《賭城群英會》 五代 港姐 同劇現身

原文：東方新地
相片：節目截圖，新傳媒資料室

陳法蓉 凍齡太后

現年49歲陳法蓉89年當選 港姐 冠軍，90年就擔正拍《人在邊緣》，及在電影《賭俠》中演出「龍九」一角走紅，之後佢就專注拍戲，但可惜冇咩代表作，直到2001年拍 張衛健版電視劇《小寶與康熙》，陳法蓉一人分飾太后同龍兒兩角，令觀眾留下深刻印象，雖然套劇已過16年，但睇番陳法蓉個樣都冇咩點變，認真係凍齡有術！

阿佘 兩度封后

42歲佘詩曼(阿佘)97年攞 港姐 季軍入行，初出道已獲力捧，先後擔正拍劇集《雪山飛狐》同《刑事偵緝檔案IV》等劇，2000年拍主張智霖主演《十月初五的月光》更一炮而紅，之後阿佘努力改善雞仔聲，演技亦愈做愈好，拍過多部劇集如《宮心計》、《公主嫁到》、《使徒行者》等，都係當年收視冠軍，06年阿佘終憑《鳳凰四重奏》一人分飾四角，登上第一個視后寶座，2014年更以《使徒行者》「釘姐」一角，連奪「最佳女主角」和「最受歡迎電視女角色」，成為首位「雙料視后」。

高Ling 性感上位

30歲高Ling 08年選 港姐 時三甲不入，只攞到一個旅遊大使獎，但就獲簽入無綫拍劇，雖然多做花瓶角色，但高Ling喺多個綜藝節目都有不錯的表現。2013年《法網狙擊》更令高Ling人氣即時急升！

文凱玲 做過夜蒲女

34歲文凱玲原來都參選過2010年 港姐 ，不過成績只到第八名，同屆冠亞季軍分別係陳庭欣、張秀文同莊思明。落選後佢轉投電影圈，先後拍過錢國偉執導嘅《喜愛夜蒲2》同《喜愛夜蒲3》，以及多部王晶監製電影《唐伯虎衝上雲霄》、《賭城風雲II》同《鴨王2》等。

麥明詩 處女拍劇

在五代 港姐 中25歲麥明詩最年輕，佢前年以十優狀元嘅優勢力壓其他佳麗當選 港姐 冠軍，卸任後曾做過明珠台《港生活·港享受》同《里約奧運》等節目主持，以及拍過電影《失戀日》，今次處女拍劇，同「鴨王」何浩文做一對，演技如何未睇到，不過獲TVB力捧，戲分點都唔會少！