坐月炒米茶+上奶炒米茶9款食譜

Pack炒米茶方面就有小JM幫手同我一齊Pack一齊分擔，而JM爸就負責幫我整燉湯坐月飲。媽咪成日都話坐月坐足100日先係最好。上胎我坐月都係坐足100日，所以今胎亦唔例外。

今胎我主張餵母乳，希望可以保持心情放鬆、愉快同盡量多休息以助上奶！

今次小JM媽媽就為大家介紹多款坐月及上奶炒米茶，希望可以為各位人奶媽媽打打氣！

坐月炒米茶 – 媽媽必備良品

三色坐月炒米茶製法：

1. 先洗淨白米、紅米、黑米或糙米，待乾

2. 再用白鑊將米炒約十分鐘至微微金黃即可

＊白鑊，即係無任何油鹽糖既調味＊

待炒米攤凍之後就可以用器皿盛載，以便日後用來沖「米水」之用，所以建議有時間可以一次過炒定多啲，唔駛要用先炒咁麻煩。

米的功效：

紅米：養心、補血

黑米：補腎

糙米：健脾補脾

媽咪話坐月要飲炒米茶飲足100日，咁自然會想要多啲口味同變化以保持新鮮感，唔駛下下飲埋同一款咁悶呀嘛。

今次坐月都飲過不下八款炒米茶，頭一個月主要以坐月炒米茶為主，第二個月就開始會飲下上奶炒米茶當轉下口味。

坐月炒米茶：

第一星期主要以陳皮炒米茶為主。

材料介紹:

陳皮：健脾、行氣，順產開刀都啱飲

圓肉：止血安神、益心脾、補氣血

杞子：補肝腎、益精氣、改善面色、明目安神

南棗：補中益氣、養血安神

黨蔘：補中益氣、健脾益肺

1. 三色炒米 + 陳皮

2. 三色炒米 + 陳皮 + 圓肉 + 杞子

3. 三色炒米 + 陳皮 + 圓肉 + 杞子 + 南棗 + 黨蔘

4. 三色炒米 + 陳皮 + 圓肉 + 杞子 + 北芪

上奶炒米茶：

我由第五星期開始先飲上奶炒米茶。

1. 三色炒米 + 黑豆 + 無花果

2. 三色炒米 + 黑豆 + 陳皮 + 黨蔘

3. 三色炒米 + 黑豆 + 通草 + 黨蔘

4. 三色炒米 + 南棗 + 沙蔘

5. 三色炒米 + 陳皮 + 通草 + 南棗

因為今胎自己坐月，所以會預早包裝好啲炒米茶，方便一包包拎來煲。

我係臨生二寶前，就已經同小JM一齊Pack咗頭一個月份量嘅坐月炒米茶，到飲到差不多就再請小幫手一齊Pack炒米茶包，順便當係親子活動啦！小JM仲可以從中學識分辨其中一啲材料添，仲知邊啲可以即食～

舊文重溫：母乳系列。泌乳湯水。炒米茶

參考資料：衛生處網頁