鍾嘉欣 帶埋囡囡 撐蘇永康

撰文：Sunday Kiss
圖片：Instagram、新傳媒資料室

鍾嘉欣驚喜現身

蘇永康於今年3月榮升人父，所以近日佢就非常忙碌，飛嚟飛去努力搵多啲奶粉錢！近日佢就飛咗去溫哥華登台，唱吓歌見吓歌迷。全個演唱會令佢最驚喜嘅係，現居於溫哥華嘅鍾嘉欣（Linda）仲帶埋囡囡Kelly去撐場，蘇永康仲即刻share咗佢哋嘅合照～ 留言：「是日驚喜，他郷遇故之感謝您特別到來加油打氣，幸福満瀉的嘉欣帶同真正的嘉欣bb唻探班，在這裡長大的bb笑容特別多！」圖中可以見到Kelly眼仔碌碌，8個月大嘅佢唔單止愈嚟愈多頭髮，仲愈嚟愈似媽咪咁靚女添呀！

思想型女兒 好乖唔扭計

講起囡囡Kelly，Linda話女兒超級、超級乖，唔扭計、唔喊：「囡囡除咗夜晚臨瞓前會喊三、四分鐘，跟住自己就瞓，瞓八個、十個鐘就起身，同埋我覺得佢係思想型嘅，點解呢？因為佢唔介意冇人陪，我要煮飯、處理家頭細務，唔得閒下下抱住佢，我亦都唔想縱壞佢，我每朝起身，幫佢換完尿片，擺佢喺play mat，俾啲公仔佢，佢就自己玩一餐，所以我覺得佢鍾意喺自己世界、鍾意自己諗嘢。」

讓囡囡自行發掘喜好

Linda認為自己會做個relax和casual的媽媽，不會一開始就計劃要讀什麼學校，希望女兒能夠自己玩、在自己世界create一啲嘢，不要太依賴：「依家佢太細，我想觀察佢多啲，唔想咁早要佢學嘢，我諗番我細個屋企環境唔係咁好，冇得學任何嘢，依家我覺得我哋性格、工作任何嘢都OK吖，好似我細個原來已經鍾意演戲，爸爸媽媽返工，我會摷曬我阿媽啲絲巾綁喺個頭扮女俠，又扮拍拖、分手、唱歌，所以我哋想留意佢、觀察佢，發掘佢嘅喜好，到時先慢慢俾佢學， 唔會一嚟乜都學曬，我覺得會over咗。 」

為女兒 老虎都可以打死幾隻

Linda自從升呢做媽媽後，成長了不少，從前她比較自私，不會為人設想。但有了女兒後，她變得有責任感，不再只顧自己，會為屋企人著想。「我覺得係一個快速嘅成長，因為我結完婚即刻有小朋友，所以突然成長得好快，以前廿幾歲，我比較盲舂舂唔識諗，結婚之後，唔再淨係為自己，要為屋企人諗，成熟咗好多，真真正正明白到母愛係乜嘢，以前我以為我知，同埋我演戲，以為我可以想像做媽媽係點，直至自己親身生BB、湊BB，我先明白到嗰種母愛係大到用言語係形容唔到。」