林海峰

林海峰指遭Anson Lo「遮」半邊臉被批小器 同玩謝教主一事有關?收服天后彭玲結婚24年 16歲細女愈大愈䚍

熱話

廣告

林海峰 Jan向來有口才又有急才,幽默搞鬼自成一格,不時為大家帶來歡樂。在剛過去的《2021年度叱咤樂壇流行榜頒獎典禮》以假動作式揭曉「我最喜愛的男歌手」,令Anson Lo盧瀚霆一度以為自己有獎拎,事後他被部分神徒(Anson Lo粉絲)、家人批評玩過火。

原文刊於:東方新地

林海峰爆遭Anson Lo「遮」半邊臉被批小器

林海峰近日在社交平台上載一張相片,影住兩張街邊廣告。上面一眼就望到是「教主」Anson Lo盧瀚霆的廣告,但原來底下還有另一張廣告,正是他代言的另一款飲品牌子廣告。被遮去上半邊面的他沒有生氣,而是笑言:「若能看見藍天、望到白雲、我願不忘記感謝神!#神啊救救我吧 #Happyfriday」帖文得到萬3個讚好,認真誇張。

林海峰
(圖片來源:Facebook@林海峰Jan Lamb)

其他網民留言時非常識做,馬上幫Anson Lo口,指他的廣告能為林海峰遮太陽,又指:「好似你咁出色嘅男人,就算被Anson Lo遮剩得個嘴,都好似漆黑中嘅螢火蟲一樣,咁鮮明,咁出眾,神徒撐你」、「JAN 我即刻走咗去睇你個廣告呀,補番數,唔好嬲嬲豬啦!」亦有網民叫他要學會感恩,不要太過小器:「有神為你遮風擋雨,要感恩」、「唔好咁小器啦」、「Feel到你好大怨氣」。有人猜測是「神徒」因年初頒獎禮事件為Anson Lo報仇,有網民狠批放置廣告橫額的工人不尊重林海峰:「都唔係做到咁呀!人地都係一個廣告呀」、「掛呢幅嘢嘅人係邊位?咁大膽無大無細」

林海峰
(圖片來源:Facebook@林海峰Jan Lamb)
林海峰
(圖片來源:Facebook@林海峰Jan Lamb)
林海峰
(圖片來源:Facebook@林海峰Jan Lamb)

玩大咗被神徒鬧爆無品 親解背後原因

林海峰今年在《2021年度叱咤樂壇流行榜頒獎典禮》負責頒發「我最喜愛的組合」和「我最喜愛的男歌手」兩大獎項,揭曉「我最喜愛的男歌手」時,他特意說了一句:「恭喜Anson Lo……」令Anson Lo非常錯愕、驚喜,一度以為自己得獎而站立,身旁的MIRROR成員都連忙恭賀他,想推他出領獎,差點重演「關家姐事件」。但林海峰馬上澄清:「恭喜Anson Lo……今年好忙啊!」並指得獎者其實是姜濤,真是心血少都頂不順。

雖然被戲弄的Anson Lo大方表示不介意,又認為此事非常搞笑,不過有神徒湧到林海峰的社交平台下留言,批評他玩得太過份。昨日(1月3日)他在電台節目《在晴朗的一天出發》親自解說當晚事件,谷德昭大讚林海峰的環節令候選者「來回地獄又折返人間」,林海峰指那一晚甫回家其實已被家人責罵:「我聽到第一句「『過份咗!』我諗呢次死喇,呢次弊!咁我即刻攤喺度反思!」不過他想了一想,覺得結果是正面:「我睇網民留言,鬧我過份、無品……對我嚟講無乜所謂,好小事,佢哋根本每一句都係講對Edan、Anson Lo、姜濤、Mirror嘅愛。我係感動嘅,嗰啲力水係來自對佢哋嘅愛先有咁嘅反應。」

他解釋自己不能控制觀眾反應︰「我個稿係『恭喜你,Anson Lo……好忙!我綵排過,幻想到觀眾嘅反應,我應該停半秒定停一秒好?但我無辦法估計現場嘅反應,反應勁到我想繼續講埋落去都接唔到。當下我已經知道,無喇今次,聽朝一定……我啱啱想睇邊個位入『好忙』嗰句,隔離嗰個E先生(Edan)已經『冚』埋去,啲觀眾已經嘩嘩嘩!Anson Lo就攤咗喺後面,你知Anson Lo係個幾好嘅人,好可愛!」谷德昭讚Anson Lo的真實反應好可愛,證明他很善良。

他指自己作為頒獎嘉賓有責任令觀眾興奮,亦相信MIRROR心理質素夠強大,而且感情好,玩完都不會有芥蒂︰「我嘅責任係令大家好興奮,我覺得可以咁做,因為佢哋個個都係比賽出嚟,佢哋比起其他人嘅能力高幾倍。第二係佢哋之間嘅感情,佢哋一Team人,All in one,尤其係佢哋兩個(Anson Lo、姜濤),以佢哋嘅友誼,我覺得可以咁做!」

