卡通人物

【冷知識】公開5大卡通人物的秘密

熱話

廣告

卡通人物陪伴唔少人長大,除咗會睇佢哋嘅卡通片之外,仲會買好多相關嘅周邊產品。不過,好多人其實都未必咁了解一眾卡通人物嘅神秘一面,好似係Hello Kitty、Miffy等,依家就我哋同大家揭開佢哋嘅神秒面紗啦!

撰文:Kammy|圖片來源:Instagram,Youtube截圖

5大卡通人物秘密

1. Hello Kitty唔係貓?

相信冇人唔識Hello Kitty!Hello Kitty樣子可愛,頭上有個蝴蝶結,樣貌同貓一樣,臉上有鬚、冇口,不過佢最唔同嘅就係識用雙腳走路,而唔係用四服爬行。

正當人人都以為佢係貓嘅時候,擁有Hello Kitty版權嘅Sanrio就喺佢誕生四十周年之際,宣佈Hello Kitty其實係一個英國女孩。呢個消息當年一出,令一眾喜愛Kitty嘅人如夢初醒。

Sanrio公司解釋,Hello Kitty並唔係貓,只係一個以貓為基本圖案嘅擬人化卡通人物,佢亦從未表現出貓嘅特性,行路同坐都好似人類一樣。另外,官方更指,Hello Kitty所養嘅Charmmy Kitty先係真正嘅貓。

消息震驚全世界,亦令一班卡通人物出嚟澄清自己究竟係人定動物,好似係Snoopy同Keroppi等。不過,佢哋嘅客方網站都指出,Snoopy係真係狗嚟,而Keroppi都真係青蛙嚟!

2. 比卡超係男定女?

如果有睇寵物小精靈,咁你都可能有個疑問,究竟比卡超係男定女呢?原來係有得分㗎!如果比卡超條尾巴有缺口,即代表佢係女生;如果冇缺口,就代表佢係男仔喇!

至於小智嘅比卡超,可以清晰見到佢條尾係冇缺口,所以係男仔嚟㗎!

3.多啦A夢係黃色?

「叮噹呀~誰都喜歡你~」多啦A夢(前名叮噹)真係人人都鐘意,一隻藍色嘅機械貓,有藍色嘅外殻,個頭圓嘟嘟,成日攞法寶出嚟幫大雄。唔講唔知,其實多啦A夢本身係黃色,而且仲係有耳仔添!

當時佢嘅主人小雄做多啦A夢嘅黏土塑像時,耳仔位一直都做得唔好,就叫機器工程鼠「將黏土塑像嘅耳仔整到好似多啦A夢一樣」,但工程鼠聽錯咗,聽咗做「將多啦A夢嘅耳仔整到黏土塑像一樣」。結果,多啦A夢瞓晏教時,說畀工程鼠咬走一對耳仔,亦因為咁令佢從此好怕老鼠!

後來,好多人見到多啦A夢突然變咗光頭都大笑,令多啦A夢十分唔開心,仲因為誤喝「悲劇之源」而喊咗3日3夜,身上黃色電鍍層就咁樣被淚水洗去而變成藍色,就係今時今日大家見到嘅樣啦!

4. Miffy面上嘅「X」代表咩?

Miffy呢隻兔仔形象可愛,佢同Hello Kitty一樣冇口,但又有好多人會話,佢面上個「X」咪係口嚟囉!不過,Miffy嘅作者迪克布魯納表示,其實「X」係代表兩樣嘢…

迪克布魯納表示,當初佢諗住以最簡單嘅方式去呈現Miffy嘅樣,所以眼都只係用兩點去代表,至於個「X」,其實係代表鼻同嘴!另外,有時見到Miffy面上個「X」中間有一橫,作者就解釋個條係皺紋嚟!

 

5. Mario好拍檔Yoshi唔係恐龍?

大家一定有玩過任天堂知名遊戲Super Mario!Mario嘅好拍檔Yoshi相信大家都唔會陌生,Yoshi第一次出玩係喺1990年《超級瑪利歐世界》,而佢成日畀Mario騎住去闖關,令唔少玩家認為Yoshi係一隻恐龍。

去到2017年,任天堂公司嘅電子遊戲設計師手塚卓志表示,其實Yoshi喺遊戲設定上係烏龜一族!「Mario之父」宮本茂一開始係希望畀Mario坐喺馬上面,但由於遊戲嘅背景想以「恐龍樂園」為主,所以就畀Mario坐喺爬蟲類生物身上。

不過,後來礙於爬蟲類外形設定問題,改為現時嘅烏龜設定,所以大家唔好再以為Yoshi係恐龍喇,記住佢其實係一隻烏龜!