魏浚笙

I SWIM|Jeffrey魏浚笙獲讚搶鏡過Edan 自爆中學秘密一面!憑3點封男神

熱話

廣告

魏浚笙(Jeffrey)近日正在ViuTV新劇《I SWIM》作主角,這是他入行以來首次擔當主角,他於劇集首播時以發文稱是人生最重要的日子,可見他對待自己的演藝事業十分認真。而劇集播出後也引來一大批好評,激讚他的演技自然不做作!入行至今,大家對於他的印象是外貌、身形,對此他日前上商台節目受訪《口水多過浪花》時表示更希望大家能深入了解自己,不要只著重自己的外貌。

魏浚笙 Jeffrey笑言由細到大得街市啲叔叔姨姨會叫佢靚仔。
Jeffrey笑言由細到大得街市啲叔叔姨姨會叫佢靚仔。(圖片來源:FB@口水多過浪花)

原文刊於:東方新地

《I SWIM》靠自然演技跑出獲激讚 搶鏡過Edan成新一代男神

ViuTV熱血新劇《I SWIM》首播即掀起全港煲劇熱潮,Jeffrey立刻在個人社交平台上發文指:「Tonight is the night人生大概最重要的時刻就是今晚了,一晃眼ISWIM 已經要播出。這次我特別特別緊張又期待,ISWIM是人生第一套擔任男主角的作品。今晚終於要播出。」可見他對自己首部擔大旗的作品十分著緊。

而這套劇集主打青春熱血,Jeffrey有印尼同荷蘭血統混血靚仔外貌、健碩的肌肉,對現實中的女朋友極專一,條件勁好,有「王子味」, 俘虜了一班「咖啡豆」(粉絲名)。這位年僅24歲, 身高1米77的香港娛樂圈男新人一定能成功「入屋」,成為新一代男神!

Jeffrey 魏浚笙
(圖片來源:IG@jeffreyngai)

劇情講述李馬榮(Edan呂爵安飾演),帶領弱勢隊友,挑戰黃亞樂(Stanley邱士縉飾演),而Jeffery是位插班生余浪沖,明明是位天才泳手,一加入就同李馬榮同黃亞樂成為勁敵,昨日一集更甩底底鬧出笑話,社交平台的劇集截圖及節錄片段即時瘋狂吸Like,仲搶戲過Edan。

有好多人讚他做得自然、不造作,觀眾激讚:「Jeffrey帶起整套戲既氣氛」、「呢套劇集之後我相信Jeffrey會人氣急升,實在太突出,笑到我肚痛!」、「Jeffrey有喜感,冇選錯角色,吸引」、「Jeffrey做得好自然,我比較鐘意睇佢多D」、「Jeffrey值得更紅。」、「乖嘅陳冠希」。

Jeffrey首度擔正開心可以受人肯定

Jeffrey日前上商台節目《口水多過浪花》接受Do姐鄭裕玲訪問,他笑言好開心可以受人肯定,令他覺得Acting Class十分有用:「你話好實質學咗啲咩,我又好難講,因為我都仲係資歷尚淺,所以我做戲要好睇對手,如果對手好投入,咁我就會好投入。」他又指自己拍游水戲好有天份:「因為我係好勁,可以喺水入面擘大眼好耐,有啲人好怕水就做唔到,同埋我喺水入面係做到表情,所以一拍水底shot我就好開心!」他預告《I SWIM》有機會開續集,但不知道會是電視劇定電影,他笑言大家都好想拍,不過最緊要大家都有期。

講到令他有這個感覺的對手,他第一個就話係袁澧林(Angela),之後又補充說:「Edan都有,其實《I SWIM》我覺得成個團隊都有,因為我覺得大家都係好想去做到一件好青春嘅事,所以大家都係一個好投入角色嘅狀態去做,所以有時會自己即興加對白,令演出更加好笑!」他又指Edan、Stanley本身都唔係太鍾意游水,特別Edan連沖涼都要眯晒眼,但佢哋都好專業,接得都會盡力去做。

Jeffrey 魏浚笙 I SWIM i.swim iswim 吳海昕 袁澧林扮學生妹獲網民大讚好青春。
Jeffrey大讚袁澧林係個好對手,令佢好易投入到角色。(圖片來源:《I SWIM》截圖)

