管教仔女難上難-港媽求大眾勿拍片公審扭計小孩 撰文吐真相否認唔識教女

管教仔女難上難-港媽求大眾勿拍片公審扭計小孩 撰文吐真相否認唔識教女

管教 仔女是很多父母的一大難題,要管教自閉症與專注力失調及過度活躍症(ADHD)患者更加難。一名港媽在社交平台發文剖白管教一名擁有輕度自閉症與專注力失調及過度活躍症女兒的感受,訴說湊女時遇到的難題與無助。她希望大眾給予多點同理心,不要拍片公審責罵無辜的小朋友。帖文獲得很大迴響,很多人力撐港媽。

撰文:Clara | 資料、圖片來源:專注力促進會官網、兒童體能智力測驗服務政府官網、「生仔要考牌」、shutterstock

港媽訴說管教女兒辛酸

港媽表示其女兒是輕度自閉症與專注力失調及過度活躍症患者,每日都會無止地重複同一個行為,而且完全不聽教,手上有甚麼都可以拿起來玩:「早上叫極唔起身;放學後叫極都唔做功課;做功課時遊雲,走咗去做其他嘢;食飯食個幾兩個鐘;叫沖涼叫咗成半個幾鐘都仲未肯去;夜晚叫好耐都唔肯上床瞓覺;就算上咗床,自己一個都可以唱歌講嘢。」港媽用溫柔聲線,女兒都不會聽,每次要用到最大聲、最惡的聲線,女兒才會發脾氣做,她說:「以上事件每日必經,仲未計其他嘢⋯⋯平時照顧佢,我都已經身心疲勞。」

港媽訴說湊女辛酸:身心疲累
港媽訴說湊女辛酸:身心疲累

被外人指罵 拼命自責

港媽曾經看過好多育兒書籍,又上網翻查有關其女兒病症的資料,軟硬並施地管教女兒,然而無論她用甚麼方法都是沒有幫助。很多街外人,甚至連家長都指責港媽不懂管教仔女:「你唔識教啫!」、「你縱佢啫!」、「教到佢咁曳!」、「咪點點點教囉,點會唔得啫?」、「點解人哋得,你唔得?」、「唔識教唔好生」令她很沮喪:「當時我覺得自己好無用,唔識教好自己個女。又唔知係唔係我懷孕時,唔知食咗啲咩,又或者無好好餵母乳,佢先會有呢個病。」

被外人指罵拼命自責
被外人指罵拼命自責

希望大眾給予諒解

後來港媽發現原來女兒患有那些病是無任何原因,亦與她的管教問題無關:「大家有無諗過,我哋比一般父母更勞心勞力,更用心照顧小朋友?有邊個唔想自己小朋友無病無痛、正正常常、聽教聽話?你哋知唔知呢句說話係抹煞晒所有父母,特別係我呢類情況嘅父母嘅努力?唔係因為佢哋曳,唔係我唔識教,唔係我無用,唔係我累到佢咁⋯⋯佢哋係知道自己呢啲行為係唔啱,但佢哋控制唔到自己。」

港媽希望透過這篇長文讓大眾更加了解這個病症,她表示對受困擾人士感到抱歉,但仍想得到大家的體諒:「如果有一日喺街上,大家遇到有啲好曳、唔聽話、情緒失控嘅小朋友,可唔可以包容同體諒一下,唔好拍片擺上網公審,唔好一句「唔識教唔好生」嚟發洩你嘅不滿?」最後她鼓勵有同樣經歷的父母:「辛苦你哋喇,你哋嘅努力同用心嘅照顧,小朋友係感受到,所以唔好氣餒,大家一齊加油。」

家長網民表示理解

不少網民留言支持港媽:「從來都唔係針對小朋友,問題都係大人。好多家長揸住雞毛當令箭,口口聲聲話小朋友係咁,就好似大晒咁橫行霸道。」、「小朋友的確會容易影響到旁人,例如在車上大喊大叫,難道不讓他們外出嗎?」另外有不少家長網民指他們的仔女有同樣病症,紛紛留言對她表示明白:「大仔是亞氏保加,小學階段給班主任嫌棄,放棄,我真的很心痛。」、「我仔同你女完全一樣,叫佢做嘢叫幾百次先去做,成日唱歌,唱到我覺得佢煩,叫佢唔好唱,收聲後2秒再嚟過」

家長網民表示理解(facebook截圖)
家長網民表示理解(facebook截圖)
家長網民表示理解(facebook截圖)
家長網民表示理解(facebook截圖)

甚麼是自閉症與專注力失調及過度活躍症?

「自閉症」可按其嚴重程度和徵狀種類可分為自閉症、自閉症傾向和亞氏保加症 (英文全名:Asperger’s Syndrome)。患者在社交溝通、語言及行為都有不同程度的困難。例如與別人缺少眼神接觸、溝通、詞彙貧乏,難以表達感受、重複無意義的動作、對指示欠缺反應、無理由地堅持某種行為、港媽補充:「自我、固執、自己想點就點、情緒容易大起大落、唔識睇人眉頭眼額等等。」

「專注力失調及過度活躍症」(英文簡稱:ADHD;英文全名:Attention Deficit and / Hyperactivity Disorder),亦有翻譯成「多動症」、「注意力缺陷及/多動障礙」等名稱。患者大多不能集中注意力,所以不專心、坐不定,但對感興趣的事非常集中。港媽補充:「佢哋爭多時會大聲叫喊、發出一啲無意思嘅聲音、講嘢無尾音,好似好無禮貌咁,無論去到邊都會跑來跑去,有啲甚至有攻擊性行為等等。」

甚麼是自閉症與專注力失調及過度活躍症?
甚麼是自閉症與專注力失調及過度活躍症?

關鍵詞
管教ADHD

更多精選內容