地勤親解香港機場行李出得慢8大迷思 易碎標籤有無用?2種人會快啲
地勤親解香港機場行李出得慢原因 最遲check-in+貼易碎標籤會出得快啲?
早前查小欣從馬拉西亞返港,她在Facebook上載行李認領區的照片並在帖文中寫到:「Can’t believe it!太唔似香港嘅效率,航班21:19到港,現在是21:37還未見到行李,影都冇!#so slow #hongkongairport」,到底香港機場行李點解出得慢?
延伸閱讀:查小欣不滿香港機場攞行李要18分鐘 遭網民炮轟離地
香港機場行李輸送迷思 1. 最後check-in嘅疑惑
其實啲行李喺counter落咗去地牢,就會開始裝箱,即係有時你喺閘口望落去停機坪,一架拖車拖住一個個銀色鐵箱嗰啲。因為其實點樣裝啲箱上飛機係要分重量平衡,最後你件行李去咗邊隻箱,裝咗去最中間定係近艙門啲嘅,真係冇咩人知。仲要睇你搭咩機種,細飛機嗰啲我哋叫bulkload 機,即係根本冇箱,好似車尾箱一樣,計好重量就放喺邊一格平衡好咁。最後一個check-in件行李,亦唔等於一定放你件行李喺門口,就算係放喺門口,都係落晒啲行李先車走⋯⋯返客運大樓⋯⋯咁其實你幾時check-in,都唔係太大關係。
香港機場行李輸送迷思 2. 貼易碎標籤?
道理上,只係見到個標籤會輕手啲,同快唔快係冇咩關係。不過,如果件件行李係唔係都貼個易碎⋯⋯咁,你明啦!有需要先貼啦!我都明工作人員應該件件行李都如珠如寶咁對待⋯⋯都係,你懂的。不過,認真,同快唔快冇咩關係。
![地勤 香港機場 機場 行李 易碎標籤。](https://imgs.gotrip.hk/wp-content/uploads/2018/11/nhv4dxh3MJN7gxp/21831434946702_237_2703162755bf5268fd4e11.jpg)
香港機場行李輸送迷思 3. 你過關太快了
呢個係一個錯覺,你去外國,你係passport,你排非本地人,隊又長啲,檢查又耐啲,你試下去美國,仲要問多你幾句,你出到關,乜行李都到晒了。返香港一過e道,一分鐘就入咗境,去行李帶企得耐就覺得等得耐。
![地勤 香港機場 機場 行李 e道過關快,變相感覺行李等得更耐。](https://imgs.gotrip.hk/wp-content/uploads/2018/11/nhv4dxh3MJN7gxp/deco58_e_channel_11193388515bf526b75a33c.jpg)
香港機場行李輸送迷思 4. 人手不足
又話說,呢個係社會問題,人工唔夠高、工作地點遠、工時長、日曬雨淋⋯⋯都係冇人想入嚟做嘅原因。有網友話睇你坐咩航空公司,其實基本上所有外地嘅航空公司喺香港都冇自己職員,其實都係請代理公司做,仲要其實係得幾間⋯⋯即係你坐邊間都好,可能都係同一班人做,同你買邊張機票冇咩關係。不過,唔同航空公司係可能有少少分別嘅,下面再講。
![地勤 香港機場 機場 行李 很多外地航空公司都是同一班地勤人員。](https://imgs.gotrip.hk/wp-content/uploads/2018/11/nhv4dxh3MJN7gxp/p9270934_18611069558e1dd4415412_15485976375bf528cfa5f5a.jpg)
香港機場行李輸送迷思 5. 硬件問題
機場行李帶不勝負荷,有時黃金時間落機,你會見到三幾隻飛機喺同一條行李帶出,呢隻未出完又到下一隻,根本唔夠用,輸送帶又唔可以放啲行李太密,會jam,到時仲慢。
![地勤 香港機場 機場 行李 輸送帶有限,難以應付同時多班飛機的行李量。](https://imgs.gotrip.hk/wp-content/uploads/2018/11/nhv4dxh3MJN7gxp/airport_50_6187547985979d5d642bd0_13315632805afc14e1ab6e4_14606691255bb6d7ee9561c_15129500685bf5259639472.jpg)
香港機場行李輸送迷思 6. 航空公司分別
上面講過,雖然唔同航空公司,代理公司可能都一樣,呢個係人手問題。不過,如果你坐某啲航空公司,佢哋到港後泊嘅位置都有可能唔一樣,就算依家只淨返T1(T2預計2024年先會開返),運送時間同距離,都可以有唔同。咁當然,你行返去過關嘅時間都唔一樣嘅⋯⋯
![地勤 香港機場 機場 行李 視乎飛機降落的停泊位置。](https://imgs.gotrip.hk/wp-content/uploads/2018/11/nhv4dxh3MJN7gxp/11225460_945596792170037_8732936759696534099_n_7885810735bf52c8ba9b80.jpg)
香港機場行李輸送迷思 7. 有級別嘅會員、頭等、商務會快啲
好似係廢話,不過循例都講下,有級別嘅會員、頭等、商務嘅乘客寄行李,地勤都會掛個標籤上去,地牢嘅同事睇到會分開裝箱,飛機飛咗出去之後,都會通知當地,呢啲行李喺咩位置會優先處理,要講明有級別嘅會員係因為大部分會員卡最基本嘅級別,其實同儲分卡一樣,冇任何特別之處。另外,因應唔同航空公司都有唔同規矩,有啲可能係:最頂級嘅會員(咩鑽石呀、終身白金呀)頭等式處理,中等會員(金卡、銀卡)就當商務客咁處理,快慢都有別。
![地勤 香港機場 機場 行李 會員都有分級,普通會員通常只有儲分功能,沒有特別優待。](https://imgs.gotrip.hk/wp-content/uploads/2018/11/nhv4dxh3MJN7gxp/cq5dam.rendition.900.600_11878843145bf5299d7c3ce.jpg)
香港機場行李輸送迷思 8. 放門口嘅行李呢?
有啲航空公司會放要轉機嘅行李、輪椅、BB車之類喺艙門附近,以最快速度喺閘口畀返個客用,或者即刻送去要轉駁嘅飛機。到港嘅普通行李相比之下,當然冇咁優先了。
![地勤 香港機場 機場 行李 轉機的行李會較一般行李快。](https://imgs.gotrip.hk/wp-content/uploads/2018/11/nhv4dxh3MJN7gxp/dsc_1324_164846441458e1dcfd2e8a8_2782981205bf528e4517db.jpg)
大致上行李嘅事情就係咁,坦白講,真係好難講有咩方法令行李快啲出,除咗做會員或坐商務⋯⋯希望有政策可以令多啲人肯入機場做啦!另外,其實機管局自家出咗個行李tag叫MyTag(唔係賣廣告),唔係可以令你件行李出得快啲,但係你喺外地返嚟時,check-in件行李之前,登記咗落個app度,返嚟香港佢就會彈個notification畀你,話你知件行李大約幾時會到行李帶⋯⋯起碼唔使齋企呆等囉!有興趣就試下啦!上香港機場官網睇下啦!
![地勤 香港機場 機場 行李 大家可以買個MyTag行李通),返嚟香港佢就會彈個notification畀你,話你知件行李大約幾時會到行李帶](https://imgs.gotrip.hk/wp-content/uploads/2018/11/nhv4dxh3MJN7gxp/9f9ebb28-53a9-4575-95a8-e67551a9370e_64106087163b6418646eb9-1024x576.jpeg)