正日生日雨中漫步 余文樂 拖有米台妹女友撐枱腳
余文樂 想盡快生BB
去年到台灣拍《春嬌救志明》，余文樂撻著台灣「皮帶大王千金」王棠云，二人迅速打得火熱，去年底，余文樂更罕有在lG放閃公告戀情。雖然拍拖未夠一年，但余文樂同女友已有結婚計劃，家在台灣的王棠云，更搬入余文樂月租12萬的淺水灣寓所留港待嫁。
女友婚前驗身
上周三（15日） ，王棠云一個人由余文樂淺水灣寓所，坐的士到中環中建大廈，似乎唔多熟路，只見她一個人在大廈地下睇水牌搵地方，然後會合助手，由助手陪同上16樓的診所。據知情人仕透露：「樂仔已經plan緊結婚，難得佢同女友都咁鍾意小朋友，所以都想盡快生BB !Sarah咪做定婚前驗身囉！」
正日生日女友陪撐枱腳
剛拍完內地劇的余文樂正在休假中，上周一（13日）是其36歲正日生日，大日子當然要同最愛度過，下午兩時多，余文樂同女友王棠云從淺水灣寓所出發，駕住上月才新購入的林寶堅尼跑車，載女友到中環Soho區撐枱腳，快將好事近，兩人當日表現特別甜蜜，雖然落住毛毛雨仍無損心情，余文樂擔住遮同女友索性雨中漫步，行去荷李活道上樓上食肆撐枱腳，只見王棠云不時成個身挨埋男友度行。
潮戴婚戒
當日余文樂同女友手上都戴住婚戒，話晒係潮人，婚戒都潮過人，余文樂專登在日本訂製，唔係有錢就買得到，還要透過友人幫手才能成功購入。
永遠在一起
其實生日當晚，余文樂已在社交網放閃，除咗有紅色心型生日蛋糕，仲有一大盤朱古力豆，他留言寫道：「Thank you for everything」，好明顯是女友為他準備，在朱古力豆上更印上（SS17 Forever）等字款， SS正好代表二人英文名Shawn及Sarah的縮寫，至於（17 Forever ），網民就猜估係「一起 Forever」，寓意「永遠在一起」，真係唔使食到甜到漏！
融入男友家 行奶奶政策
拍拖不久，王棠云已經融入男友家中，本月14日，余文樂同家人吃生日飯，她就同男友家人就打成一片。據知情人仕透露：「Sarah講好夜晚會親自下廚，嗰日樂仔就先同女友出去撐枱腳，然後再返屋企準備。其實同Sarah拍拖冇耐，女友已經入晒屋，Sarah仲行埋奶奶政策，唔會一味霸實男友，就算去自己生日旅行，佢都唔介意同埋樂仔屋企人一齊去，等大家可以相處多啲咁話，未來新袍咁細心，樂媽梗開心啦！咪開晒綠燈，想個仔快啲成家立室！」
同樣喜歡小朋友
除咗阿媽開綠燈想飲新袍茶，36歲的余文樂近年亦修心養性。自從同Sarah一齊之後變得好黐家，亦少有再去夜蒲，Sarah得閒也留在家鑽硏烹飪，而且二人同樣喜歡小朋友，真係好夾！
