【車迷控出動】食盡玩盡TOMICA

【車迷控出動】食盡玩盡TOMICA

小小豬Kinsey

話說小小豬係一名車控(最迷戀就係火車)，唔覺意口多多話俾佢知有一間新嘅主題餐廳，入面有好多TOMICA食物，就係咁……我地就嚟朝聖啦！
我地三口子又點可以食得晒咁多美食，但睇網上介紹每一款都係好吸引，所以我地就約埋SY哥哥齊齊嚟，人多啲可以食多啲唔同款嘛~

其實「洋麵屋 五右衞門」都開左有好一段日子，不過大鄉里的我今次都係第一次嚟(咁…其實…我又真係好少入屯門)。今次仲係全港首個以TOMICA為主題嘅餐廳，所以為左依個車控豬，就專登渣車入嚟食啦~

由於餐廳變身成為TOMICA主題餐廳，所以四圍都以車仔元素重新佈置，車迷控就當然係最開心啦~


樣樣食物都好吸引，小小豬揀得好苦惱添。依個時候就發揮人多嘅好處，每樣都叫一份，之後齊齊SHARE嚟食，咁就大完滿啦~


餐廳會為小朋友提供塗顏色用品，咁就可以一邊塗顏色，一邊等食物嚟啦~

小小豬叫左依個意式肉丸意大利麵，仲有靚靚車仔飯盒送上，真係好可愛呀(不過…個盒仔係唔可以拎走嘅)，佢話個意大利麵係最好食~


我點嘅珍珠帶子蝦肉意大利麵，整體上都唔錯，尤其個蝦肉都幾彈牙，如果可以多返少少汁，咁就VERY GOOD啦~

仁叔叔嘅日式照燒雞扒蛋漢堡薯格，個雞扒炸得唔太乾，所以都唔錯~


SY點嘅鐵板香草吉列牛扒伴日式咖哩飯，豬扒皮好脆而且個飯係可以連埋個糖紙一齊食，所以食落甜甜地，啱晒各位大小朋友~

最後就係老公嘅鐵板香酥炸雞飯配黑松露芝士汁，個汁真係要推介一下，估唔到黑松露同芝士個味又幾夾哦~


冰果茶係我地一致推介嘅飲品~

除左佢係幾好飲之外，個冰仲係TOMICA車仔嚟，真係誠意十足呀~


主題飲品仲有另一款牛奶咖啡~

有咁多TOMICA好嘢食，又有好朋友相陪，小小豬就緊係食得非常開心啦~

主餐雖然好好，不過我嘅亮點始終落係兩款靚靚甜品，哈哈哈…女仕們總係有第二個胃食甜品嘛！
SY點嘅馬卡龍芭菲，除左有馬卡龍同雪糕之外，入面仲有棉花糖同粟米片，真係一次過可以滿足晒~

我同小小豬嘅朱古力香蕉酥批伴雪糕，個酥皮係即叫即焗，所以食落仲脆脆地又暖暖地，配埋雪糕一齊食，口感都唔錯呀~


食甜品可以話係人生一大樂事~


依個為食小小豬仲去攪攪陣，好在SY哥哥乖願意俾依個小小豬攪住佢，之後仲開心SHARE添~


食飽飽之後，我地就轉戰中庭，因為有得睇車同玩車呀~

兩位小男生就即刻衝去TOMICA 互動營地遊戲區，排隊入去玩車車啦(係屯門市廣場任何兩間唔同商戶以電子貨幣消費滿$200，就可以入內玩15分鐘)~


兩位小男生玩到興高彩烈，我就周圍行下睇下，有一系列TOMICA歷年嘅文具精品，不過全部係非賣品呢~


當然唔少得仲有POP-UP-STORE，好在小小豬冇同行，如果唔係我一定好唔得閒…哈哈哈~

場內仲有一系TOMICA車仔展出，依個位亦都係最好人嘅，原來真係好多車迷呀~


小小豬又嚟睇到眼定定唔願走…哈哈哈~

TOMICA嘅威力真係唔可以講少，有咁多唔同嘅CrossOver，絕對係一個無底深潭(慶幸小小豬唔係追款之人，如果唔係我就大件事了…呵呵呵)，不過….其實好多款都好靚又可愛，都真係好難忍手嘅。

 

各位車迷控有機會入屯門，記得嚟食盡玩盡TOMICA啦！

 

BY 小小豬Kinsey

更多精選內容

熱門文章

最新文章