世上只有媽媽好 星媽懷孕搵命博
撰文：Kamen
相片：相關FB／IG
星媽懷孕搵命博
1吳日言 －妊娠糖尿
懷孕5個月的吳日言日前出席電影首映禮，透露自己早前做產檢發現血糖指數很高，因此住了3晚醫院，並證實患上妊娠糖尿。她表示現在每日都要在肚皮打4支胰島素針控制血糖直至BB出世，雖然辛苦，但吳日言亦表示只要BB出世健康就夠。
吳日言亦透露預產期是2018年12月頭，已知BB性別，但就想保持神秘不向外公佈。
2林盛斌太太 －Pearl 妊娠糖尿
Bob 嫂一直有妊娠糖尿問題，陀細仔嘅時候為咗控制血糖指數，喺懷孕五週就要開始每餐打胰島素控制血糖。整個懷孕嘅過程打咗足足980針，每餐前後亦要篤手指驗血。細仔Jaye 於上年8月平安出世。
Bob 嫂懷孕時表示：「我由第二個懷孕時第23週開始打胰島素針；第三個由第九週開始打胰島素；第四個時第四至五週就已經開始要打啦！其實咁樣每日打四針，整個懷孕嘅過程係40週，第五週開始打即係我打咗35×7×4=980針，仲未計餐前餐後要篤手指驗血」哇！打足980針真係唔嘢少！辛苦晒 Bob 嫂 啦!
Bob 嫂仲話：「雖然我依家好習慣點樣處理糖尿病，但係其實我都經過一個掙扎嘅過程。講起當時嘅心情真係一匹布咁長，應該可以另開一篇來寫。但係我最終學習到嘅就係既然已成事實，就順其自然！可以做嘅就做晒佢，總之對得住自己；對得住個小朋友就OK啦！」母愛真係非常偉大！
3梁政珏 胎盤前置第四期
36歲「咪神」梁政珏2015年一月低調嫁飲食界商人何思源，立即一索得男，同年9月早產誕下兒子Johnson。不過梁政珏懷孕期間一直寢食難安，其胎盤前置（Placenta Previa）問題，已達最嚴重的第四期。胎盤前置指胎盤在子宮的下半部分，程度分一至四期，第四期最嚴重，正常胎盤的邊緣距離子宮頸五厘米以上，但隨着胎盤愈來愈接近子宮頸，胎盤前置的程度會愈來愈嚴重。
梁政珏懷孕27周她在家中休息期間，下體忽然見紅急送醫院，足足住院整個星期，她表示：「住院期間心情好不穩，瞓唔到食唔落，又成日喊，老公每日跑來跑去照顧我飲食，連佢都病咗無數次，擔心我之餘仲要返工忙到一頭煙，我諗佢對我嘅支持係beyond love。」
胎盤前置第四期屬於整個胎盤蓋住子宮頸，子宮頸在胎盤的中間，在生產時有大機會出血，亦難以順產。胎盤前置沒法預防，需定期作詳細檢查，但孕婦不一定透過臥床休息或針藥控制情況，在20周照結構性超聲波發現胎盤前置很常見，不過當中八至九成孕婦在懷孕後期，胎盤會慢慢往上升轉為正常，孕婦毋須過分擔心。
4葉凱茵 突發性妊娠毒血症
藝人葉凱茵09年與圈外人結婚，育有一個六歲兒子，前年再懷孕佗B仔，懷孕期間皆無異常，豈料臨盆三星期前患上突發性妊娠毒血症，令九個月大的BB胎死腹中，身心大受打擊，自己也命懸一線。產後凱茵的身體如坐月般虛弱，妊娠毒血症的後遺症亦接踵而來，持續高血壓、頭痛、右眼視力有閃光，更難受是腦海中的問號：為甚麼我會有事？是否我做錯了？為甚麼完全無先兆？有先兆或能及時拯救BB……「姑娘問我睇唔睇BB，我唔敢睇，唔想成世留住呢個畫面……」
2016年1月，懷孕九個月的凱茵已準備好隨時生得，前一晚腹中胎兒仍有踢媽咪，但她感到不適失眠，直至清晨才能入睡。第二朝十點幾，她感到全身不舒服，並開始覺得左腹有點痛楚，老公和她皆以為就快生得，打算臥床休息一會，豈料突有M到的感覺。「我即刻去洗手間，見到比M到多血，嗰刻我未知自己出事，因為我不嬲都冇事，我以為生得就走去沖涼，之後即刻去醫院。」
屋企距離威爾斯醫院僅10分鐘路程，護士一check之下大驚，「BB冇咗心跳，你血壓好高。」好多醫生護士圍着她手忙腳亂，急急將她推入產房，望着此情此景，凱茵只覺得「好亂，唔知點，醫生話要即刻催生順產。」身旁的老公再三問道：「真係冇心跳喇？依家開刀都救唔番？」如果有丁點生命跡象，或許可以搶救，但他們獲告之：真的沒有了。
港大婦科名譽臨床醫學副教授 許佩華醫生表示，懷孕會引起不同的併發症，其中一種是妊娠毒血症，一般沒有病徵，但部分人可能會出現頭痛、腹痛及視力轉差等徵狀。妊娠毒血症除了有機會影響胎兒外，孕婦亦會有生命危險。發現問題後，孕婦應立即看醫生，以藥物控制血壓，亦有機會要提早誕下嬰兒，否則病情一旦惡化，孕婦及胎兒隨時不保。
妊娠毒血症通常發生在第三孕期，而高齡產婦、高血壓、糖尿病者、首次懷孕、肥胖、多胞胎或有妊娠毒血症歷史的孕婦較容易患上妊娠毒血症，部分妊娠毒血症的病情有可能會出現急劇變化。許醫生建議患妊娠毒血症機會較高的孕婦可在懷孕初期，經醫生評估患病的風險後，可考慮服用阿士匹靈，有機會減低患病的風險。妊娠毒血症會在孕婦生產之後，逐漸康復，不過患者誕下的嬰兒有機會會比一般嬰兒細小。
5. 徐若瑄 胎盤過低
台灣藝人徐若瑄2015年於40歲以高齡懷孕，懷孕初期因胎位低加上子宮頸閉鎖不全要接受手術，需要長期臥床，以及每日食13粒藥及注射安胎藥，懷孕期間一共吞下2,106粒藥，並注射了300支安胎針，同年8月兒子Dalton平安出世。
6. 范瑋琪 孕婦網球肘
41歲台灣藝人范瑋琪懷孕期間受荷爾蒙及藥物影響引致脫髮，另外還患上孕婦網球肘，導致雙手疼痛無力，網球肘是因為過度使用肘關節外側的肌肉，而造成發炎持續疼痛現象。范范因擔心止痛藥影響胎兒，故強行忍痛。兒子陳睿飛、陳睿翔於2015年1月平安出世。
