研究

加拿大研究:聞伴侶嘅衫可減壓

熱話

廣告

每當個C6(死佬)返到屋企,好多時佢哋件衫都會有啲體味,洗衫個時聞到佢哋件衫啲味有時都幾難頂!不過,所謂「情人眼裹出西施」,喺伴侶眼中,另一半嘅體味就算係幾臭都好,你都會好鐘意聞。最近就有研究指出,女人聞另一半嘅衫原來係有減壓作用,快啲攞個C6啲衫嚟聞下啦!

撰文:Kammy|圖片來源:Instagramistock

研究:女人聞老公嘅衫可減壓

加拿大卑詩大學(University of British Columbia)喺《性格與社會心理學期刊》(Journal of Personality and Social Psychology)刊登咗一項關於聞衫味原來可以減壓嘅研究。

研究中,搵嚟96對異性伴做實驗,當中研究人員畀48位男士一件乾淨嘅衫,並要佢哋喺唔用任何止汗劑或香水嘅情況下着足24小時。其後,再畀其女性伴侶分別聞3款衫,包括冇氣味嘅衫、有伴侶氣味嘅衫同陌生男子着過嘅衫。

另外,研究人員為為48位女士做壓力測試,當中包括安排模擬面試同進行心算。測試過程中,研究人員亦採集咗佢哋嘅口水樣本,分析當中嘅皮質醇濃度。

研究結果發現,當女性聞過伴侶嘅衫後,即使身處壓力環境都可以覺得好平靜,皮質醇水平亦較低,所以當另一半「喪聞」你件衫時,其實佢都只係為咗減壓啫!

研究:聞陌生人氣味 壓力會增加

另外,研究又指出,原來當女人聞到陌生人嘅衫時,佢哋會分泌較多皮質醇,即代表佢哋感受到壓力。研究表示,有呢個結果可能係因為從少就教女性要小心陌生人,令佢哋自幼就較害怕陌生人,尤其會特別抗拒陌生男性,所以引起壓力嘅反應!

你又點睇?