【做個小小農夫】開心農場摘蔬果
講左好耐嘅摘士多啤梨活動,因為聖誕嗰幾日小小豬病左冇得去玩,病好晒有返精神就當然去玩啦。原來士多啤梨就已經係聖誕假期時俾摘哂了,所以今次冇得摘,雖然都有丁點失望,不過我地就改摘農場嘅蔬菜,一樣開開心心過左一個元旦日呀~

其實我地都冇特別諗去邊個場,只係記得曾經同家人去過粉嶺雲泉仙館時,記得佢地個停車場旁邊有個農場有得摘士多啤梨,咁就去嗰度啦(當然…其中一個原因係雲泉仙館有免費泊車,泊好車就可以去玩啦)!
其實當中都有兩個場,我地就跟人潮咁行,最後就嚟左依個老徐農莊啦~
一見到嗰一片士多啤梨地,小小豬都不知幾興奮,一支箭咁跑落農田啦~
不過依個興奮心情就限幾分鐘,因為士多啤梨就已經係聖誕假期時俾摘哂了,大大粒紅卜卜嗰啲真係搵唔到,全部都係BB SIZE,我地真係一粒都剪唔落手~
雖然係就有啲失望(其實都唔係有啲…小小豬原本都滿心歡喜嚟摘),不過經農夫叔叔介紹,原來我地仲可以摘其他蔬菜,於是小小豬又充滿能量,向蔬菜農地出發啦!
首先我地就去拔白蘿蔔~
其實小小豬都唔係第一次拔,仲記得兩年前我地係新界探望太婆時,我地係附近農地拔左一條勁大白蘿蔔。就係有左嗰次經驗,小小豬一見到片蘿蔔地,佢地超級期待。
係蘿蔔地不停行嚟行去,觀察一下邊度有大蘿蔔,揀中左就即刻落手拔啦~
依個時候一個慈父唔忍心見到小小豬失望嘅樣,所以俾多一次機會佢,叫佢拔多一條(就係咁….我又要俾多$30,因為每拔一條蘿蔔承惠$30)~
不過,第二條都一樣係細細的,唉….可能大條嘅都已經俾其他人拔晒了~