sunday kiss

Sunday Kiss熱捧童星檢閱

熱話

廣告

《Sunday Kiss》於2011年創刊,至今已是全港最高銷量的親子刊物,而且一向都深受家長歡迎!內容豐富當然係首要,同時我哋亦都提供咗一個平台,畀好多小model、小童星發揮,好多而家廣受大眾喜愛嘅小童星,其實都係喺《Sunday Kiss》出道,或者幫我哋好多大小專題做過小model;甚至喺網上節目做過主持同演出,不如等我哋嚟檢閱一下,有邊幾個已經紅咗?又有邊啲係嚟緊嘅潛力新星啦!

 

童模界天后 Celine 楊鎧凝

Celine 小檔案
中文名: 楊鎧凝
英文名: Celine Yeung
出生日期: 2008年7月28日(7歲)
曾拍攝廣告:美心賀年盛點、敬老護老愛心券、牛欄牌奶粉 “We are Hong Kong Babies”、麥當勞×Hello Kitty 小紅帽等70多個

大家開始認識Celine,可能係因為美心嘅蘿蔔糕廣告,但係唔講大家可能唔知,其實Celien嘅出道之作,就係為《Sunday Kiss》嘅「潮B 街」做小model喇! 當時嘅Celine只係得3歲,不過已經非常精靈,攝影師嘅要求已經可以做到足,而且又聽話又乖巧,所以好得台前幕後嘅工作人員鍾意架!

「 麥當勞×Hello Kitty小紅帽系列」,就係拍攝難度高嘅廣告, 當時得3歲半人仔嘅Celine,要一take過講完成個小紅帽故事,又要記故事,又要做動作,但係最後Celine只係拍咗半個鐘,就已經可以完整講哂,只係次序有啲亂咗,好彩佢表現生鬼可愛,最後就係眾多小朋友中脫穎而出!

介紹美心妹妹Celine,又點可以唔提呢個蘿蔔糕廣告!當年廣告一出,焦點就落哂喺呢個可愛妹妹身上,手捧蘿蔔糕嘅Celine,眼仔碌碌、紅卜卜面珠,加上可愛冬菇頭,真係cute到暈呀!

美心廣告出街之後,Celine馬上人氣急升,陸續開始有好多廣告同活動都邀請呢位廣告天后參與!仲因為咁,第一次成為《Sunday Kiss》嘅封面人物!

Celine 嘅廣告遍布大街小巷, 但係佢經常行過都睇唔到, 要媽媽返轉頭問:「Celine 呢個邊個嚟架?」佢先至發現:「咦,我囉!」

帶小model去影要上山下海嘅專題,記者都要特別小心,雖然都有媽媽跟場,但係要顧及攝影效果同小model嘅人身安全,都有一定嘅難度! 好彩Celine通常都好聽話,次次影相都交足貨,所以通常工作都可以好順利咁完成!

喺鏡頭前後,Celine永遠都係活力充沛,所以每次都同工作人員合作得好愉快!

5歲嘅Ceine,由廣告界踩入大台拍《愛我請留言》,飾演樂悠悠一角,劇集出街之後隨即爆紅,連影后羅蘭姐都讚佢好戲,仲封埋佢做「現代馮寶寶」! 而Celine嘅facebook專頁,fans人數亦都暴升超過22萬!! 多過好多明星tim呀!

Celine而家就嚟7歲,準備升小學二年班,雖然係彈起咗,但係佢都成日會喺《Sunday Kiss》出現架! 好似最近嘅[荔園慳玩全攻略],就係由Celine擔入小model率先入場試玩!!

為食冬菇頭 YuiB鄭耀軒

鄭耀軒(YiuB)小檔案

中文名: 鄭耀軒
英文名: Bryan Cheng
出生日期: 2008年5月21日(7歲)
曾拍攝廣告: Kinder、Minute Maid果粒橙、刀嘜、桂格燕麥飯、Sony等近50個
參演作品劇集: 《載得有情人》、《愛我請留言》、《熟男有惑》、《雷霆掃毒》、《當旺爸爸》等16套

 

童星同明星一樣,最緊要就係有獨特性,同個樣得意、好認!相信大家對呢個冬菇頭、肥嘟嘟嘅小男生都唔會覺得陌生啦!佢個名叫做鄭耀軒YiuB,即係舊年喺《載得有情人》度,飾演黎耀祥個囝囝 – 望仔呢!YiuB 唔止拍劇多,仲係《Sunday Kiss》嘅常用小model,今年7歲嘅佢,已經拍過超過50個廣告架喇!真係拍得住Celine架!

