林子博感謝亡妻 生前已整理好兒子中一自行分配申請所需文件

林子博為太太Shirley上年不敵癌魔

林子博與太太Shirley於2003年結婚，二人育有一對仔女，現時大女15歲、兒子11歲。前年Shirley確診患上罕見癌症「平滑肌肉瘤（腹腔）」第四期，一直努力受電療與化療，而林子博細心照顧太太並尋覓名醫及根治方法。然而，Shirley病情惡化需再度入院，終不敵癌魔離世。

林子博為囝囝搵中學 太太已整理妥當

近日中一自行分配學位申請本月18號截止，林子博都趕及截止前為11歲兒子林卓楠提交申請表。他在facebook發帖文，「一直以嚟我都以為自己係一位稱職嘅爸爸，甚至比我太太做得更多、更出色！因為好多關於子女嘅事都係由我親力親為，如家長日見老師、為子女申請證件、搵學校等等。」

感謝太太造就他成為「稱職爸爸」

林子博又指：「但而家先發現原來我呢個所謂嘅稱職，由始至終都係由我太太一手造就出嚟！因為冇人再提住我幾時證件到期？家長日係邊一日幾點鐘？重要文件擺喺邊？我根本一頭霧水。

而家正值係「中一自行分配學位」交表時間，要喺兩個禮拜內幫卓楠交表去佢心儀嘅中學，除咗每日要提住自己要快啲交表之外，當要搵個仔過去呢幾年嘅成績表時，先發現太太原來早巳將子女由幼稚園開始嘅所有成績表、獎狀、證書「keep起」，而且仲一張一張咁整理得井井有條，方便我呢個所謂嘅稱職爸爸，拎起個File就行得！唔使「揦手唔成世」！」

網民鼓勵林子博

網民都留言鼓勵林子博「好唔容易，好多適應！盡左力就得！」；「加油！子博爸爸，你係一個絕世好爸。」；「林太會在心靈上支援你，你做得好好，大家在一起時互相支持，各有分工，現在就辛苦你！」