前輩導演建議靠感覺拍戲

Jeffrey話拍《I SWIM》要多謝導演:「因為呢個係以導演做原型嘅角色,所以我係好想做好佢,唔想導演睇到覺得唔係佢想要嘅嘢,而係想導演睇到會覺得返番去佢以前嘅時候。」他指《I SWIM》是他第二個演出,第一個是《IT狗》,之後仲有同Anson Lo拍檔《百萬同居計劃》,講到每一個劇嘅角色性格都是不同,比如第一個《IT狗》的角色是比較認真上堂,好追求真理的角色,他說:「嗰時好開心聽到主要對手係珈其,事前都有驚,去問珈其應該點去做好啲?佢同導演就叫我唔好諗咁多,直做!憑感覺去做就得㗎啦,佢話新人最忌擔心得太多,好容易令到自己原本準備嘅嘢都無晒,所以順住個勢去做就得。」

講到最想做的角色,Jeffrey就話想好有型的偶像男主角,指故事要講述女主角被捉走,他很輕鬆地一個對廿個,最尾入到去那間房對於幕後大佬:「有個大佬Big Boss好難揪嘅,要同佢揪揪揪好耐,我就嚟唔得嘅時候,一拳中咗!呢個係我嘅夢想嚟,但其他角色我都願意去試,因為我覺得每次同前輩或者同輩對戲,我都會有進步,可以學到佢哋做嘢嘅方法。」但他強調做戲是做戲,不是做Jeffrey,所以戲入面不需要靚仔,最好可以扮丑角、扮流浪漢。

Jeffrey 22歲的Jeffery BB魏浚笙擁有超高顏值,外表攞滿分。
(圖片來源:IG@jeffreyngai)

唔覺自己靚仔 不想大家覺得他得個樣

原本17歲入行做開硬照Model的Jeffrey,自2020年參加ViuTV節目《調教你男友》後正式入行,之後參演遊戲節目《膠戰》,性格好笑勁討好。他在訪問中直言入行兩年以來自覺好幸運,因為有好多機會去試不同的範疇,包括拍綜藝和拍劇,在《膠戰》仲有機會唱歌。他指拍《調教你男友》時自己還是一個正在讀書的素人,那時候覺得有一個節目竟然可以同女朋友一齊上,就上囉。

被問到由細到大是否都有好多人讚他靚仔?Jeffrey就話:「街市嗰啲就有,我成日去街市買嘢,好多姨姨叔叔都話:『靚仔!要唔要?』其他人有無咁講又?唔係好覺。」Jeffrey自言唔覺得自己靚仔,只係覺得自己幾Cute:「因為我諗嘢、做法都好偏小朋友,到依家都係,私底下我都係一個會𠱁媽咪、𠱁女朋友嘅人。」但他表示自己在入行後有成熟咗,對自己做嘅嘢係高要求咗,希望有時做得唔好,下次可以做得更好。Jeffrey又話自己從來都沒有講過自己是一個靚仔:「其實人哋讚我靚仔係一定開心,但有一個位會去到我無論做咗任何努力,啲人都會覺得我『得個樣』,所以我會希望啲人可以睇我耐少少,或者睇得深入少少。」

被誤會好靜 自爆中學又嘈又多口

Jeffrey又透露自己在拍《IT狗》前,就跟彭秀慧老師上了Acting Class,同Dixon是同學:「嗰時我有問彭秀慧老師,話我好想做到阿正嗰啲感覺,即係我有時好想好放咁去做嘢,想問點解我做唔到?」Do姐問他點解唔做一個內斂些的演員?Jeffrey答:「因為我成日覺得我一內斂,啲人就覺得我有偶像包袱,我就會覺得啲人未了解我!」

Do姐話大家對Jeffrey的評語都是「佢好靜㗎喎!」Jeffrey就話有研究過自己:「我發現我同人唔熟嘅時候,同埋我驚嘅時候,我就會靜,因為我會唔知講咩,比較慢熱,但係我一熟咗就會唔同,好似我上Acting Class嗰時,一開始同啲同學、Dixon佢哋都唔熟,但到咗第五、六堂就會嚟料,開始好多嘢講、好多廢話!」他曾於ViuTV節目《爆谷一周》憶述中學時期的他是個十分嘈吵的人,因為自己本來已經是個多話的人,會不斷吵鬧,但當自己睡覺時又要求其他人安靜,真是個令人又愛又恨的人:「其實我喺中學幾惹人討厭,我喺吵鬧時,以為自己好好笑,但當我瞓覺時叫人唔好鬧,所以中學時有部分同學都討厭我。」

