【幼兒湯水】10大清熱生津湯水

1.消暑袪濕冬瓜湯

材料：

材料方面就有豬肉眼$40、冬瓜約一斤、蜜棗4粒(忘記影相..哈哈)；雲苓、蓮子、薏米、南豆及荷葉。藥材份量方面你同藥材店職員講大約幾多人飲用，佢就會幫你執份量啦~

做法：

瘦肉洗淨汆水備用，藥材就浸洗一陣~

冬瓜乾淨切件(記得切大舊啲，咁就煲完之後可以食埋啲冬瓜)，冬瓜皮、瓜瓤和瓜仁都唔清走，因為加埋一齊煲就可以加強消暑功效呀~

煲內放約3L水，水滾後放入所有材料~

待再次滾起時，先繼續用大火煲約15分鐘，然後加入冬瓜~

再轉慢火加蓋煲1.5小時~

最後加入少少鹽調味，就可以飲啦~

哈哈哈….同我預期一樣，小小豬都係鐘意飲依款湯，極度自動自覺咁添飲，見佢飲得咁樂意，真係人都開心啲，不枉我咁努力煲湯俾佢飲…哈哈哈！

溫馨提示：由於材料都涉及藥材成分，所以係好因應個人體質，大家記得煲之前了解下自己，或者問下相熟中醫/藥材店職員，呢個湯料啱唔啱自己呀

2.准山赤小豆扁豆湯

赤小豆同扁豆可以話係夏天多數煲嘅湯，因為扁豆可以健脾和中，消暑化濕。赤小豆就利水除濕，和血排膿，消腫解毒。用生熟薏米、北芪及准山一齊煲，除左可以清熱袪濕之外，仲可以健睥胃、強肺同預防感冒。

