推出全新單曲《飛得去旅行》王菀之親錄廣播陪大家搭機場線

王菀之親錄廣播

近日外遊以及隔離政策放寬，大家終於可以去旅行！只要搭機場快綫，大家將可以聽到一把又熟悉又親切嘅聲音 : 「以下係機場快綫嘅廣播，眼睛想旅行咗咁耐，終於飛得喇！我機鐵仔同我王菀之，陪你興奮出發，祝各位旅途愉快！」除此以外，Ivana亦錄製不同嘅車站廣播，實行由Ivana同機鐵仔陪大家搭機場快綫興奮出發！

新單曲《飛得去旅行》

今次同機場快綫嘅合作，Ivana表示十分開心，「好開心佢地邀請我聲演機鐵仔，我覺得機鐵仔好得意呀，我同佢一樣圓碌碌，隻眼又係得一點，佢同我好似樣，哈哈。」同時Ivana亦主唱了機鐵仔最新單曲《飛得去旅行》，歌詞搞鬼得意，單係聽歌就已經令人個心都跟咗Ivana出發去旅行， Ivana自己亦好鐘意呢隻歌，「隻歌嘅歌詞改篇後，令人有好多去旅行嘅幻想, 錄音時一路唱個陣，我都唱得好開心，黎明Leon呢首《眼睛想旅行》咁經典，我好榮幸可以唱多個改篇版，希望能夠成為大家日後去旅行，每次執行李都會諗起嘅歌啦。」

去旅行計劃

講到幾時放假去旅行，Ivana坦言要過埋12月，「手頭上仲有好多工作，試過想偷走幾日，但最終都係失敗。依家最快都要等12月頭 《Ivana x Serrini Fairy Nice To Meet You Live 》個騷完左先可以諗。無論係點，2023年頭都會飛啦，因為我要去美國工作同演出。之後希望可以走多轉東京，我三年冇去啦，已經諗好晒去邊，哈哈。」Ivana又話去機場多數都選擇搭機場快綫，機場快綫仲因為今次嘅合作，話免費贊助她日後搭機場快綫，令她十分開心，「依家我諗起搭機場快綫會聽到自己把聲，都覺得好得意，我可能會忍唔住扮機鐵仔係車廂唱歌，哈哈。」

MTR Youtube