那些年……書包內的 經典文具

當年返學,玩具唔俾帶就一定,但返學咁悶,學生哥梗係會搵啲小玩意娛樂一番!而返學人人必備的文具,好自然成為大家花心思去裝備的項目!香味筆、變色筆、變身筆盒及間尺等 懷舊文具 ,大家當年應該買唔少吧?今次一齊重溫一吓!

 

1超舊式塗改液

一講塗改液,大家都會立即諗起藍色支裝的代表商品,其實市面上仲有呢種要自己稀釋嘅塗改液,其實都幾唔方便,但就好襟用,扭開蓋用支毛刷蘸完再塗在紙上,用極都用唔完!唔知而家嘅小學生見到,仲識唔識用呢?

2塗改帶

用塗改液最大嘅缺點就係要等佢乾,而冇乜耐性嘅筆者就成日等唔切就想寫字,所以d筆尖成日都畀未乾嘅塗改液封住咗,搞到寫唔到字。而當年的偉大及明塗改帶,對於應付考試這分秒必爭嘅情況來講,絕對係法寶!仲要唔駛搞到一手都係塗改液!

3碌碌擦膠

用完擦膠唔想一枱都係?咁呢款有回收擦膠碎功能嘅碌碌擦膠就係當年的環境之作,小編仲記得嚿擦膠有陣陣香味啊!

4砂膠

當年窮苦學生冇塗改液係身的話,原子筆寫錯字嘅時候,就要靠砂膠!唔少人都有試過太用力,擦爛書的經驗!

5 擦膠筆

有一段時間,擦膠筆幾乎係必備嘅文具,撳個制就會出嚟,筆者成日都會將成條擦膠撳晒出嚟又放返入去,然後重新撳過,回想的確好低能,但當年就覺得好玩!

 

6香味筆

當年學生哥必備的文具界潮物,用嚟做功課、寫情信或紀念冊等都係靠佢,就係貪佢可以一路畫寫一路聞住陣味!仲記得細個最鍾意橙色,但係又鍾意蘋果味,搞到好矛盾,你當年又鍾意咩味呢?

7閃粉筆

當年亦有一段時間好流行嘅閃粉筆,同學仔之間傳紙仔必用!其實寫喺白紙上面都幾難睇得清楚寫乜嘢,但係細個偏偏就覺得好靚,所以一定要用!不過最衰有時會搞到成手都係!

8變色筆

筆者最鍾意用變色筆嚟亂咁畫,一直不斷來回畫直線,次次出嚟嘅顏色都唔同,又靚又好玩!可惜老師話太花,唔可以用嚟做功課啊!

9 換芯筆

換芯筆又唔駛刨筆,又唔怕斷芯,超方便!不過筆者寫字比較大力,成日都寫到啲筆芯凹返入去用唔到,加上有時唔見咗一粒就唔夠長寫,都幾唔方便!呢支筆仲有一個無聊的玩法,就係由頭到尾,重新排隊換一次………你有冇試過?

10換芯顏色筆

除咁鉛筆芯之外,仲有顏色筆芯版本,一支筆就有晒咁多隻顏色,方便!

 

11變形金剛筆盒

小學嘅時候,識用一定用筆盒,仲要係呢種變形金剛咁款嘅筆盒!筆盒入面有數不盡嘅機關,擦膠、筆刨、間尺都有專尋嘅位置,機關多到好似開極都開唔完咁!進階版嘅話,筆盒表面仲有得玩陣珠或者迷宮添㗎!

12玩具間尺

除咗筆盒有得玩,呢款經典間尺一樣有得玩,不過經常係老師沒收的大熱Item之一!除咗迷宮同彈珠之外,仲可以考自己嘅平衡力,拎起間尺但係要令彈珠停留喺原位唔郁,大家有冇試過呢個無聊玩法呀?

13 畫花間尺

到而家都依然覺得呢款間尺好神奇,只需要用圖中紅、黃、綠嗰3個圈圈,圍住旁邊嘅大圈轉,就可以畫到好靚嘅圖案,好神奇!不過用鉛筆畫就會搞到支筆要再刨過,同埋一枱都係黑色鉛粉!

14方形水彩盒

美勞堂必備!打開入面仲有棉花同埋水樽,仲記得細個會好努力整返乾淨舊棉花,一定要keep住白雪雪!每次美勞堂前一晚,仲會叫媽媽幫手鋪定錫紙喺面,咁就唔怕整花個水彩碟喇。


關鍵詞
懷舊文具

你又點睇?

更多精選內容