材料：

豬肉眼$35、果皮1小角、無花果4-5粒、生熟薏米、北芪、准山、赤小豆及扁豆，藥材份量方面你同藥材店職員講大約幾多人飲用，佢就會幫你執份量啦。

做法：

豬肉洗乾淨，氽水準用；果皮浸透去囊；其他藥材浸洗一陣備用。

煲內放約3L水，然後加入果皮。

水滾後放入所有材料。

待水再次滾起時，先繼續用大火煲約15分鐘，然後轉慢火加蓋煲1.5小時。

最後加入少少鹽調味，就可以飲啦。

3.牛大力土伏苓茶

材料：

牛大力一両、土伏苓一両、糖冬瓜約十條及腰果半碗~

做法：
將所有材料清洗乾淨~煲內放入8碗水~然後加入所有材料(糖冬瓜除外)~

待煲滾後，就可以加入糖冬瓜，然後用大火加蓋煲約10分鐘~

最後加蓋慢火煲30分鐘~

煲好後先隔去材料，待涼後就可以飲啦~

4.蘆根薏米雪梨水

材料：

雪梨四個

蘆根

薏米

銀花

甘草

基本上所有材料係藥材店都可以買到，只需要同店員講有幾多人飲，佢就會執所需份量，我三人份量都只係$15~

雪梨洗淨去核切塊~

所有材料要浸洗半小時~

將全部材料及1L水放入煲內~

待水滾後轉用慢火煲約1小時，咁就煲好啦~

待涼後入樽，就可以飲得啦~

加埋雪梨一齊煲，甜甜地又幾好飲~

5.印度椰子栗子瘦肉湯

印度椰子有助清燥熱、止咳功效、滋陰補腎、潤肺養顏、強壯身體機能嘅作用。栗子就有助補脾健胃，再加埋果皮同百合一齊煲，對潤肺止咳係好好呀！

材料：

印度椰子一粒

栗子半斤

紅蘿蔔一絛半

豬肉眼約$40

鮮百合兩粒

果皮兩小塊

做法：

先將印度椰子切片，可以的話就切薄啲，咁就煲時就可以出味啲~

栗子去殼，浸熱水去衣備用~

果皮浸透去囊，百合洗乾淨，紅蘿蔔去皮切塊，瘦肉洗淨汆水備用~

煲內放約1.5L水(約有15個飯碗左右啦)，然後加入果皮~

利用大火煲一陣，待水滾後加入所有材料~

再一次滾起後，後轉用慢火煲約2小時~

最後加少少鹽調味就飲得啦~

既有超香嘅椰子味之餘，又有少少栗子味！

6.雲苓白术扁豆衣茶

材料：

雲苓

白朮

扁豆衣

白芍

蜜棗兩粒，藥材份量方面你同藥材店職員講大約幾多人飲用，佢就會幫你執份量啦~

做法：

將所有藥材浸洗備用~

於煲內準備12碗水份量，然後加入藥材~

待水滾後，轉慢火加蓋煲一小時~大約煲埋有6杯左右份量，待涼後就可以入樽放在雪櫃，因為雪凍左好飲好多呀~

7.龍脷葉石黃皮青欖 止咳湯

材料：

瘦肉約$40

龍脷葉一両

石黃皮十粒

青欖十粒

桔餅2個

果皮1塊

南北杏少許

基本上大部分材料都可以係濕貨店或山草藥店有售，有部分街市花檔都會可以買到，所以都唔難買呀！

做法：

桔餅切碎，青欖及石黃皮要用刀背拍一拍，等可以係煲時更加出味~

龍脷葉及南北杏洗淨，果皮浸軟刮囊，豬肉汆水備用~

煲內加入約3.5L水，然後加入先果皮~

待水滾後將所有材料加入~

水滾後，加蓋轉小火煲1.5小時~

最後加少少鹽調味，就飲得啦~

味道就帶點甘甘甜甜，比起只落青欖桔餅，就多左一份龍脷葉嘅味道，所以都尚算唔錯。

8.蘋果竹蔗茶

竹蔗有清熱之效，能解肺熱和腸胃熱 ；蘋果具有生津止渴、潤肺除煩、健脾益胃、養心益氣、潤腸、止瀉、解暑、醒酒等功效；青檸有潤喉殺毒功效，而且仲有助消暑解渴。

材料：
竹蔗2札、蘋果3個、青檸2個、冰糖適量~

做法：
竹蔗洗淨破開兩邊，蘋果刮去果蠟後去芯切塊，將青檸揸汁。

煲內放大約2L水，然後放入竹蔗和蘋果~

待滾起後，用大火加蓋煲10分鐘~

然後就可以因應個人口味加入冰糖~

轉用慢火加蓋煲1小時~

待放涼後就可以加入青檸汁~可以飲得啦~

佢嘅味道又幾得意，有蘋果竹蔗香之餘，又有點點酸酸甜甜味(可能因為加左青檸汁)，有少少泰國風味…哈哈哈。唔係自己讚自己，都真係幾好飲。不過我覺得雪凍左之後個味道仲出，加上凍凍地又可以消暑，絕對推介大家炎熱天時可以煲依個正涼茶呀！

9.蘋果粟米鬚馬蹄水

蘋果生津潤肺、除煩開胃；粟米芯鬚有健脾開胃及利尿功效；馬蹄就能消食除痰、清熱解毒。(網上資料)

材料：

蘋果三個、粟米鬚一斤、馬蹄八粒及冰糖適量~

做法：

1. 粟米鬚洗乾淨~
2. 蘋果刮去果蠟後去芯切開~
3. 馬蹄洗淨去皮~
4. 煲內放約2L水，然後隨水加入所有材料(冰糖除外)~

5. 待滾起後，用大火加蓋煲約15分鐘~
6. 之後加入適量冰糖~

7. 然後轉慢火加蓋煲多45分鐘~

煲好之後待涼入樽放在雪櫃，因為雪凍就仲好飲呀~

10.赤小豆粉葛鯪魚湯

粉葛有清熱、生津止渴及舒緩肌肉酸痛的功效；赤小豆及扁豆有袪濕暖胃的作用；紅蘿蔔益肌明目、有助增強免疫功能；蜜棗則有補脾胃、止咳潤肺化痰等功效；鯪魚補氣活血

材料：

粉葛 約1斤

紅蘿蔔 1條

鯪魚 1條

扁豆 80g

赤小豆 40g

豬展 $30

蜜棗2粒

薑 2-3片

水 3L

做法：

1) 粉葛、紅蘿蔔去皮切件備用

2) 扁豆、赤小豆、蜜棗洗淨略浸備用

3) 豬展切件出水備用

4) 下油爆香薑片，放入鯪魚每邊煎約3分鐘

5) 除鯪魚外，將所有材料放入高壓煲至水滾，再放入已煎鯪魚煲20分鐘，於喝前再大滾一下便成 （若用一般煲具，則以大火煲滾，再用文火煲2-3小時便成）

常見問題:

如果湯水內有藥材成分有什麼要注意?
因應個人體質，大家記得煲之前了解下自己，或者問下相熟中醫/藥材店職員。

栗子對身體有什麼功效?
有助補脾健胃。