YiuB同Celine可以話係童模界嘅「螢幕情侶」,兩個經常一齊拍檔出席活動,Yiu B媽咪仲爆,YiuB對Celine其實好有好感,又好聽Celine話,一見到佢就會好乖。

YiuB同哥哥浚隆係同時間入行架! YiuB幾個月大影咗輯造型照, 放上網之後就有model公司賞識,請佢拍奶粉廣告,到兩歲幾拍另一個廣告嗰陣,就識咗一個做臨時演員嘅媽媽,請咗YiuB兩兄弟拍戲,於是就開始童星嘅生涯喇!

YiuB拍過唔少劇,巧合地都係喺大結局出現,第一套係《當旺爸爸》,之後係《雷霆掃毒》,做林峯個義子,仲有《愛我請留言》,大結局做Celine小男友。不過YiuB暫時最多戲份,最為觀眾熟悉嘅,就一定係喺《載得有情人》裡面飾演嘅望仔啦!

《載得有情人》出街之後,YiuB更為大眾認識,《Sunday Kiss》當然緊貼,第一時間搵咗YiuB做Sunday Family嘅主角啦!

YiuB平時都有幫《Sunday Kiss》做開小model,,好彩佢本身都冇時停,要影啲喪玩專題,一定唔駛驚佢會冇電!

YiuB身型肥嘟嘟,又出哂名為食,尤其鍾意食朱古力,有次上Sunday Kiss網站節目《型廚主場》,同Celine一齊整朱古力,邊整邊偷食,仲要食到成嘴成手都係,真係好cute, 好好笑!

唔知係咪YiuB個樣夠為食,所以好多食品廣告都係搵佢拍! 出嚟個效果又真係幾自然喎!!

今個新年,Sunday Kiss出咗一set創意揮春,其中一張就係YiuB同Celine一齊影架喇!

童模界fashion icon Keicy 胡梓盈

Keicy 小檔案

中文名: 胡梓盈
英文名: Keicy Wu
出生日期: 2010年11月18日(4歲半)
曾拍攝廣告:美心褢蒸糉、ODM watch、SDM Jazz & Ballet Academies 、 Somewear Sunglasses 等

 

去年為美心拍 攝裹蒸廣告彈出,被稱為新美心妹妹嘅Keicy,活潑可愛得人歡心,最叻唱歌跳舞多才多藝,但最鍾意都係扮靚, 喜歡做小model都因為有得化妝同着靚衫。幕後又有做開服裝設計嘅媽媽幫手扮靚,每次出席活動同拍攝工作,都會扮到最靚上鏡,咁識做 ,所以而家Keicy都成為童模界嘅搶手小model!

Keicy第一次喺《Sunday Kiss》出現,就係已經係擔任Cover girl喇! 媽咪仲特登整咗條波波裙同七色彩虹裙畀Keicy着! 出街之後,Keicy揸住本《Sunday Kiss》幾開心!

Keicy媽咪成日將囡囡嘅為食相放上facebook,點知竟然吸引到美心嘅星探邀請佢哋去casting,就係咁就拍咗人生第一個廣告,仲被封為新美心妹妹!

Keicy喺拍美心廣告之前,已經有其他演出經驗架喇,佢嘅出道作就係兩歲嗰陣,演出鍾一憲同麥貝夷嘅MV《天生不對》。

Keicy表情多多,又成跳跳紮,初頭媽咪都擔心佢會影響拍攝進度,好彩同Keicy合作過嘅工作人員,都覺得佢好開心,好搞笑,所以媽咪先放心帶Keicy去拍嘢同影相。

叫得做童模界嘅fashion icon,Keicy喺《Sunday Kiss》出現,多數都係同時裝有關架! 好似近期嘅”筍媽寶”都成日會見到Keicy擔任小model架!