林海峰
(圖片來源:商業電台《2021年度叱咤樂壇流行榜頒獎典禮》截圖)

收服樂壇天后24年52歲彭羚凍齡有法

才子DJ林海峰與九十年代樂壇天后彭羚於1998年結婚,生了兩個寶貝女。彭羚曾經橫掃大小樂壇頒獎禮,95年更同時奪無綫《最受歡迎女歌星》、《叱咤樂壇女歌手金獎》、《新城勁爆女歌手》及港台《優秀女歌手》四個大獎,跟鄭秀文鬥得難分難解,但自細女林清於2004年出世後便決定退出樂壇,專心做林海峰背後女人,相夫教女。現在一家四口非常幸福,她亦甚少在電視螢幕前露面。

轉眼間大女林泳已滿21歲、細女林清亦已經16歲。女兒踏入青春期後,彭羚迷上新興的Gyrotonic運動(又稱禪柔運動或脊椎螺旋運動),在位於淺水灣、市值近一億的的南山別墅設置私人健身室,經常上載運動時的影片、相片到社交平台,52歲身材仍然好好。

16歲細女林清初長成潛力十足 林海峰緊張大師上身

林海峰作為囡囡的前世情人,當然特別緊張。大女世界想管都管不住,趁住細女林清仲聽話聽教,林海峰夫婦採取呵護姿態去到邊都跟到實。

林海峰 早前林氏夫婦陪實林泳去買鞋。
早前林氏夫婦陪實林泳去買鞋。(圖片來源:東方新地照片庫)

早年由名校女拔轉至港島區國際學校,一頭長髮身穿超短校服裙的林清一放學就被司機接走穩穩妥妥送回家。而來回學校路線以外,林海峰只要不用工作都盡量跟足,點對點呵護接送,曾被影到跑住步等囡囡補習。

林海峰去邊都拖實細女,父女感情好到令人羨慕。早於2020年一月中,本刊影到林海峰與細女林清現身中環,其時新冠肺炎開始肆虐,兩父女無罩出街食飯,飯後各自拎住個外賣盒,阿女仲翹實爸爸﹐穿梭街市。咁又係,對於爸爸來說,對女兒肉緊點都是人之常情。

其實不經不覺,林家二小姐亦都已經初長成。20歲林泳高過媽媽彭羚,15歲林清都不弱,高度已經同林海峰並排、身形瘦削手長腳長、長髮飄飄加上一身健康膚色一樣潛力十足。囡囡亭亭玉立,少女味出晒來,難怪爹哋要睇緊點,林清落街買條法式麵包都要親自拖實。

21歲大女林泳英國留學 品學兼優外形出色無意入行

外界目光一向集中在同阿媽好似餅印大女林泳身上,她本來去了英國留學,去年因為英國成為新冠肺炎嚴重感染地,及早返港避炎。養到個女廿歲才放手讓她出外留學,可知林海峰與彭羚有幾緊張個女,據知情者透露:「Cass由細到大親力親為湊女,全家都紥根香港,點會捨得兩個女去外國讀書。不過林泳同林清都讀國際學校,出去留學都係遲早嘅事,大女讀到中學畢業先走已經算遲,不過去唔夠幾個月就返嚟,真係意料唔到。香港發現有肺炎確診時,阿Jan都覺得可以睇定啲,到英國嘅個案愈來愈多,當地政府仲話無資源去醫病,華人學生又受到排斥與騷擾,佢同Cass都好擔心,決定即時幫個女買機票,書幾時都可以再讀,梗係個女命仔緊要啦!」

林泳現現在雖然有拖拍,但要遵守社交距離與男友暫時不見面,好在仲有妹妹為伴。她們曾勇闖淺水灣,穿上三點式泳衣,盡情享受陽光與海灘。兩姊妹動靜佳宜,林泳仲帶了書本去沙灘邊乾煎邊睇書,不會齋玩手機,可見林海峰與彭羚教女有方,教出兩個身心都健康的囡囡。

兩姊妹期間沒有任何交談,即使有男泳客對她們下注視禮,她們都全不知情。曬了一段長時間,成本書都差唔多睇完,林泳與林清才動身下海,兩姊妹往水裡過了一個冷河,之後便收拾物品準備離開。林清雖然比林泳細五年,但她的身高已直逼家姐,林氏姊妹花同樣擁有健康的體形與膚色。有家姐林泳負責孭袋裝雜物,林清兩手空空,林氏一家住在淺水灣南山別墅,雖然非常之近沙灘,但林泳亦打電話call司機揸車接她們返屋企。直到去年9月,林泳已回英國開學。

有指林泳被指盡得母親遺傳,成為英皇、東亞兩大唱片公司爭相簽約對象,林海峰指女兒無意入行,但作為課餘活動或就無所謂。

圖片來源:Facebook@林海峰Jan Lamb、東方新地照片庫、IG@casslamb、商業電台《2021年度叱咤樂壇流行榜頒獎典禮》截圖