方中信驚囡囡俾男人呃 莫可欣:佢係呷醋外父
不過， 方中信 自己不想被人管，但就管實個女，好驚囡囡被男人呃，更考慮將來請私家偵探！可欣呼籲其他小男生，暫時勿考慮迦晴做女朋友，「唔好搵佢做女友呀，好大鑊㗎！要過外父嗰關，佢係超級呷醋外父呀！」
●撰文：Ling
●攝影：Clay Lam（部分相片由受訪者提供）
●化妝：Kings@KINGS MAKEUP
●髮型：Hei@KINGS MAKEUP
●場地：MioXpace（tel: 9711 9533）
搵私家偵探起男友底
迦晴性格開朗好動，課餘興趣班一籮籮，游水、網球、體操、跳舞、中文、數學及法文等，接觸到好多朋友仔，可欣笑囡囡重桃花，惹來狂蜂浪蝶，「佢好容易交男朋友，去親邊個遊樂場都有男仔黐住佢，返學、上堂又係，唔知點解佢咁重桃花，我老公好驚㗎。」
方中信外表cool到爆，原來內心好慌張，加入了獨生女爸爸group一齊分憂，「呢班係迦晴同學仔嘅家長，都係獨生靚女，佢哋group埋一齊好friend㗎，佢哋乜都講，一講到個女將來就好驚，個女俾人媾點算呀？Oh my god！要搵私家偵探呀！」
爸爸VS哥哥 誰靚仔啲？
為免迦晴行差踏錯及釋除丈夫疑慮，可欣提早向她展開性教育，「佢開始大個，有時會自己同朋友去玩，我會教佢唔可以跟陌生人行開，唔可以俾人摸，同埋家計會有本性教育書專俾3至6歲小朋友睇，唔會太複雜，最少俾佢知道男女有別。仲同佢講第日識男仔要搵個對你好嘅，因為佢鍾意靚仔，佢睇韓劇會講邊個靚仔，邊個唔夠靚仔，我就話唔可以單睇外表，要睇埋係咪對你好囉。」
講到靚仔，爸爸方中信合格有餘，迦晴卻擰擰頭，如果與媽媽的偶像哥哥張國榮比較，誰較靚仔？「爸爸。」被阿女讚靚仔過哥哥，方中信應該好開心吧！可欣笑稱小朋友對靚仔的眼光不同，「早前哥哥死忌電視有重播哥哥嘅戲，我叫迦晴一齊睇，呢個就係媽咪偶像喇，佢竟然話He is not really handsome。」
浪子變顧家慈父
未有小朋友前，方中信與莫可欣都很獨立，各自各工作，生活自由自在，從沒計劃生小孩，2008年上天賜予他們一個小女孩，隨即收拾浪子心情學做父母，可欣坦言女兒改變了他們的性格，她放棄幕前工作專心湊女，閒時做慈善工作，方中信則孭起頭家，她覺得丈夫最大轉變是改善了脾氣，變得顧家。「佢依家會多咗從我哋角度諗，始終我哋係一個family，我同囡囡需要佢照顧，以前係各顧各㗎嘛，我又有返工，佢自己去拍戲，大家都幾獨立，依家佢就孭起成頭家嘅責任，做每一樣嘢都以家庭行先，唔再係個人出發點。」
家庭事業要兼顧得宜，未必人人做到，方中信開頭便因工作忽略了女兒，可欣說：「個女三歲前，同佢唔係好熟咁，爸爸成日唔喺香港都冇乜所謂，但大個開始識諗，爸爸去橫店拍戲走咗成個月，佢日日都話好掛住爹哋，幾時返呀？」
做黃大仙氹囡囡
為了氹囡囡開心，方中信不理太太禁止，每次返港都會偷偷帶她買玩具，可欣形容他就像女兒的「黃大仙」，「阿女知道我唔會買，就靜雞雞打俾爸爸叫佢買玩具、買雪糕，我會反對，我覺得所有嘢應該由阿女自己賺番嚟，唔係佢叫就要俾，例如做完功課、做好某一樣嘢先可以俾雪糕佢食，當然爸爸咁少機會同佢一齊，就做咗黃大仙有求必應。」
可欣曾勸丈夫別做黃大仙，縱壞了女兒，「小朋友學嘢好精，佢問我拎爹哋電話我都唔知咩事，原來想打俾佢叫佢買雪糕同玩具。」經勸喻後方中信沒甚反應，可欣習以為常，「佢係咁㗎，佢冇乜反應其實聽咗入腦，平時大家睇到嘅佢喺屋企都一樣，都係咁cool。」
香港學堂重個人發展
教育方面方中信全權交由可欣負責，自己從不插手，可欣感謝他的信任，「佢好少讚人，但佢都覺得我教得個女幾好。」迦晴現就讀西貢國際學校香港學堂小一，可欣覺得女兒升小後長大了許多，變得非常健談，「以前講嘢比較怕醜，依家講嘢叻咗好多，成日一輪嘴，同埋個人開朗咗好多，可能同學校環境有關。」
可欣睇中香港學堂IB一條龍教學，而且近屋企，學校理念亦符合她的要求，「學校小班教學，重視個人發展而非一班發展，老師會按學生嘅長短處再針對幫助，唔係間間學校做得到。」
資助基層生瑞士遊學
在瑞士長大的可欣，希望女兒從小接觸不同文化人士，因此非常喜歡她的同班同學有15個國籍，了解每人獨特一面，課餘亦會一家三口到外地旅遊，擴闊女兒眼界。不過，並非人人讀得起國際學校，或者出國遊學，可欣現時的工作就是致力推動基層遊學計劃，今年她擔任慧妍雅集TES（Travel Experience Share）創遊樂項目主席，甄選10間學校共30名有潛質學生，資助他們7月展開13天的瑞⼠遊學之旅。
TES今年第四年資助學生往歐洲遊學，過往曾到英國及德國，改變了不少學生，其中一名基層女生去完英國後，申請了當地一間頂級大學，表上以英國遊歷介紹自己，獲學府有條件取錄，只要應屆文憑試合格便可，可欣對計劃成效理想感到興奮。
近年瑞士成了新興遊學熱點，旅行社紛紛開辦遊學團，自小學移民到瑞士讀書的可欣，覺得瑞士由於語言不通問題，未必適合長期讀書，但該國是聯合國《2015年世界快樂報告》的榜首，香港僅排72，絕對值得學習，可欣建議有興趣前往的學生，勿只往旅遊景點，瑞士是民主國家，人民水平高，環保工作佳，希望學生了解過後，能有所啟發回饋香港。
方中信咬屁股？
平日有型有款的 方中信 ，返到屋企變成慈父，鍾意同個女玩，個女瞓着覺都要咬屁股弄醒她！