Jeffrey 魏浚笙
(圖片來源:IG@jeffreynga)
Jeffrey 魏浚笙
(圖片來源:IG@jeffreynga)

認天生易水腫 Keep fit全靠媽媽

Jeffrey指10集《I SWIM》由8月中拍到12月頭,原本想10月中煞科,但因為室內泳池只能夠夜晚拍,所以為了等個靚泳池,游水戲都要11月先可以開拍。Jeffrey又話自己本身身形有福氣,肚間打摺:「我好勁水腫,每朝都要花半個鐘去碌面,呢個係天生嘅,遺傳自我阿婆,不過佢已經走咗,我媽咪都有遺傳到,但佢行山行得好勁,所以都keep到好fit,我就鍾意舉鐵。」

他曾於ViuTV節目《爆谷一周》公開中學時期的學生相,可見他已經長得十分標緻,被問到當時的他是不是已經有瘦身,他表示當時和朋友一起去打泰拳,漸漸就變瘦:「我跟佢去,你知啦打泰拳時修身速度好快,打吓打吓就瘦。」

Jeffrey 魏浚笙
(圖片來源:ViuTV《爆谷一周》截圖)

他認為胸同手臂比較易操,腹肌就要食得好清先操到,主要食雞胸肉,同埋媽媽整椰菜花飯,操了差唔多半年至七個月先操到,拍完劇後原本完全不想keep,但無奈地有幾個工作都是要騷肌,所以到依家都要一路keep住。

延伸閱讀:Jeffrey魏浚笙入圍百大俊男 為守承諾遲入行 混血外貌遺傳仙氣媽媽

ISWIM 魏浚笙 Jeffrey早前勤力操肌拍劇缺游水健將。
(圖片來源:IG@jeffreyngai)

入娛圈沒有改變專一個性 未來計劃做老闆?

Jeffrey因為《調教你男友》而入行,所以另一半的身份也因此公諸於眾,但Jeffrey並沒有因為加入多姿多彩的娛樂圈而變心,反而維持自己專一的性格,更認定與自己戀愛六年的女朋友為終身伴侶,更揚言要在女朋友30歲前娶她。

雖然相愛多年,但時間並沒有沖淡他對女朋友的感覺,反而更加恩愛。五年前他對女朋友的深情剖白:「喜歡妳甚麼事都想得單純,喜歡妳笑得像個天真的小孩,喜歡妳幽默搞怪,喜歡妳記不起任何歌詞然後唱得亂七八糟,每一天我都是笑着過…每遇到甚麼事妳都會替我想,努力讓我做個更正面的人,遇到破事爛事不開心的事,妳會分擔我的累我的苦,可妳也會開導我,讓我用另一角度去看,雖然妳愛亂發小脾氣…可是還是無阻我對妳的愛,雖然我無法參與到妳的過去,可是我會確保妳未來的每一天都有我的存在。」

去年,他寫了一篇名為「致我們五年的青春」的文給女朋友,「謝謝你這5年60個月1827天43848小時的陪伴我,們彼此一起經歷過太多,別人根本無法取替,沒有你我根本不可能走到現在,辛苦你最近這一兩年,為了我要瞬間從女孩變成獨立能幹的女人,從此把你小女孩的一面收起來,甚麼困難委屈都自己默默為我承擔,謝謝你的青春、你的付出。」可見Jeffrey對他的女朋友堅定不移,是絕世好男人啊!至於未來的計劃,Jeffrey就話想開一間咖啡店:「因為呢個係我嘅夢想,我好鍾意飲咖啡,因為飲咖啡可以去水腫。」

Jeffrey 魏浚笙 Jeffery唔止要女友Evelyn暫做經理人,仲成日孖住幫客戶做宣傳。
Jeffrey現時由女友Evelyn做經理人,仲成日孖住幫客戶做宣傳。(圖片來源:IG@jeffreyngai)
Jeffrey 魏浚笙
(圖片來源:IG@jeffreynga)

魏浚笙自爆中學什麼秘密?

他曾於ViuTV節目《爆谷一周》憶述中學時期…詳情請看

魏浚笙天生易肥,Keep fit全靠誰?

魏浚笙曾公開中學時期的學生相,可見他…詳情請看

圖片來源:ViuTV《I SWIM》截圖、FB@口水多過浪花、IG@jeffreyngai、《I SWIM》截圖、Viutv《爆谷一周》截圖資料或影片來源:原文刊於東方新地