「女神」 孫慧雪 暑假誕大隻長腳B

「女神」 孫慧雪 暑假誕大隻長腳B

宅男女神 孫慧雪 ,去年12月由雪雪BB榮升人妻,一個月後極速升呢做雪子媽媽!談起懷孕經歷,「笑婦」雪雪全程也笑得開懷,十分期待做媽咪,旁人也感受到她的喜悅。雪雪雖自小父母離異,一直跟隨爸爸及嫲嫲生活,但成長路上得到很多愛,並不感到自己有缺失,反而從小渴望婚姻,組織家庭,對伴侶更誓言從一而終,「當我決定咗結婚,我就唔會離婚㗎喇。」

有幸贏得女神的圈外老公Edwin Lo高大威猛,十分喜歡小朋友,與雪雪在籌備婚禮過程已開始造人,不久就一擊即中,結婚當日已懷孕一個月。雪雪笑指腹中BB似老公, 腳長長好大隻, 更瘋狂踢肚, 十分好動,預產期為炎夏8月。至於仔或女,雪雪叫醫生不要告訴她,想保持神秘感直至出世一刻。

撰文:Ling
攝影:Issac Poon(部分相片由受訪者提供)
化妝:King [email protected] MAKEUP
髮型:[email protected] MAKEUP
場地:Lauren Lee Makeup Studio (Tel: 5662 6977)

未知BB仔定女的雪雪為BB改名傾向中性,其中Riley是她的心水,至於中文名都會自己改,不會找師傅,覺得由父母改名會親切一點,但她指老公不懂中文,只識「日、一」這些簡單字, 老公竟提議改名「羅一日」,當然遭雪雪反對!
未知BB仔定女的雪雪為BB改名傾向中性,其中Riley是她的心水,至於中文名都會自己改,不會找師傅,覺得由父母改名會親切一點,但她指老公不懂中文,只識「日、一」這些簡單字, 老公竟提議改名「羅一日」,當然遭雪雪反對!

單親家庭長大渴望婚姻

孕婦懷首胎大多憂心忡忡,既擔心BB的健康,又對將來不知所措,受荷爾蒙影響更易引起情緒波動。惟性格樂觀的雪雪完全沒有受影響,老公更笑她比懷孕前更開心,雪雪笑言:「可能我本身好鍾意BB,所以我好開心,老公話我溫柔咗,少咗發脾氣,哈哈!依家出街都會多咗望人哋個BB,覺得好得意呀!唔知我個BB出世咩樣呢?」

雪雪臉上常掛着甜美的笑容,樂天知命,縱使來自單親家庭,自小只與爸爸和嫲嫲同住,但她從沒有自怨自艾,反而令她渴望組織一個完整家庭,對婚姻更會直到永遠,絕不分離。「爸爸媽媽自我有記憶以嚟就分開咗,細個成日都想爸爸媽媽一齊拖住我,所以大個就希望快啲結婚,生兒育女。我無驚咗婚姻,反而更加渴望,當我決定咗結婚,我就唔會離婚㗎喇。」

2
去年12月底結婚的雪雪,當時已懷孕一個月。
3
雪雪話懷孕後個人易累,懶得洗頭,所以剪短髮方便打理,不過頭髮長得快,由當初的男仔頭變了冬菇頭。

爸嫲難照顧 請夠兩個陪月

雪雪與圈外老公拍拖六年,認定雙方就是Mr. Right,去年決定拉埋天窗,婚禮籌備了半年,並非外界所指的奉子成婚,因兩人早已計劃婚後盡快生小朋友,故婚前開始造人,好快一擊即中,結婚當日陀B一個月,雙喜臨門。「好多人都話生仔要試半年至一年,所以就提早試,估唔到咁快就中咗,我哋都好鍾意小朋友,冇二人世界唔緊要啦,之前都二人世界咗好耐。」

4
雪雪做足產前準備,現每星期聽講座,多睇懷孕書籍、睇YouTube 有關影片學定點湊B。

雪雪懷孕後最開心就是孫爸爸和90多歲的嫲嫲,爸爸經常摸雪雪的肚子笑說:「我個女畀人搞大咗呀!」

不過,孫爸爸和嫲嫲因不擅下廚和年事已高,難以照顧雪雪坐月期間的起居飲食及湊BB,所以雪雪已聘請兩個陪月貼身照顧。「幫我補身又好,教我湊BB又好,我一定要請,已經問咗好多人意見,因為陪月都係人,都會,所以第一個月請咗兩個,一個就日頭幫我煮餸,另一個就夜晚幫我睇住BB,咁我會放心啲,我驚自己技巧未得,但第二三個月夜晚我自己湊番。」懷孕期間除了老公幫手,雪雪都要照顧自己,學習煲湯補身,「但有時我都好懶好攰……我有出去買啲湯番嚟飲,依家有得網上訂湯好方便。」

5
BB就快出世,雪雪十分期待,但最緊張一定是「緊張大師」老公。

長腳粗腰 遺傳老公

現陀B七個月的雪雪,肚子size比較巨,重了近30磅,照超聲波後發現BB腳長長、腰粗粗,相信遺傳了高大的老公,現在一出街常被人誤以為陀孖B。「醫生話我BB比正常BB嘅size大一周半,0%至100%中,佢個size係90幾個%!」雪雪擔心BB太大未能順產,留待九個月時再諮詢醫生意見。「順產對BB好啲,因為BB經產道出來受到壓迫,增加肺功能,有研究仲話EQ會高啲,而且媽咪身體復元快啲,我都好想一生人試一次產程!」

長腳B還充滿運動細胞,無時無刻踢媽咪個肚,三個月大照超聲波已經狂踢。「醫生都笑點解我個BB郁得咁犀利!佢喺入面打拳、踢腳乜都齊,嗰陣細啲我都唔覺,依家長時間都feel到佢踢,有時我隻手貼近個肚,佢會踢到我手震,我睇戲佢一聽到音樂踢得仲犀利呀!」雪雪指兩夫婦皆是性格好動、坐不定之人,相信BB有遺傳,將來一家三口一定要經常出去放電!

