【網民熱話】每次飲奶都剩30cc 新手媽媽上網求助勾出神人拆解

各位爸爸媽媽,你哋仲記唔記得小朋友以前飲奶會唔會成日都飲剩嘅呢?台灣一個新手媽媽就因為BB成日都好準確咁飲剩30cc奶,令呢個媽媽好苦惱。於是,呢個新手媽媽就將呢個30cc嘅迷思擺上「爆廢公社」問,當一眾爸爸媽媽都喺度討論緊呢個BB界嘅迷思,終於有一網民用學術層面解答咗呢個迷思喇!

撰文:叮叮|圖片來源:爆廢公社、新傳媒資料庫|編輯:KM

台母上網問30cc的迷思成網民熱話

台灣「爆廢公社二館」日前爆出一個嬰兒界嘅可怕秘密,事源係日前有一個新手媽媽上「爆廢公社」抱怨話佢覺得BB個奶樽一定有輘輷(景轟),因為BB每次飲奶都會飲剩30cc奶,呢位媽媽仲post咗排奶樽相出嚟,果然如佢所講基本上全部奶樽都剩返30cc奶,係不多不少30cc。呢位新手媽媽於是就推測點解BB死都唔肯飲埋嗰30cc呢,到底係飲完嗰30cc會肚痾定係飲完嗰30cc會爆炸呢?

網民驚掲個個BB都有飲剩30cc嘅共識

新手媽媽嘅貼文發出之後,隨即引起熱議。唔少嘅同路新手媽媽都留言表示「我兒子也是,原來我並不孤單……」、「我家的也是……30魔咒!」仲有網民笑自己個BB係精算大師,每次都算到好準,一飲剩30cc即刻收工,準過精算大師。亦有網民笑指BB識做呀,知道要年年有餘,好意頭呀!有網民表示自己個仔仔細個都係鍾意飲剩30cc,無論自己開少30cc嘅奶定係開返正常份量嘅奶,BB都係會飲剩30cc。有新手爸爸見到呢個30cc的迷思貼文之後懺悔,話自己成日都話老婆拿捏唔到BB要飲嘅奶量,搞到次次都有剩,原來其他BB都係咁……

 

 

30cc的迷思原來同物理學有關

咁多位新手爸媽傾咗好耐,都仲未得出結論到底點解BB次次都飲剩30cc。過咗好耐,終於有網民用學術層面解答咗呢個30cc的迷思。BB次次都飲剩30cc嘅原因係因為奶樽入面嘅液體太少壓力唔夠大,BB要用更大嘅力度先可以飲到剩低嗰30cc奶,咁因為BB都已經飲咗大半支奶,已經處於半飽嘅狀態,既然都飽飽哋,咪費事浪費更多氣力去飲嗰30cc奶啦。而且樽底嘅奶都比較難飲,所以唔飲都無所謂。30cc嘅迷思就此解開,各位爸爸媽媽如果你地遇到同樣情況,BB飲剩30cc奶嘅時候,但你又想BB繼續飲埋佢,你可以打開個奶樽,然後再次將奶樽擰實,咁樣BB就會飲埋剩返嘅奶架啦!

你又點睇?

更多精選內容