄得逾80宗,呈現持續上升趨勢。病人逼爆公立醫院,有四間內科佔用率更高達120%。疫情繼續蔓延,有網民近日瀏覽某名港媽的社交平台,發現她同一歲兒子合照時,沒有為兒子戴上口罩,而她自己就有戴。網民將此事放上網公審,惹來極大爭議,支持與反對聲激烈,爆發罵戰。

撰文:Clara | 資料、圖片來源:「生仔要考牌」、shutterstock

港媽為1歲BB除口罩影相

事緣一名網民見到港媽instagram同1歲兒子於商場玩具店合照,惟港媽沒有為兒子戴上口罩,網民嘩然,遂將此事投稿到Facebook專頁「生仔要考牌」。網民言語間夾雜粗口,他指今時今日疫情去到第四波,周圍都是看不到的病菌,但港媽不但帶住BB去人口密集的商場行街,還沒有為BB戴口罩,連膠帽都沒有:「真係XXX,唔肯戴咪唔好出街。佢已經識行、識走、識周圍摸⋯⋯全世界圍住你轉好唔X好?如果你個仔帶菌就會周街一鑊熟,仲當自己係明星KOL,日日post,XX當有趣。」

帖文引來超過500名網民留言表達意見,有人力撐港媽的行為沒有問題,做人父母才知道有幾難為BB戴口罩;有人則指BB並非「大晒」,病菌不會懂得避開小朋友。

港媽為1歲BB除口罩影相(非當事人)
港媽為1歲BB除口罩影相(非當事人)

支持派力撐BB毋須戴口罩?

支持派的網民們質疑,一開始公審港媽的網民沒有小朋友,所以不知道好多小朋友抗拒口罩同防疫帽,不明白作為家長要小朋友合作戴口罩是件很困難的事:「唔係個個都肯帶,佢地會扯會塞落口。雖然無防護措施風險好高,但有時候真係要外出都無辦法。」、「人哋影完相有冇戴返你知唔知?冇得出街成年啦,你有陣時都要唞吓氣啦,唔通困住個BB喺屋企成年都唔出得街咩,最憎啲人自己冇小朋友喺度攻擊人哋。」

支持派力撐BB毋須戴口罩(Facebook截圖)
支持派力撐BB毋須戴口罩(Facebook截圖)

有網民就指,兩歲以下小朋友不應戴口罩,因為不恰當使用口罩會有窒息危險,而且他們有機會用手去摸同扯個口罩,增加感染機會,所以不戴也沒有問題。另外有人懷疑口罩的功用:「出post果個係無知,一歲係唔可以帶mask」、「口罩係用嚟防止口水噴到人,本身口罩係防唔到中招,咁個B無病做乜要戴?係啲人唔知成日當口罩係護身符。」、「Post主咁驚就唔好出街,成日驚呢驚路。」、「使唔使同1歲小朋友計較啊?」

反對派指BB抵疫力弱更需戴口罩

反對派的網民反駁支持派的論點,他們認為家長不應以小朋友會扯甩口罩做藉口,家長有責任保護小朋友,以及教好他們衛生的重要性:「無口罩都可以用防疫帽代替,又要死拗話防疫帽唔得。」、「小朋友都有感染風險,病菌唔會揀人。如果口罩無用,香港一早全部中晒。」、「其實冇人鍾意戴口罩,大家鬥堅持囉,睇吓自己肯唔肯做多步㗎啫。」

部分網民指既然小朋友不想戴口罩,家長就不應帶他們外出,否則只會令小朋友染病機會增加,連累其他無辜的人:「小朋友患上比大人仲辛苦,因為佢哋只識得喊,如果惹到老人家仲大件事。」、「如果咩都唔肯戴就不如唔好出街。」、「唔戴口罩唔做防疫措施,自己瀨咗嘢唔緊要啊,唔好累街坊就得!」

反對派指BB抵疫力弱更需戴口罩(Facebook截圖)
反對派指BB抵疫力弱更需戴口罩(Facebook截圖)

5招令小朋友乖乖戴上口罩

其實衛生署是建議,兩歲以下小朋友如果沒有大人看管的情況下毋須戴口罩,署方強調小朋友最好減少外出,同心抗疫。如果小朋友抗拒戴口罩,家長可以試試以下方法:

1. 在家中讓小朋友戴口罩數分鐘,過程中可與他們觀看他們喜歡的卡通片,分散其注意力。

2. 鼓勵小朋友成功戴上口罩是乖孩子。

3. 每隔半小時讓小朋友脫下口罩喝水或吃小食,小休一下。

4. 教小朋友為甚麼要戴口罩,唱一些有關戴口罩的兒歌,讓他們認識戴口罩的重要性。

5. 即使小朋友除低口罩,都要保持冷靜,過就激烈的負面反應和責罵,只會令他們更抗拒戴口罩。

5招令小朋友乖乖戴上口罩
5招令小朋友乖乖戴上口罩

你又點睇?

更多精選內容