9
雪雪至今重了近30磅,肥肚不肥人,身材更升cup,令人羨慕。

長胎不長肉秘訣︰午睡

懷孕頭三個月,雪雪間中有孕吐,鼻子變得靈敏,最難頂肉味撲鼻。「好遠人哋聞唔到嘅我都聞到,尤其聞到肉味就想嘔,之前鍾意食嘅都食唔到,食蘋果都嘔,我試過出門口前食蘋果,一上的士就係咁嘔,嘔到落車,連司機都話:做媽咪真係偉大!」

10
雪雪話懷孕後個人好懶,但一想到BB的需要,就會飛奔出外購買。

孕吐情況一踏入四個月就停止,雪雪笑自己變得大食,「依家一肚餓直情覺得個胃有旋渦,餓到最高點,一定要即刻食嘢!以前肚餓都唔係咁,不過我只能少食多餐,食得多就好似壓住BB咁。」除了生冷海鮮、飲品走冰之外,沒有特別戒口,希望多從不同食物吸收營養。「唔可以畀BB染到李斯特菌,有BB就要負責任。」

不斷進食好易肥,生B後想修身就好難,雪雪靠少食多餐控制之外,更獲一位飽閱資訊的孕婦朋友教路,長胎不長肉的秘訣有賴午睡。「佢話最少都要半個鐘至一個鐘,個胎就會大得快,我每日都有瞓晏覺,真係大得好快!有時我會食飯前瞓,今日做完訪問都會番去恰一恰。」

懷孕約4個月已經好大個肚。

吳若希教路︰每日行樓梯

雪雪懷孕後得到很多新手星媽過招,三月誕下B仔的張名雅提點要多做運動,有助順產過程,一向運動底的名雅順產過程好順利。「佢話佢一路踩單車踩到差唔多就生,生嗰陣push咗三下就push到喇,佢好勁,陀得好fit,生完之後好快瘦。」她亦有請教剛誕一女的吳若希,同樣建議她多做運動,行樓梯是一個好方法。「佢話每日都行,臨生前一兩個月行多啲。」最近雪雪報讀了一些孕婦瑜伽班,希望保持一定運動量,令生產過程順利。

15
吳若希剛於四月誕下囡囡Giselle。

隨着肚子愈來愈大,雪雪最近開始有少許腰痛,睡得不好。「之前有幾日試過瞓瞓吓痺到醒咗,依家日頭做少少運動,行多啲路,夜晚就唔會抽筋喇。」

14
想順產的雪雪開始上孕婦瑜伽班,有助生產。

絕不棄養四小狗

近日雪雪開始停工待產,每日食、瞓、睇懷孕經和準備BB物品,還有四隻狗仔陪伴,生活不至於太苦悶。雪雪是愛狗之人,家有兩隻松鼠狗、一隻芝娃娃和一隻貴婦狗,年齡由4至12歲不等,她揚言絕不棄養四小狗,因為全是她的寶貝。「佢哋都係我BB,係我屋企人,由細到大我都有養狗。」她記得小時候狗仔好黐堂弟,晚晚一齊睡,她希望狗狗將來一樣愛錫她的BB。「堂弟出世時,我隻狗成日同佢一齊瞓,當有親友想抱BB,狗狗即刻狂吠保護小主人,我覺得好sweet好溫馨。」家有寵物可以培養小朋友的愛心與責任心,雪雪見過很多養寵物的家庭,小動物都成為小朋友的童年玩伴,令她十分期待BB出世後與狗狗玩耍的日子。

13
愛狗的她當正狗狗是家人,絕不會因懷孕而棄養。

距離預產期愈來愈接近,雪雪現時陀B心情不算太緊張,反而老公才是緊張大師,驚老婆個肚咁大會爆!「佢問點解你個肚仲有兩個幾月都咁大嘅?會唔會爆㗎?梗係唔會啦!我見過有朋友仲大啦!」每隔一兩個鐘又問BB有冇踢肚,老婆講少句又問:「點解你今日冇話佢踢你?」他連為老婆按摩都不敢,怕按得不好弄傷老婆,「我已經預計到生嗰日佢會緊張到流晒汗,揸相機都跌呀!」

11
雪雪希望BB將來成為開心簡單的人,不必太醒目,最重要人際關係好,樂於助人及享受人生就夠。
12
雪雪為人母後多了一份責任心,凡事會以BB健康為大前提,即使自己好為食,一想到BB立即忍口。

雪雪懷孕寫真

雪雪早前拍攝了一輯以花為主題的孕照留念,本身鍾意花的她十分滿意,即使孕照要性感露肚,老公都沒有詐型。

6

7

 

讀者留言

更多精選內容