楊潮凱

楊潮凱與中學初戀定終身 首披露求婚過程 愛妻號2招寵愛19年 怕傷害太太拒出軌【五味人生】

熱話

楊潮凱 今年37歲,13年跟初戀情人江玉儀Michelle結婚,18年太太為他誕下女兒楊心悅Catherine。一個入娛樂圈做藝人,一個成為中學老師,一家三口過著幸福家庭生活,令人羨慕。今次Sunday Kiss邀請到他接受訪問,跟大家分享他的愛情故事,他亦會首度公開求婚過程。

資料、圖片授權:受訪者楊潮凱|圖片來源:部分圖片由受訪者楊潮凱提供

同老婆相識過程如青春劇 全靠老師「撮合」?

11月25日是楊潮凱和初戀情人兼太太拍拖的19周年,楊潮凱表示:「我覺得我好幸運!」回想19年前,他還是一名中學生,在母校重讀一年,這時他留意到Michelle從名校來到他的母校讀中六課程:「一個名校女仔入嚟我哋學校讀書,係一個件好奇妙嘅事。」當時剛好大家都有選讀經濟科,在老師的「撮合」下,他們開始了解大家。談到這裡,他不禁甜笑:「嗰個老師好好,其實某程度上係佢有意無意撮合我哋,我問經濟嘅時候,佢(現任太太)會喺隔籬,搭到話題,認識一吓呢個女仔。」

楊潮凱
(圖片來源:[email protected]

初戀緣定終身非她不娶 拍拖受家人「阻礙」

他坦言一開始跟普遍男生一樣,都是因為對方的美貌而喜歡她,後來才發現Michelle不但有外在美,內在更美:「談話中發覺佢好爽朗,佢令我驚喜嘅係每一次當要搬枱、搬凳,佢就直接過嚟搬,我好鍾意佢嗰種好爽朗,唔造作嘅感覺,令我對佢嘅印象好深刻。」

他們那時用通訊軟件ICQ談天,但不是很順利:「夜晚『噢噢』佢,嗰時好慘,因為係56K嘅年代,好耐先可以上一次網,又要同人爭電話線。以前係上咗網就唔可以打電話,要同哥哥爭,佢可能傾電話,但我想上網,就要爭一個時間,用好短嘅時間就同佢ICQ。佢屋企都好嚴格,嗰時唔可以畀佢傾太多電話,喺夜晚嘅時候就唯有用ICQ,同佢傾多一句都好開心。」

他大讚Michelle是個很完美的女生:「你會愈嚟愈覺得呢個女仔係好值得你去喜歡佢、呵護佢,因為佢係一個好有主見嘅人,當然佢都有溫柔嘅一面,成日想你去陪佢,但佢同時都可以好獨立。所以當我要去出Trip,其實完全唔使擔心佢,她可能勁過我,佢照顧自己嘅能力好強,我好需要個咁嘅一個伴侶。」

楊潮凱
(圖片來源:[email protected]

首度披露浪漫求婚過程

楊潮凱指自己是一個不夠浪漫的人,但他也會很盡力去做些事令另一半有拍拖的感覺。被最到最浪漫的行為,他馬上想到求婚:「已經係我人生做過最浪漫嘅事,暫時我未諗到可以點超越嗰次。」他指當年他們一早有共識會結婚,但他覺得求婚是需要有儀式感,不可以馬虎了事,所以特意跟兄弟聯手,在台灣進行求婚計劃: 「我第一次講,未試過講,我買咗個中式嘅盒,造咗四、五個錦囊,每個錦囊都裝咗一張紙。我計劃咗一個三日兩夜嘅台灣旅行,我就同佢講:『我們就第十二、三周年,我有一個驚喜畀你,咁你就等啦。跟住落嚟呢24小時你搵唔到我,你都唔好諗住搵我,總之你每隔一個鐘就打開一個錦囊,我會話你知你要準備啲咩。』」然後他就偷偷跟另外兩個兄弟飛到去台灣十份,在天燈上寫滿愛情宣言,準備好一切。

另一邊廂,Michelle已經拆開頭幾個錦囊,被告知需要準備好護照,出發去機場。去到機場的時候,她就拆了尾二那個錦囊,裡面有一張機票,她拿著機票上機,他就在台灣台北機場接她。他們回到酒店,放低行李,他叫對方換一件漂亮的衣服,然後帶她到十份放天燈,他就躲起來,準備求婚:「我同佢講:『你先寫天燈!』我同兩個兄弟、天燈鋪老闆娘已經夾好計,兄弟喺後面準備好之前寫落嘅天燈,我匿埋喺天燈後面。老闆娘就帶佢行出嚟,好似拍戲咁,點著咗天燈,升高咗就見到我拎住束花求婚。」2013年,楊潮凱與Michelle於拉埋天窗。

楊潮凱
(圖片來源:[email protected]
楊潮凱
(圖片來源:受訪者楊潮凱授權圖片)

相戀19年用2法維繫感情 坦言多年來有色心無色膽

拍拖19年,楊潮凱與Michelle恩愛如初,他指信任二字很重要:「大家嘅電話都係擺枱面,就算知道大家嘅密碼都唔會查大家。總之電話響嘅時候,佢話:『你電話響喎!』,唔會睇,又唔會查大家嘅WhatsApp。當信任建立得好好,就會唔想破壞佢,大家就好努力去維繫關係。」他強調:「好坦白講,我覺得我好難再搵到比佢一樣咁信任我嘅人,而呢份信任係會導致大家嘅關係長久。」

他認為感情上兩個人都要付出:「當然唔能夠永遠只要求對方付出,你一定要要求自己都付出,例如你要知道自己嘅弱項係咩,例如我嘅弱項係我唔夠浪漫,咁我就要做多啲嘢令到自己浪漫啲,令對方仍然有戀愛嘅感覺。」

被問到經歷兩個七年之癢,有沒有精神出軌過,他坦言自己曾有色心,但絕不會做出背叛另一半的事:「你話無諗過就真係騙你,男人正常都會有嗰種色心,但我係無膽色嘅人,怕傷害到我嘅另一半。因為我經常都會易地而處:佢咁做﹐我會唔會唔開心?我會有好大嘅傷害…你就知道應唔應該做嗰件事。」

最後這位「愛妻號」再一次灑糖:「所以我就保持住呢幾件事去維繫我哋嘅關係,想講我好好彩,如果我唔好彩,遇到一個唔係咁諗嘅伴侶,我就已經無咗呢段關係。」

楊潮凱愛情【五味人生】
(圖片來源:受訪者楊潮凱授權圖片)

延伸閱讀:楊潮凱為湊女3年出街食飯廿次 嚴父1招令囡囡變乖:有啲父母唔認同【五味人生】

FAQ
問:楊潮凱與太太是怎樣相識的?
答:楊潮凱在母校重讀中六時,留意到太太Michelle從名校來到他的母校讀中六課程,當時剛好大家都有選讀經濟科因而認識。

問:楊潮凱向太太求婚的經過是?
答:楊潮凱特意跟兄弟聯手,在台灣進行求婚計劃。浪漫求婚過程

常見問題

楊潮凱與太太是怎樣相識的?

楊潮凱在母校重讀中六時,留意到太太Michelle從名校來到他的母校讀中六課程,當時剛好大家都有選讀經濟科因而認識。

楊潮凱向太太求婚的經過是?

楊潮凱特意跟兄弟聯手,在台灣進行求婚計劃。浪漫求婚過程

圖片來源:受訪者楊潮凱授權圖片、[email protected]

你又點睇?

更多精選內容