純血拔萃仔:我哋贏得問心無愧

純血拔萃仔:我哋贏得問心無愧

拔萃男書院(DBS)是香港數一數二的神級名校,學生讀書掂,運動叻,是不少人眼中的天之驕子。未知是否鋒芒太露,外間對DBS的「負評」愈來愈多,轉直 資,俾人話搞教育貴族化;學界賽年戰年勝,就俾人話係靠「挖角」,勝之不武!甚至名校生之間流傳了一句熱話:「做人不要太DBS!」,DBS彷彿就變成囂 張、霸道的代名詞!不過你有你鬧,DBS今年又再度蟬聯「學界王者」寶座;你話人哋靠挖角,一個純血拔萃仔—DBS游泳隊及拯溺隊隊長高家俊,就理直氣壯 的告訴你:「我哋贏得問心無愧!」

高家俊(Marcus)

拔萃男書院( 中六)
香港游泳代表隊
2013至14年度港九學界游泳賽
50米自由式、50米蛙式及4×50自由式金牌得主

讀拔萃壓力大
Marcus自四、五歲開始就跟隨父親學游水,身為游泳教練的父親一直悉心栽培這個獨子,希望他可以考入拔萃。就在DBS轉直資的那一年,Marcus亦如父親所願成為拔萃仔,不過壓力亦隨之而來。「我小學讀嘅華德學校,係間中文小學,同喺小學部升上嚟嘅比,佢哋用慣英文,我係難適應啲。而且學校讀書勁嘅人好多,喺咁嘅情況下,唔想俾人拋離得太遠,自己都要落力啲去追。」就是校內這種具競爭性的環境,慢慢培養出Marcus的抗壓能力,讓身為運動員的他,有更好的心理質素去應付訓練和比賽。「外界對我哋期望好高,泳隊裏面唔係話個個都好突出,但係孭住『拔萃仔』個名,就有一種承擔,覺得一定要做得好,所以一到學界,去到現場嗰種氣氛,個個都特別有決心去衝,好多時都會游出再游唔番嘅個人best time! 」

專搞小動作?
學界賽事經常成為一眾名校生展開網上罵戰的源頭,尤其游泳是重要賽事,所挑起的事端亦特別多,例如前年就發生過在聖若瑟(St.Jo) 提前向學界聯會遞交報名表後,懷疑被DBS窺看排陣內容,繼而作出調動,並至最後一刻才遞交申請,結果在該屆賽事中險勝St.Jo的事件,Marcus身為泳隊一員,對箇中原委當然了解。「其實參加學界嘅泳手,好多都喺出面比賽見慣見熟,甚至喺同一個泳會練水,大家實力係點,都心中有數,所以根本唔需要搞呢啲小動作。而且我哋學校體育組,有職員專門幫所有比賽去做戰術策劃,佢會攞我哋同其他學校泳隊成員平時比賽嘅時間去做分析,計吓點排先會贏。至於到最後一秒先交表,係我哋嘅慣常做法, 主要係怕有成員受傷要再變陣。」Marcus亦指出,其實他們和友校泳手的關係,並不如外界所想的水火不容,他們亦心知很多時網上的罵戰,都是由一些花生友挑起,所以不會放在心上,並經常一起拿來開玩笑!

贏輸一樣有人話
DBS的王者地位具爭議性,很大程度是因為經常大手向外「挖角」,對於被指靠挖角求勝,Marcus亦坦承負責老師確有向他提議,可邀請有實力的泳手轉校,不過以他的經驗則是失敗居多。「有啲覺得喺原本間學校讀得好開心,冇咁嘅需要;有啲會覺得自己本來係王牌,但過到嚟就變咗副選,所以唔想轉過嚟,依家泳隊轉校生得兩三個,同其他校隊比較算好少。我認識好多轉校生,都係因為本來間學校唔重視體育,佢哋覺得呢度資源同支持都多啲,至決定轉校。」每逢大賽,都會聽到看台上這邊喊着「學界王者,唯我拔萃」,那邊就喊着「真材實料,不假外求」,諷刺意味及火藥味一樣極濃,對於母校常被指為取勝而不擇手段,Marcus就有另一番看法。「中一嗰陣,我都覺得樣樣都要贏係我哋嘅文化,但係到依家,我覺得我哋拔萃仔嘅信念都好一致,就係每次都要以自己嘅頂點為目標,成個團隊一齊做到最好。寧願贏咗俾人話,都好過俾人話我哋買咁多人都輸,總之我哋盡咗力,就問心無愧!」

撰文:Joanne
攝影 :Clay Lam(部分相片由受訪者提供)

更多精選內容