Keicy媽咪以前幫好多藝人做過形象指導,而家生咗3個小朋友,就將啲仔女當係Barbie咁玩,Keicy就成日都幫媽咪DIY嘅衫做小model!容祖兒同楊千嬅嘅靚衫,都係用紙造出嚟嘅縮細版,着喺Keicy身上,都好有台型架!

Keicy唔單止自己貪靚,原來仲識幫人扮靚架! 之前喺Sunday Kiss嘅網上節目「Keicy Styling Room」,就充分俾佢發揮扮靚嘅天分,而且過程仲好爆笑tim!

Keicy都喺《型廚主場》亮過相,仲同朋友仔一齊整復活蛋,搞到一身都係朱古力!

童模小王子 Jayden區日朗

Jayden小檔案

中文名: 區日朗
英文名: Jayden Au
出生日期: 2008年8月26日(7歲)
曾拍攝廣告: 第49屆工展會、麥當勞@ 辛滋味、DETTOL 洗衣液等
參演作品劇集: 《情逆三世緣》、《愛回家》、《老表你好hea》、《名門暗戰》、《華麗轉身》等

 

7歲嘅小王子Jayden,曾經演出電視劇、電影、廣告,亦都係《Sunday Kiss》嘅常任小model。於去年12月參加第一屆Chic Kiddie 2014@the pulse小王子小公主大賽,成為新一代嘅小王子。亦因為咁,第一次以個人身分登上《Sunday Kiss》封面,更成為專訪主角。

Jayden年紀小小,但演出經驗非常豐富,所以自己一個企上台都未驚過!

Jayden同哥哥Andrew都係《Sunday Kiss》嘅常客,尤其係副刊嘅生活主題,經常都會搵佢哋兩兄弟一齊出遊,帶讀者周圍玩!

Jayden拍過嘅廣告唔算太多,但係就成日會喺電視劇見到佢,喺《老表你好hea》入面,Jayden就係飾演童年嘅王祖藍喇!

Jayden媽咪經常都會喺facebook update Jayden同哥哥嘅近況。睇Jayden等埋位嗰個樣,就知佢真係好鍾意,好享受拍戲啦!

Jayden影過本地時裝品牌嘅平面廣告,搵佢嚟影《Sunday Kiss》嘅”筍媽寶”,就最適合不過啦!

Jayden兩兄弟都一齊上過《型廚主場》,仲夾手夾腳一齊煮嘢畀媽咪食tim!

新一代得意妹 雪兒

雪兒小檔案

中文名: 雪兒
英文名: Nicole
出生日期: 2010年3月12日(5歲)
曾拍攝廣告: 星晨旅遊 2014、維特健靈五色靈芝、美國萬通、ICAC 廉署新一輯廣告理想篇等

 

面圓圓,眼圓圓嘅雪兒,今年只係得5歲,因為拍咗個維多C廣告,就畀人封咗做維多C妹妹,雖然暫時名氣係唔及兩個美心妹,但係產量一啲都唔少架! 電視、廣告、宣傳活動同報章雜誌,幾乎度度都見到佢! 相信只要一個爆出嘅機會,佢一樣可以成為廣受歡迎嘅小童星!

雖然唔係個人專訪,但係雪兒喺呢一年,已經做咗4-5次《Sunday Kiss》嘅專題封面架喇!

拍得政府廣告嘅,一定要形象健康,所以就算係一線明星,都未必個個拍過政府廣告架!但係雪兒得嗰5歲人仔,就已經拍過兩次喇!

影硬照年紀細唔一定係阻礙,最重要係交到戲同聽話! 呢方面,同雪兒合作過嘅記者,都畀好高分佢架!!

 

Sunday kiss會喺暑假期間招募 5-8 歲潛力無限的小朋友參加《Super Kisstar》童星選拔賽,小朋友們將會接受一連串表演指導及項目挑戰,如果你嘅小朋友,都想參與拍攝,又想增強膽量及提升溝通技巧,就快啲報名喇!–> 按此

 

撰文: Joanne

相片:新傳媒資料室、Keicy、雪兒及區日朗facebook專頁